Edama məhkum güneyli alim beynəlxalq mükafata layiq görülüb

SON XƏBƏRLƏR

Edama məhkum güneyli alim beynəlxalq mükafata layiq görülüb

2021.10.24, 08:26

Gunaz.tv

Bu barədə hazırda Tehranın “Evin” zindanında saxlanılan və barəsində ölüm hökmü çıxarılan güneyli alimin həyat yoldaşı Vida Mehraniya mediaya açıqlamasında bildirib.

Onun verdiyi məlumata görə, Ə.Calali beynəlxalq “Academic Freedom” mükafatına layiq görülüb.

Vida Mehraniya bildirib ki, həyatı yoldaşı adından mükafatı almaq üçün ona müraciət olunub. Ancaq koronavirus pandemiyası ilə əlaqədar karantin məhdudiyyətlərinə görə Brüsselə gedə bilməyib.
Onun sözlərinə görə, mükafatı bu həftə Əhmədrza Calalinin nümayəndəsi olaraq professro Karolayn Pavelz alacaq.

Qeyd edək ki, “Academic Freedom” mekafatı Belçika Universitet Professorları Assosiasiyası tərəfindən təqdim edilir.

Mükafat alimlərin həbsə atılmamasını, azad şəkildə tədqiqatlarını davam etdirməli olduğunu simvolizə edir.

Bundan öncə oktyabrın 17-də Beynəlxalq Əfv Təşkilatı güneyli alimlə bağlı yeni bəyanat yayıb.

Bəyanatda İran hökumətindən Əhmədrza Calalinin barəsində çıxarılan edam hökmünün ləğv olunması və alimin dərhal azadlığa buraxılması istənilib.

Professor Ə.Calali İsveç vətəndaşıdır, o İranda "Mossad”a casusluq ittihamı ilə edama məhkum olunub və hazırda Tehranın Evin zindanında həbsdədir. Alim özünə qarşı irəli sürülən ittihamı dəfələrlə rədd edib, ittihamın heç bir əsası olmadığını bildirib.

Deyilənlərə görə, o Avropa ölkələrinə qarşı SEPAH-ın casusluq layihələrinə qatılmaqla bağlı təklifi rədd etdiyi üçün rejimin qəzəbinə tuş gəlib.

Bundan əvvəl BMT azərbaycanlı aliminin səhhəti ilə bağlı İran hökumətinə xəbərdarlıq edib, həmçinin müxtəlif ixtisaslar üzrə 121 nobel mükafatı laureatı onun azadlığa buraxılmasını tələb edib.

Ə.Calali İranda tibbi universitetində təhsilini başa vurduqdan sonra bir müddət Təbii Fəlakətlər Mərkəzində çalışıb. O 2009-cu ildə təhsilini davam etdirmək üçün İsveçə gedib.

Təbii fəlakətlər üzrə doktorluq dərəcəsini İsveçin Karolinska İnstitutundan alan Ə.Calali həyat yoldaşı və iki övladı ilə birlikdə İsveçdə qalmalı olub, o İtaliya və Belçika kimi ölkələrdə elmi-tədqiqat müəssisələrində də çalışıb.

Ə.Calali 2016-cı il aprelin 24-dən Tehranın Evin zindanında həbsdədir.

Tehran İnqilab Məhkəməsi 2017-ci ilin sentyabr ayında Cəlalini edama məhkum edilib. Qərar daha sonra İran Ali Məhkəməsi tərəfindən də təsdiq olunub.

O Tehran və Şiraz universitetlərinin dəvəti ilə elmi konfransa qatılmaq üçün İrana səfər etdiyi zaman saxlanılıb. Onun bu müddətdə vəkili ilə əlaqəsinə çoxlu məhdudiyyətlər qoyulub.

Azərbaycanlı alim həbsdə qaldığı müddətdə ona olan təzyiqlər, hüquqi vəziyyəti və vəkili ilə görüşünə qoyulan məhdudiyyətlərə görə aclıq aksiyası da keçirib.

Azərbaycanlı alimın "cinayət işi" İranda müəyyən məhbuslara qarşı saxta ittihamla quraşdırılan bədnam "dosye"lərdən biridir.

Dosyedə ziddiyyətlərin olduğu ilə bağlı çoxlu faktların üzə çıxdığı bildirilir.

C.E

GUNAZ.TV

SON XƏBƏRLƏR