İran əfqan qaçqınları ölkədən çıxarır

SON XƏBƏRLƏR

İran əfqan qaçqınları ölkədən çıxarır

2023.06.21, 09:43

Tehranla Taliban hökuməti arasında münasibətlərin yenidən gərginləşməsindən sonra İranda qaçqın həyatı yaşayan əfqanlara təzyiqlər güclənib.

Gunaz.tv

Bu barədə əfqanıstanlı qaçqınlar sosial media kanallarında paylaşım ediblər. Məlumata görə, son bir neçə gün ərzində 2800 əfqan qaçqın İrandan çıxarılıb.

Taliban hökumətinin Mühacirət Nazirliyi də yaydığı bəyanatda bunu təsdiq edib.

Kabil geri qaytarılanların İslamqala sərhəd keçid məntəqəsində İrandan təhvil alındığını bildirib.

Əfqan qaçqınlar bildirib ki, İrandan qovulan qaçqınların bəziləri Taliban hökumətinə müxalif olduqları üçün öldürülə və ya uzun müddətli həbsə məhkum edilə bilər.

Qeyd edək ki, xüsusilə son vaxtlar İran hökumətinin əfqanıstanlı qaçqınlara qarşı qeyri-insani davranışlarını əks etdirən çoxlu sayda video və xəbərlər yayılıb.

İran rəsmiləri bunu təkzib etsə də, qaçqınlara qarşı ədalətsiz və aşağılayıcı hərəkətlər Taliban hakimiyyətinin də etirazına səbəb olub.

Bir müddət əvvəl İran-Əfqanıstan sərhəddində 11 yeniyetmə əfqan öldürülüb.

Ötən bir il ərzində isə İranda öldürülən 470 əfqanıstanlının meyiti vətənə göndərilib.

Bununla yanaşı İranda yaşayan gənc əfqanıstanlıların universitetlərdə təhsil almalarına da məhdudiyyətlər tətbiq edilib.

Cari ilin fevral ayında İranın Elm, Tədqiqat və Texnologiya Nazirliyinin Beynəlxalq Tələbə İşləri üzrə Baş direktoru Cəfər Rəzzaqi universitetlərin tədris işləri üzrə prorektorlarına yazdığı məktubda ali təhsil ocaqlarında əfqanların qeydiyyatının dayandırmalarını tələb edib.

İran hökumətinin qoyduğu yeni qaydalarda deyilir ki, qaçqın tələbələr universitetlərə daxil olmaq üçün Əfqanıstana dönməli, oradan xarici pasport almalı, sonra İrana geri qayıtmalıdırlar.

Timur

GUNAZ.TV

SON XƏBƏRLƏR