GünAzTv: BMT Baş Assambleyasında işğal olunmuş ərazilərimizdəki vəziyyətin müzakirəsi İrəvanda təlaşla qarşılanır.

Ermənilər Rusiya prezidenti Dmitri Medvedyevin Azərbaycana səfəri ərəfəsində "köhnə-yeni" kartlarını yenidən açdılar. Xocalı faciəsinin törədilməsində birbaşa iştirak edən Serj Sarkisyan bildirib ki, "Dağlıq Qarabağ münaqişəsinin sülh yolu ilə nizamlanması yalnız bir halda mümkündür: "Bu Qarabağın beynəlxalq səviyyədə tanınmasıdır"

Onun sözlərinə görə, problemin hərbi yolla həlli keçirilmiş yoldur və bu variantın nəticəsi göz önündədir. Xocalı soyqırımını törətmiş bir şəxsin belə açıqlama verməsi ən birincisi erməni ictimai rəyini ruhlandırmaq, ikincisi isə Azərbaycana qarşı psixoloji təzyiq vasitəsidir. Burada bir sıra məsələləri xatırlatmaq istəyirəm. Ən əvvəl, Ermənistan parlamentinin 1988-ci ildə "miatsum"-Dağlıq Qarabağın Ermənistana birləşdirilməsi haqqında qərarını unutmamaq lazımdır. Ermənilərin Dağlıq Qarabağın "müstəqilliyindən" dəm vursalar da, "Böyük Ermənistan" və "miatsum" ideyasından əl çəkmədiklərini zaman-zaman ortaya qoyurlar.Digər bir tərəfdən, Serj Sarkisyanın belə bir bəyanatı məhz Dmitri Medvedyevin Azərbaycana səfəri ərəfəsində açıqlamasını təsadüfi saymaq mümkün deyil. Fikrimizi bir sıra xatırlatmalarla arqumentləşdirmək istəyirik. Kəskin şəkildə Kosovanın müstəqilliyinin tanınmasının əleyhinə olduğunu bəyanlayan Rusiya 2008-ci ilin avqustunda Gürcüstana təcavüz edərək faktiki olaraq, qonşu ölkənin torpaqlarını işğal etməsini rəsmiləşdirdi. Üstəlik, Cənubi Osetiya və Abxaziyanın "müstəqillikləri"ni tanıdı. Bununla da Rusiya öz aləmində Kosovaya görə, Qərbdən qisası aldığını düşünürdü. Amma başqa məsələlər ortaya çıxdı. Vladimir Putinin Mixail Saakaşviliyə qarşı şəxsi qəzəbi Rusiyanı gətirib dünyada analoqu olmayan dilomatik ziddiyyətlər müstəvisinə sürüklədi. Düzdür, Rusiya bundan yararlanır, amma yalnız və ya Gürcüstana qarşı.Xatırladım ki, Rusiya guya "Cənubi Osetiyada soyqırım törədilir" deyə Gürcüstana qarşı hücuma başlayanda prosesləri Kosova variantına uyğun irəlilətməyə çalışırdı. Amma istədiyi alınmadı. Məlum oldu ki, Cənubi Osetiya münaqişəsi zamanı təxminən 770 nəfər ölüb, onlardan 530 nəfəri gürcü, 240 nəfəri isə osetindir. Bununla da Mosvanın "gürcülər osetinlərə qarşı soyqırım törədir" iddiası puç oldu. Rusiya nəyə görə Kosova variantını reallaşdırmağa çalışırdı? Ən birincisi onu deyək ki, Kosovada etnik soyqırıma məruz qalan məhz boşnaklar idi, serblərin törətdiyi qətliamlar nəticəsində minlərlə Kosova müsəlmanı məhv olunub, 2 milyon insan öz doğma yurd-yuvalarından qovulmuşdu. Qərbin Kosovanın dövlət müstəqilliyini tanımasında da əsas arqument budur: boşnaklar soyqırıma və etnik təmizlənməyə məruz qalıb. Burada artıq bir xalqın "öz müqəddəratının təyin etməsi"ndən yox, soyqırıma və etnik təmizlənməyə məruz qalmış