Azərbaycanlıların “Sepəh” bankına etirazları səngimir

SON XƏBƏRLƏR

Azərbaycanlıların “Sepəh” bankına etirazları səngimir - GÖRÜNTÜ

2021.10.20, 07:36

Gunaz.tv

GünAz TV: Güney azərbaycanlılarının İranın “Sepəh” bankına qarşı boykot və etirazları bir həftədir davam edir.

“Sepəh-Bankına-Yox” kampaniyasına qoşulan soydaşlarımız gün keçdikcə öz etirazlarını fərqli formalarda bildirirlər.

Məlumata görə, divarlar və pul əskinasları üzərinə “Sepəh” bankını pisləyən şüarlar yazılır, bankın kartı türk qəhrəmanlarının heykəli qarşısında yandırılır. Bir sıra mağazaların sözügedən bankın kartını qəbul etməkdən imtina etdiyi də bildirilir.

Banka qarşı etirazlar ilk öncə müştərilərin hesablarını bağlaması ilə başlasa da, sonralar etirazlara əhalinin müxtəlif təbəqələrinə mənsub insanlar qoşulub.

İranın mətbuata nəzarət qanununun 23-cü maddəsinə əsasən hər hansı nəşriyyə İranda yaşayan millətləri təhqir edərsə, onun lisenziyası ləğv edilməli, nəşriyyə məsulları 1 aydan 6 ayadək həbs olunub və cərimə ödəməlidir. Görünür ki, bu qanun sözügedən dərgi və türk millətinin təhqir olunduğu mövzu haqda keçərli deyil.

Bu günə qədər “Sepəh” bankının məsulları yol verdikləri irqçi hərəkətə görə üzr istəməyiblər.

Qeyd edək ki, bir həftə öncə “Sepəh” bankının iqtisadi, mədəni və ictimai aylıq dərgisinin 185-ci sayı nəşr olunub. Dərgidə “Çillə gecəsində manat” adlı sözdə tarixi dastan dərc edilib. Rübab Fəzayeli tərəfindən yazılan dastanda türklər “nadan”, “biliksiz dələduz və təkəbbürlü” insanlar kimi təqdim olunub.

İranda rəsmi orqanlar, kütləvi informasiya vasitələri və hətta dərsliklərdə türklərin təhqir edilməsi hallarına tez-tez rast gəlinir. Bunun sistemli şəkildə həyata keçirildiyinə dair müxtəlif sübutlar var.

N.S

GUNAZ.TV

SON XƏBƏRLƏR