İsrail HƏMAS-ın daxili təhlükəsizlik rəhbərinin Qəzzə şəhərində saxlanıldığını açıqlayıb

SON XƏBƏRLƏR

İsrail HƏMAS-ın daxili təhlükəsizlik rəhbərinin Qəzzə şəhərində saxlanıldığını açıqlayıb

2026.09.02, 12:22

Qəzzə şəhərində keçirilən əməliyyat zamanı HƏMAS-ın daxili təhlükəsizlik strukturuna rəhbərlik edən şəxsi saxlanılıb.

Gunaz.tv

İsrail Baş naziri Binyamin Netanyahu, İsrail Müdafiə Qüvvələri (IDF) və daxili təhlükəsizlik xidməti Şin Betin yaydığı məlumata görə, Şin Betin xüsusi təyinatlı qüvvələri çərşənbə axşamı səhər saatlarında Qəzzə şəhərində keçirilən əməliyyat zamanı HƏMAS-ın daxili təhlükəsizlik strukturuna rəhbərlik edən şəxsi saxlayıb.

Ərəb dilli media səhər saatlarında İsrail tərəfindən dəstəklənən anti-HƏMAS silahlı qrupun Qəzzə şəhərində əməliyyat keçirdiyini və bu əməliyyat zamanı HƏMAS-ın təhlükəsizlik rəhbəri Müin əl-Arabidin saxlanıldığını bildirmişdi. Lakin Netanyahu daha sonra verdiyi açıqlamada əməliyyatın Şin Bet və İsrail Müdafiə Qüvvələri tərəfindən həyata keçirildiyini bildirib. O, əməliyyatı “cəsarətli” adlandıraraq, HƏMAS-ın daxili təhlükəsizlik strukturunun yaradılmasına rəhbərlik edən şəxsin Qəzzədəki evinin yaxınlığında saxlanıldığını qeyd edib.

İsrail tərəfinin məlumatına görə, əməliyyat zamanı Hərbi Hava Qüvvələri bölgədə yerləşən bir neçə “hərbi hədəfə” zərbələr endirib. Bildirilir ki, zərbələr əməliyyatda iştirak edən İsrail qüvvələrinə qarşı mümkün təhlükələrin aradan qaldırılması məqsədi daşıyıb. Birgə açıqlamada əməliyyat zamanı heç bir İsrail hərbçisinin xəsarət almadığı qeyd olunub.

Netanyahu bildirib ki, saxlanılan şəxs son dövrdə HƏMAS-ın Qəzzədə idarəçiliyini yenidən bərpa etmək istiqamətində fəaliyyət göstərib. Onun sözlərinə görə, həmin şəxs Qəzzənin silahsızlaşdırılması ilə bağlı məsələdə “aldadıcı fəaliyyətlərə” cəlb olunub, həmçinin İsrail hərbçilərinə və mülki şəxslərə qarşı hücumların həyata keçirilməsinə yardım edib.

İsrail Müdafiə Qüvvələrinin açıqlamasında bildirilib ki, əməliyyatın əsas məqsədi bölgədə mövcud təhlükələri aradan qaldırmaq, HƏMAS-ın ərazi üzərində nəzarətini zəiflətmək və təşkilatın İsrail hərbçiləri və mülki əhali əleyhinə terror fəaliyyətlərini genişləndirmək planlarının qarşısını almaq olub.

Ş.E

GUNAZ.TV

SON XƏBƏRLƏR