bir xalqın öz müqəddaratını təyin etməsi, yəni insan hüquqları məsələsi önə çıxıb.Dağlıq Qarabağda və Azərbaycanın digər işğal olunmuş ərazilərində soyqırımı və etnik təmizləməni məhz ermənilər həyata keçirib. Ermənilərin (faktiki olaraq Rusiyanın) təcavüzü nəticəsində 30 min insanımız şəhid olub, 1 milyondan çox insanımız qaçqın və köçkünə çevrilib. Elə Ermənistan prezidenti Serj Sarkisyanın, keçmiş prezident Robert Köçəryanın, müdafiə naziri Seyran Ohanyanın, Rusiyanın 366-cı diviziyasının törətdiyi Xocalı soyqırımı ermənilərin Azərbaycana qarşı etnik təmizlənməsinin ən qanlı nümunəsidir. BMT Baş Assambleyasında hər hansı sənədin müzakirəsindən isə Serj Sarkisyan şəxsən məhz buna görə narahatdır.Ermənilər bu reallıqları çox dəqiq bilirlər. Buna görə də, rəsmi Bakının BMT Baş Assambleyasında Azərbaycanın işğal olunmuş ərazilərindəki vəziyyətə dair qətnamə layihəsini müzakirə çıxarmasını əsəb və təlaşla qarşılayırlar. Fikrimcə, Serg Sarkisyanın Dağlıq Qarabağdakı separatçı rejimin "müstəqilliyinin" tanınması barədə açıqlaması, yaxud Ermənistan parlamentindəki "İrs" fraksiyasının spiker Ovik Abramyana separatçı ermənilərin "müstəqilliyini tanımaq" barədə müraciəti və s. oxşar siyasi şoular rəsmi Bakının BMT Baş Baş Assambleyası səviyyəsində başlatdığı yeni diplomatik hücumundan çəkindirmək niyyəti güdür. Rəsmi İrəvan Brüsseldə fəaliyyət göstərən "Ermənistanın Avropa Dostları" təşkilatının vasitəsiylə "BMT-nin Qarabağ məsələsinin müzakirə olunduğu yer olmaması" haqqında təbliğata da başlayıb. Bu əslində düşmənin nədən narahat olduğunu göstərir. Bu gün İrəvanın Azərbaycana diplomatik müstəvidə təzyiq göstərməsi üçün ciddi arqumenti, vasitəsi qalmayıb. Ötən illər ərzində Rəsmi Bakının Dağlıq Qarabağ münaqişəsinin yenidən BMT səviyyəsinə çıxarmamasının səbəbi isə ermənilərin danışıqlarda konstruktiv mövqe tutacağına müəyyən inam idi. Eyni zamanda, ATƏT Minsk qrupu həmsədrlərinin verdiyi vədlər idi. İndi isə vəziyyət xeyli dəyişib. Rusiya ilə hərbi əməkdaşlığını genişləndirən Ermənistan yenidən hədə dilində danışmağa çalışır, danışıqlar birdəfəlik dalana dirənib. Fikrimcə, BMT Baş Assambleyasında Azərbaycanın işğal olunmuş ərazilərindəki vəziyyətə dair qətnamə müzakirəsində ABŞ və başqa Qərb ölkələrinin tutacağı mövqe bu ölkələrin həm də Rusiya-Ermənistan hərbi əməkdaşlığına münasibətinin göstəricisi olacaq. Əvvəlki illəərdən fərqli olaraq, Azərbaycanın daha çox dəstək qazanması ehtimalları çoxdur. Əgər erməni KİV-inə diqqət yetirsək görərik ki, ermənilər Azərbaycanın İslam Konfransı Təşkilatı ölkəələrinin dəstəyinə arxalandığı barədə açıqlamalar, şərhlər verilir. Bununla da Ermənistan XİN dolayısı ilə işğal faktını xristian təəssübkeşliyi altında gizlətməyə çalışır. Məsələn, dünən Edvard Nalbandyan bildirib ki, Azərbaycan İslam həmrəyliyindən çıxış edir. Ermənilər eyni