GünAzTv: Qərb bu ölkədəki dəhşətləri niyə dilinə gətirmir?. Yoxsa İran nefti və korporativ maraqlar ikili standartlara yol açır.

«Hüquq müdafiəçilərinin məlumatına görə, İslam şəriəti ilə idarə olunan İranda son 2 ay ərzində 500 adam edam edilib. Ölkənin həbsxanaları qanunsuz həbs olunmuş məhkumlarla doludur. Bir çox məhbuslar yalnız bir neçə dəqiqəlik məhkəmə istintaqının nəticəsi olaraq edam cəzası alır. Siyasi məhbusların bir çoxu «narkotik trafiki» kimi ittihamlarla edam edilir. Ölüm dəhlizlərində minlərlə məhbus öz edamını gözləyir»,- deyə ANF informasiya agentliyinin İrandan hazırladığı analitik reportajda deyilir.

Materialda daha sonra yazılır: «Küçələrdə polis terroru hökm sürür, yüz minlərlə qadın küçələrdə yalnız «yaxşı bürünmədikləri» üçün xəbərdarlıq və ya cəza alır. Oğurluq etdikləri üçün əli kəsilənlərin, gözləri çıxarılanların, şallaqlananların sayını bilən yoxdur. Həbsxanalarda ağır işgəncələrlə yanaşı, pis şərait üzündən də tez-tez ölüm xəbərləri gəlir. Qərbliləri isə  yalnız nüvə proqramı və İran prezidenti Mahmud Əhmədinejatın çox vaxt İsrail haqqında söylədikləri maraqlandırır. İranda daşqalaq cəzasına məhkum edilən Sakinə Aştiyani üçün son zamanlar beynəlxalq miqyasda bir kampaniya başladılıb. Dövlət və hökumət başçıları ilə yanaşı, dünya miqyasında tanınmış sənətçilər, ziyalılar və şəxsiyyətlər də bu kampaniyaya dəstək verir. Yeni başladılan digər bir kampaniyada isə edam cəzasına məhkum edilən 18 yaşlı İbrahim Həmidi adlı homoseksualın vəziyyətinə diqqət çəkilir. Yəni meşə yanır, Qərb isə bir ağacı xilas etməyə çalışır.Hər gün edamlar həyata keçirilir  Şübhəsiz, Sakinə və İbrahimi bu vəhşi cəzalardan qurtarmaq lazımdır. Ancaq Sakinə və İbrahim kimi yüzlərlə, minlərlə günahsız qurbanlar var. Qərb mediası vətəndaşların diqqətini yalnız Sakinəyə cəlb etdiyi bir vaxtda, kənarda baş verənləri göstərmir, hətta gizləyir. Bunun İran molla rejiminin satdığı neftlə əlaqədar olduğu yazılır. Qərb ölkələrinin maraq münasibətlərinin kölgəsində isə yeni edam xəbərləri gəlir. Hər gün edamlar yaşanır, sərhəd xəttində mühakiməsiz edamlar reallaşır. İranda yaşanan  problemlərin gerçək ölçüləri Qərbin böyük xəbər agentlikləri tərəfindən də dilə gətirilmir. Elə görünür ki, İranda gerçək problemlərin bilinməsi və beynəlxalq ictimaiyyətin bu problemləri daha yaxından öyrənməsi istənilmir.Qərb mediası susur «Frans Press» kimi xəbər agentlikləri hökumətə yaxın qəzetlər və ya rəsmi şərhlərdə ifadə edilən rəqəmləri əsas götürməklə kifayətlənir. Bu xəbərlərdə hər hansı bir sual işarəsinə belə yer verilmir. Halbuki bu qədər tənqid olunan bir prezident və hökumətin yaydığı məlumatlar «rəsmi yalanlar»dan başqa bir şey deyil. «Frans Press»-in edamlara bağlı verdiyi xəbərlər Beynəlxalq Amnistiya Təşkilatının illik məlumatlarının az qala yarısı qədər. Digər edamlar isə görünmür. Amnistiya Təşkilatının hesabatına görə, keçən il ən az 388 adam edam edilib. İranda ümumiyyətlə, edam edilənlərin şəxsiyyəti barədə məlumatlar nəşr olunmur, yalnız baş hərfləri göstərilir. Sakinə ilə bağlı hadisədə olduğu kimi bəzi siyasi məhbuslar