21 Fevral - Beynəlxalq Ana Dili Günüdür

SON XƏBƏRLƏR

21 Fevral - Beynəlxalq Ana Dili Günüdür

2021.10.20, 07:36

Gunaz.tv

GünAz TV: 21 fevral bütün dünyada Beynəlxalq Ana Dili Günü kimi qeyd olunur. YUNESKO 1999-cu ilin noyabrında Banqladeş səfirinin təşəbbüsü ilə fevralın 21-ni Beynəlxalq Ana Dili Günü elan edib.

Araşdırmalara görə, dünyada təxminən 6 min dil var və hər il neçə-neçə dil sıradan çıxır. Bir çox mütəxəssislər bu baxımdan Güney Azərbaycan türklərinin ana dilinin də təhlükəsi ilə üzləşdiyini deyir. Buna səbəb həmin dildə məktəbin olmaması, milli mədəniyyətin inkişafının qarşısının alınması, milli varlığın danılması göstərilir.

Güney Azərbaycan türkləri uzun illərdir dünya ictimaiyyəti və ölkə rəhbərliyinin diqqətini bu məsələyə cəlb etmək üçün çeşidli cəhdlərə baş vurur. Ancaq İran rejimi bu haqlı tələbi təmin etmək yerinə, mədəni fəalların keçirdiyi dinc aksiyalara polislə müdaxilə edir, saxlanılan fəalları məhkəmə hökmü ilə həbs salır.

Güney Azərbaycanda olduğu kimi, xaricdəki soydaşlarımız da İranda türk dilində təhsilin qadağan edilməsinə etiraz olaraq bir çox tədbirlər keçirirlər.

Hər il Beynəlxalq Ana Dili Günü ilə bağlı Güney Azərbaycanın hər tərəfində, o cümlədən Təbriz, Urmiyə, Ərdəbil, Zəncan, Marağa, Xoy, Həmədan, Meşginşəhr, Əhər, Miyana, Sulduz və s. kimi şəhərlərdə "Ana dilində təhsil" tələbi ilə bir çox tədbirlər həyata keçirilir. Son günlərdə bir sıra şəhərlərin küçə divarlarında "Yaşasın Azərbaycan!", "Ana dilim - Türk dili!", "Türk dilində mədrəsə, Olmalıdır hər kəsə", "İran türklər üçün zindandır!", "Ana dili!" və bu məzmunda digər şüarlar yazılıb. Təbrizin “Traxtur” Futbol Komandasının ötən görüşlərində də “Türk dilində mədrəsə, Olmalıdır hər kəsə” şüarı dəfələrlə səsləndirilib. Öyrəncilər isə təhsil aldıqları universitetdə, xüsusi ilə Təbriz və Urmiyə universitetlərində, son günlərdə ana dilində təhsil tələbi ilə bir neçə tədbir keçiriblər.

Beynəlxalq Ana Dili Günü ilə bağlı yaxın günlərdə də tədbirlərin davam edəcəyi gözlənilir.

BMT (Birləşmiş Millətlər Təşkilatı) 1999-cu ilin noyabrında Banqladeş səfirinin təşəbbüsü ilə fevralın 21-ni Beynəlxalq Ana Dili Günü elan edib. Bu günün yaranma tarixi isə bir qədər də əvvələ gedir. 21, 22 fevral 1952-ci ildə Pakistanda benqal dilinin qadağan edilməsinə etiraz olaraq keçirilən aksiyada polis və silahlı qüvvələrin müdaxiləsi nəticəsində 4 nəfər şəhid olub. Banqladeş nümayəndələri fevralın 21-ni məhz həmin şəhidlərin xatirəsinə ehtiram əlaməti kimi Ana Dili Günü adlandırılması haqqında müraciət ediblər.

YUNESKO-nun Baş Konfransında 21 fevral Beynəlxalq Ana Dili Günü elan olunub və üzv ölkələrə bildirilib ki, həmin gün məktəblərdə, universitetlərdə ana dilinin əhəmiyyəti ilə bağlı tədbirlər, konfranslar, seminarlar keçirilsin.

N.S

GUNAZ.TV

SON XƏBƏRLƏR