İranın Xəzər sahillərində ekoloji böhran; Milyonlarla kubmetr çirkab su Xəzərə axıdılır

SON XƏBƏRLƏR

İranın Xəzər sahillərində ekoloji böhran; Milyonlarla kubmetr çirkab su Xəzərə axıdılır

2026.08.11, 19:55

Xəzərin başına nə gəlir? Çirkab sular Xəzərin su keyfiyyətini ciddi təhlükə qarşısında qoyur.

Gunaz.tv

Gilan valisi Hadi Haqşünas Xəzər dənizinin ekoloji vəziyyəti ilə bağlı xəbərdarlıq edərək su səviyyəsinin azalması, çirklənmə, yad növlərin yayılması, qanunsuz ov və yaşayış mühitlərinin məhv edilməsinin Xəzərin bioloji potensialını ciddi təhlükə ilə üz-üzə qoyduğunu bildirib.

Haqşünas çərşənbə axşamı “Xəzər dənizinin Milli Günü” münasibətilə keçirilən tədbirdə bildirib ki, hər il milyonlarla kubmetr məişət və sənaye çirkab suları, kənd təsərrüfatı tullantıları və plastik çirklənməsi çaylar və digər su kanalları vasitəsilə Xəzərə daxil olur və dənizin su keyfiyyətini ciddi problemlə üzləşdirir.

O, həmçinin Xəzərin qiymətli balıq ehtiyatlarının, o cümlədən nərə və qızılbalıq növlərinin azalması ilə bağlı xəbərdarlıq edib. Haqşünasın sözlərinə görə, yad növlərin yayılması, qanunsuz ov və yaşayış mühitlərinin məhv edilməsi bu növləri böhran həddinə çatdıra bilər. Xəzərin yeganə məməlisi olan Xəzər suitisi də hazırda nəsli kəsilmək təhlükəsi altında olan növlər siyahısındadır.

İranın Ətraf Mühitin Mühafizəsi Təşkilatının rəhbəri Şina Ənsari də bildirib ki, son on il ərzində Xəzər dənizinin su səviyyəsi təxminən 2-2,5 metr azalıb və bu, su hövzəsinin qarşılaşdığı ən böyük ekoloji problemlərdən biridir.

Ənsari xəbərdarlıq edib ki, vəziyyətin idarə olunmaması Xəzərin su səviyyəsinin azalmasının ekosistem, limanlar, sahilyanı icmaların dolanışığı və bölgə əhalisi üçün genişmiqyaslı nəticələrə səbəb ola bilər.

O, həmçinin ağır metallar və pestisidlər kimi çirkləndiricilərin davamlı monitorinqinin aparıldığını və aidiyyəti qurumların əməkdaşlığı ilə obyektlər üçün ekoloji standartların tətbiq ediləcəyini bildirib.

GunAz TV
R.G

GUNAZ.TV

SON XƏBƏRLƏR