"Traxtur" uduzdu, baş məşqçi istefa verdi- Klubda böhranlı günlər davam edir

SON XƏBƏRLƏR

"Traxtur" uduzdu, baş məşqçi istefa verdi- Klubda böhranlı günlər davam edir

2021.11.06, 12:27

Gunaz.tv

“Traxtur"un baş məşqçiliyindən getməklə sevdiyim komandaya xidmət etmək istədim”-deyə, F.Kərimi noyabrın 5-ində istefası ilə bağlı yazdığı məktubda bildirib.

O, bildirib ki, baş məşqçilik məsuliyyətini qəbul edəndə “Traxtur”a xidmət göstərə biləcəyini təsəvvür edirmiş.

"Lakin bu, belə olmadığı üçün istefanı ən uyğun variant hesab edirəm"-deyə, sabiq baş məşqçi bildirib.

Baş məşqçi istefa məktubunda klubun oyunçularına göstərdikləri fədakarlığa, qeyrət və əzmkarlığa görə təşəkkür edib, onlara uğur arzulayıb.

Qeyd edək ki, dünən İran Premiyer Liqasında növbəti turun oyunları keçirilib.

“Traxtur” Tehranın “Peykan” furbol klubu ilə qarşılaşıb.

Təbriz klubu 3-1 hesabı ilə uduzub. Bu yenilgidən sonra "Traxtur" 3 xalla turnir cədvəlinin 11-ci pilləsində qərarlaşıb.

Qeyd edək ki, Firuz Kərimi bir neçə həftə bundan öncə Təbriz klubunun başına gətirilmişdi.

Uzun müddətdir “Traxtur” klubu daxilində baş verən çəkişmələr, ixtilaflar və klubun yüksək məbləğdə borcunun yaranması Asiyada ən çox tərəfdarı olan komandada böhran yaranmasına səbəb olub.

Tehranın "İstiqlal", "Perspolis", İsfahanın "Sepahan" və başqa mərkəzi əyalətlərin klublarına dövlət tərəfindən külli məbləğdə vəsait ayrıldığı halda Təbriz komandasına dəstək verilmir.

Bu, bir sıra azərbaycanlı millət vəkilləri, o cümlədən Əhmədrza Əlirzabeygi, Məsud Pezeşkiyan və Hüseyn Hatəminin etirazları iə qarşılaşıb.

Bundan bir müddət öncə Kəleybərin İran parlamentindəki nümayəndəsi Hüseyn Hatəmi “Traxtur” futbol klubuna qarşı olan ayrı-seçkiliyi tənqid edərək, Tehran klublarına dəstək verildiyini, lakin “Traxtur"a qarşı diqqətsiz yanaşıldığını bildirib.

“Azərbaycan mədənlərinin zəngin ehtiyatlarından “Traxtur” klubuna maliyyə yardımı ayırın. Əks halda İdman naziri və Sənaye, mədən və ticarət nazirinin parlamentdə impiçment məsələsini qaldıracağam”-deyə, bundan öncəki çıxışında millət vəkili xəbərdarlıq edib.

C.E

GUNAZ.TV

SON XƏBƏRLƏR