GünAzTv: Bu cür vəziyyətin yaranmasının səbəblərindən biri də bölgə ölkələrinin Rusiyanın addımlarına reaksiya verməməsidir.

 Rusiyanın xarici işlər naziri Sergey Lavrov dünən Rusiya ilə Ermənistan arasında imzalanan müqaviləyə münasibət bildirərkən maraqlı açıqlama ilə çıxış edib. S.Lavrov bildirib ki, protokol Ermənistanda Rusiya hərbi bazasının olmasına dair razılaşmanın müddətini 49 ilədək uzadır, vəssalam. Rusiyanın hərbi bazasının başlıca məqsədinin isə bu dövlətin mənafelərini təmin etmək olduğunu deyən S.Lavrov vurğulayıb ki, bu mənafelər dairəsinə Cənubi Qafqazda, Xəzər regionunda sabitliyin dəstəklənməsi məsələləri də daxildir.

Maraqlıdır ki, S.Lavrov müqavilədə nəzərdə tutulan digər vacib məqamların üzərindən sükutla keçməyə üstünlük verib. Məsələn, sözügedən müqavilədə Rusiya açıq şəkildə Ermənistanın təhlükəsizliyinə qarant duraraq, hətta bu ölkənin daxilində baş verə biləcək ixtişaşları belə, yatırmaq öhdəliyini öz üzərinə götürür.

Politoloq Vəfa Quluzadə hesab edir ki, S.Lavrovdan başqa cür açıqlama gözləməyə dəyməzdi. Çünki bu diplomat ilk növbədə Rusiyanın maraqlarını müdafiə edən açıqlama ilə çıxış etməliydi. Cənubi Qafqaz regionunda Rusiyanın maraqlarının müdafiəçisi qismində yalnız Ermənistanın çıxış etdiyini deyən Vəfa Quluzadə əlavə etdi ki, Rusiya öz vassalını təhlükə altında qoymamaq üçün onu öz təhlükəsizlik çətiri altına alıb: “Gürcüstan və Azərbaycan Rusiyadan asılı dövlətlər deyil. Onlar Qərbin maraqlarını müdafiə etməklə məşğuldurlar. Amma zəifləmiş və gücdən düşmüş Ermənistanın Rusiyanı dəstəkləməkdən başqa seçimi yoxdur. Çünki marianetka Ermənistan tam şəkildə Rusiyadan asılıdır. Ermənistanla müqavilə imzalamaqla Rusiya yenə də ilk növbədə öz təhlükəsizliyi haqqında düşünür və onu təmin edir”.

Rusiyanın başlıca məqsədinin yenidən Gürcüstan və Azərbaycanı tam təsir dairəsinə qaytarmaq olduğunu deyən Vəfa Quluzadə qeyd etdi ki, bununla da Kreml yenidən regionu tam nəzarəti altına qaytarmağa çalışır. Vəfa Quluzadə vurğuladı ki, bu cür situasiyanın yaranmasında bölgə ölkələrilə yanaşı, Qərbin də müəyyən məsuliyyəti var: “Azərbaycanda bəzən gözləyirlər ki, Rusiya rəsmilərindən hansınınsa xoş sözü bu müqavilənin sərtliyini aşağı sala bilər. Bu, belə deyil. Lavrov bu tip açıqlama verərək Rusiyanın regiona iddialı olduğunu göstərir. Necə yəni, Rusiya Cənubi Qafqazda, Xəzər regionunda sabitliyin dəstəklənməsi məqsədilə bu müqaviləni imzalayıb?! Zorakı və hərbi yolla sabitlik dəstəklənər? Əslində, bu cür şəraitin yaranmasının səbəblərindən biri region və bəzi Qərb ölkələrinin Rusiyanın addımlarına heç bir reaksiya verməməsidir. Rusiya öz imperialist siyasətinə qarşılıq görmədiyi üçün ekspansiyasını artırır”.