Lətif Həsəninin məzuniyyət tələbi təmin olunmayıb

SON XƏBƏRLƏR

Lətif Həsəninin məzuniyyət tələbi təmin olunmayıb - Rəcayişəhr zindanında

2021.10.20, 07:36

Gunaz.tv

GünAz TV: Kərəcin Rəcayişəhr zindanında məhkum edildiyi 8 illik həbs cəzasını çəkməkdə olan azərbaycanlı milli-mədəni fəal Lətif Həsəninin məzuniyyət tələbi həbsxana məsulları tərəfindən rədd edilib.

Məlumata görə, zindanın 10-cu korpusunun 4-cü salonunda saxlanılan fəal 3 ildir ki, hər 4 ayda bir dəfə 4-5 günlük məzuniyyətə buraxılır. Lakin onun son dəfə evə buraxıldığından 6 ay keçməsinə baxmayaraq məzuniyyətə getməsinə icazə verilmir. Azərbaycanlı fəal bu barədə müraciət edib, lakin tələbi zindan məsulları tərəfindən təmin olunmayıb.

Fəal o halda məzuniyyətə buraxılmır ki, valdeyinləri xəstəlikdən dolayı onun görüşünə getməyə qadir deyil.

Lətif Həsəni 2013-cü ilin qış aylarında 4 azərbaycanlı fəalla (Mahmud Fəzli, Şəhram Radmehr, Ayət (Yürüş) Mehrəlibəyli və Behbud Quluzadə) birlikdə saxlanılıb. Şərqi Azərbaycan Apelyasiya Məhkəməsi fəalların hər birini 9 il azadlıqdan məhrum edib. Lakin əvvəlki hökmlər nəzərdən keçirildikdən sonra onların həbsi 8 ilə endirilib.

Azərbaycanlı fəallar qanunsuz qrup yaratmaqla milli təhlükəsizliyə qarşı cəhd göstərməkdə günahlandırılıb.

Hazırda Lətif Həsənidən başqa onunla birlikdə saxlanılan fəalların hamısı şərti azadlığa buraxılıb.

2013-cü ildə Təbrizin Mərkəzi Zindanında həbs edilən fəal təxminən 50 gün aclıq aksiyası keçirdikdən sonra 2014-cü ilin iyun ayında öncə Tehranın Evin zindanı, sonra isə Rəcayişəhr zindanına intiqal edilib.

Güney Azərbaycanın Xalxala şəhərində dünyaya göz açan Dr. Lətif Həsəni politologiya ixtisası üzrə təhsil alıb, o Bakı Dövlət Universitetinin məzunudur.

İranda son zamanlar azərbaycanlı milli-mədəni fəallara qarşı təzyiqlər artıb. Azərbaycanlı siyasi məhbusların əksəriyyəti ilkin hüquqlarından məhrumdur. Bu vəziyyət ölkənin müxtəlif həbsxanalarında hökm sürür.

N.S

GUNAZ.TV

SON XƏBƏRLƏR