zamanda "Madrid prinsipləri"ni yada salmadan, Qarabağ münaqişəsiylə bağlı ATƏT XİN rəhbərlərinin Afina bəyanatını, MQ həmsədrləri ölkələri prezidentlərinin birgə bəyanatını və s. sənədləri xatırladırlar. Əslinə qalsa, bu sənədlər də də Azərbaycanın ərazi bütövlüyü məsələsi öz əksini tapıb. Amma rəsmi İrəvanın əsas məqsədi bir sıra müddəalarını razılaşdırdığı "Madrid prinsiplərini" unutdurmaqdır. Edvard Nalbandyan dünən İrəvan Universitetində çıxışı zamanı deyib ki, Dağlıq Qarabağın statusu "xalqların öz müqəddəratını təyin etmə" prinsipi əsasında həll olunmalıdır.Bu erməni şoularının intensivləşməsinin bir səbəbi də Rusiya prezidenti Dmitri Medvedyevin Azərbaycana səfəridir. Respublika Partiyasının faraksiya üzvü Qagik Melikyan deyir ki, Medvedyevin Bakıya səfəri özünün statusuna görə İrəvana səfərindən aşağıdır.O da maraqlıdır ki, bir neçə gün əvvəl RF-ın xarici işlər naziri Sergey Lavrov, dünən isə RF prezidentinin köməkçisi Sergey Prixodko bildirib ki, Rusiya və Azərbaycan arasında "ənənəvi isti və etimada əsaslanan münasibətlər var". Sergey Prixodko Rusiya-Ermənistan arasında Gümrü hərbi bazasının saxlanma müddətinin uzadılmasının Azərbaycanda narahatçılıqla qarşılandığına münasibət bildirib. Onun sözlərinə görə, real vəziyyəti bilən rəsmi şəxslərin narahat olduğunu düşünmür, amma müxalifət partiyalarının mövqeyini sakitliklə qarşılayırlar. İrəvanda çıxan "Jamanax" qəzeti isə vurğulayıb ki, Dmitri Medvedyev Bakı səfərində Rusiyanın Azərbaycan və Ermənistan ilə münasibətlərində balans yaratmaqla, "rəsmi İrəvanın üstünə soyuq su tökəcək". Erməni qəzeti onu da yazır ki, Rusiya "strateji tərəfdaşlıq" anlayışını Azərbaycana münasibətdə də tətbiq edəcək: "Moskvanın Azərbaycana ZRK C-300 raket-kompleksini satmaq niyyətləri barədə açıqlamalar bu münasibətlərin adi diplomatiya olmasından xəbər vermir. Əgər Rusiya hər bir kvadratmetr ərazisinə sahib olduğu Ermənistana özünün forpostu kimi baxırsa, Azərbaycanla bərabərhüquqlu danışıqlar aparır".Ermənistanın adı ilə Azərbaycan torpaqlarını işğal edən Rusiyanın ölkəmizə münasibətinin dəyişməsindən danışmaq hələ tezdir, mümkün deyil. Amma diqqəti çəkən odur ki, Moskva rəsmi Bakı ilə əvvəlki illərdən fərqli olaraq bərabərhüquqlu şəkildə danışmağa ehtiyac duyur.Yeri gəlmişkən, Türkiyənin Vaşinqtondakı səfiri Namik Tan bildirib ki, Ermənistan və Türkiyə arasında Sürixdə imzalanmış protokollar masanın üstündədir. Amma Ankara qarşılıqlı etibarı artırılması üçün İrəvandan konkret addımlar gözləyir. BMT Baş Assambleyasının yaxın günlərdə keçiriləcək seesiyasından danışan Namik Tan prezident Abdulla Gül və xarici işlər naziri Əhməd Davudoğlunun sentyabrın 20-22-də Nyu-Yorkda olacağını açıqlayıb. Səfir söyləyib ki, Ankara Vaşinqtonla münasibətlərin möhkəmləndirilməsində maraqlıdır.Deyəsən, daha maraqlı proseslər gözlənilir...

Xalq cəbhəsi