uydurma ittihamlarla asıldıqları zaman adları açıqlana bilir. Bir çox siyasi məhbuslara qarşı uşaqlara təcavüz, təhqir olaraq istifadə edilən homoseksualizm cinayəti və tez-tez narkotik maddə daşımaqla bağlı uydurma ittihamlar irəli sürülür.Bitməyən işgəncələrə adekvat cavab yoxdur İran rejimi xalqın gözləri qarşısında edam və şallaq cəzalarını tətbiq edir. Edam edilənlərin cənazələri bəzən günlərlə dar ağacından asılı vəziyyətdə qalır. Rejimə bağlı  internet saytlarının verdiyi edam xəbərləri belə qorxunc bir mənzərə yaradır. Az qala hər gün edam xəbərləri var. İranda Demokratiya üçün Beynəlxalq Kampaniya adlı insan haqları qrupunun «etibarlı mənbələrə» əsaslanaraq verdiyi açıqlamaya görə, Məşhəd şəhərindəki Vəkilabad həbsxanasında hər həftə onlarla adam ölüm dəhlizlərindən keçərək edam edilir. Rejimə yaxın bir sayta görə, son aylarda yalnız bu həbsxanada həftədə 60-70 adam edam edilib. Həm rejimə yaxın saytlar, həm də İranın müxalif saytlarına görə, kütləvi edamlar da yenidən başlayıb. Son iki ayda ən azı 500 adamın edam edildiyi bildirilir.Qərb ölkələri Sakinə və ya edam cəzası alan 18 yaşlı İbrahim Həmidini qurtarmağa çalışarkən, İran rejimi Vəkilabadda yüzlərlə adamı edam edəcək. 150 başqa həbsxanada ən az 250 min gənc də təhdid altında qalmaqda davam edəcək. İranda edam edilənlərin orta yaşı 28-dən aşağıdır. Beynəlxalq cəmiyyətin görmədikləri yalnız bununla da bitmir. Qərbin hesabatlarında dilə gətirilən dini və etnik azlıqlara qarşı «ayrı-seçkilikçilik» edilməsi barədə naməlum tənqidlər problemi ört-basdır etməkdən başqa bir şey deyil. Bu qədər haqsızlıqlar arasında işgəncənin nə qeydiyyatını aparan var, nə də adını tutan. Şərqi Kürdüstanda çoxu Urmiya həbsxanasında olmaqla bu ilin ilk altı ayında ANF-in apardığı qeydlərə görə ən azı 8 məhbus şübhəli şəkildə həyatını itirib. İşgəncələrdə qətlə yetirilənlərlə bağlı gerçək rəqəmlərin daha yüksək olduğu təxmin edilir.Sərhəddə güllələnlər Bu gün İran həbsxanalarında hər an edam təhdidi altında olan ən azı 18 kürd siyasi məhbus var. Bunlardan 3-ü 2007-ci ildən bu yana edam ediliblər. Aralarında iki qadın siyasi məhbus da var. Yenə sərhəd xəttində mühakiməsiz edam xəbərləri ard-arda gəlir. Avqust ayından bu yana ən azı 6 qaçaqçı İran hökumət qüvvələrinin hücumlarında həyatlarını itirib. ANF-in qeydlərinə görə, ilin başından bu yana İran əsgərləri tərəfindən sərhəd bölgələrində ən azı 40 qaçaqçı qətlə yetirilib. Dəqiq rəqəm daha böyük ola bilər. İran əsgərləri, dekabr ayında da 12 qaçaqçını qətlə yetirmişdi. 2009-cu ilin iyul və dekabr ayları aralığında 52 qaçaqçı İran əsgərləri tərəfindən öldürülüb. Digər tərəfdən İran ordusu Qərb ölkələrinin gözləri qarşısında Cənubi Kürdüstan torpaqlarını bombalayır. May ayından bəri İranın top atəşləri üzündən biri uşaq olmaqla 2 vətəndaş həyatını itirib, ən azı 3 adam yaralanıb. Avqustun 13-də yenidən başlayan hücumlar yüzlərlə ailənin köçməsinə gətirib çıxarıb. Şamda yaşayan ailələrdən 520-si Səngəsər bölgəsinə köç edib və kömək gözləyir. Digər bölgələrə edilən hücumlarda zərər görənlərin sayı minlərlə ölçülür». Bizim yol