Husilər Səudiyyə Ərəbistanının neft obyektlərinə hücum edib

SON XƏBƏRLƏR

Husilər Səudiyyə Ərəbistanının neft obyektlərinə hücum edib

2026.08.13, 19:29

Aramko-nun Cizan neft emalı zavodu ikinci dəfə dronlarla hədəfə alınıb.

Gunaz.tv

GünAz TV xəbər verir; Səudiyyə Ərəbistanının Cizan limanına dron hücumundan cəmi dörd gün sonra Husilərə bağlı Yəmənin Səba xəbər agentliyi cümə axşamı bu limanda yerləşən Aramko neft emalı zavoduna daha bir hücum edildiyini bildirib.

Agentlik iddia edib ki, neft emalı zavodu “iki dronla” hədəfə alınıb. Səudiyyə Ərəbistanının xəbər mənbələri indiyədək bu hücum barədə məlumat yaymayıb.

Bazar günü də Husi dronlarının hücumu nəticəsində bu neft emalı zavodunda yanğın baş vermişdi.

Cizan Qırmızı dənizin sahilində, Yəmən sərhədinə yaxın ərazidə yerləşir və İran İslam Respublikasının dəstəyindən yararlanan Yəmən Husilərinin hücum məsafəsindədir.

Aramko avqustun 5-də Husilərin hücumundan sonra bu obyektin fəaliyyətini dayandırıb. Hücum nəticəsində inteqrasiya olunmuş qazlaşdırma kombinə edilmiş istilik-elektrik stansiyası kompleksi və neft emalı zavodunun çənlər bölməsinə ziyan dəyib.

Husilər həmin vaxt Aramko-nun Cizan və Yanbu şəhərlərindəki obyektlərini hədəfə aldıqlarını açıqlamışdılar.

Cizan neft emalı zavodu sutkada 400 min barel xam neft emal etmək gücünə malikdir və benzin, eləcə də çox aşağı kükürdlü dizel yanacağı daxil olmaqla müxtəlif neft məhsulları istehsal edir.

GünAz TV
R.G

GUNAZ.TV

SON XƏBƏRLƏR