DİA-da dövlət qulluqçuları üçün təlim keçirilib

SON XƏBƏRLƏR

DİA-da dövlət qulluqçuları üçün təlim keçirilib

2023.06.22, 13:37

Azərbaycan Respublikasının Prezidenti cənab İlham Əliyev tərəfindən 2023-cü ilin “Heydər Əliyev İli” elan edilməsi ilə əlaqədar DİA-da nəzərdə tutulan tədbirlər planında dövlət qulluqçuları üçün təlimlərin keçirilməsi planlaşdırılıb. Bu məqsədlə Azərbaycan Respublikasının Prezidenti yanında Dövlət İdarəçilik Akademiyası (DİA) yerli İcra Hakimiyyəti orqanlarının əməkdaşları üçün silsilə təlimlər təşkil edir.

Gunaz.tv

20 iyun 2023-cü il tarixində keçirilmiş təlimdə Azərbaycan Respublikasının Prezidenti yanında Dövlət İdarəçilik Akademiyasının “Dövlət qulluğu və kadr siyasəti” kafedrasının müdiri, siyasi elmlər üzrə fəlsəfə doktoru, dosent Rəcəb Rəhimli “Dövlət qulluqçularının xidməti fəaliyyətinin qiymətləndirilməsi” adlı mühazirə ilə çıxış edib.

Dinləyici auditoriyasını Azərbaycan Respublikasının əksər rayon və şəhər İcra Hakimiyyəti Başçılarının müavinləri, İcra Hakimiyyəti aparatının şöbə müdirləri və inzibati vəzifə daşıyan 130 nəfər dövlət qulluqçusu təşkil etmişdir. Dosent Rəcəb Rəhimli təlim iştirakçılarına son illər Azərbaycanda dövlət idarəçilik sistemində və dövlət qulluğu sahəsində həyata keçirilən islahatlardan danışmış, ölkə Prezidenti cənab İlham Əliyevin dövlət idarəçilik sisteminin təkmilləşdirilməsi və dövlət qulluğunun daha çevik və mobil fəaliyyətinin təşkil edilməsi üçün imzaladığı Fərman, Sərəncam, Dövlət Proqramları, Milli Prioritetlər və dövlət qulluğunun inkişafına dair 2019-2025-ci illər üçün Strategiya haqqında məlumat verib.

Məruzədə qeyd edilmişdir ki, Azərbaycan Respublikasının Prezidenti cənab İlham Əliyev tərəfindən 24 noyabr 2020-ci il tarixində “Dövlət qulluğu haqqında” Azərbaycan Respublikasının Qanununda dəyişiklik edilməsi barədə Azərbaycan Respublikasının Qanunu və Qanunun tətbiqi ilə bağlı 26 dekabr 2020-ci il tarixində Fərman imzalanıb.

Dəyişikliklər dövlət qulluqçusunun fəaliyyətinə nəzarətin həyata keçirilməsi, onun potensial imkanlarının aşkara çıxarılması, dövlət qulluqçusunun xidməti fəaliyyətinin qiymətləndirilməsini nəzərdə tutur.

Bundan əlavə dosent Rəcəb Rəhimli təlim iştirakçılarına Nazirlər Kabinetinin 6 aprel 2021-ci il tarixli “Dövlət qulluqçusunun xidməti fəaliyyətinin qiymətləndirilməsi Qaydası”, dövlət qulluqçusunun xidməti fəaliyyətinin qiymətləndirilməsinin beynəlxalq təcrübəsi, qiymətləndirmənin məqsədi, qiymətləndirilməyə hazırlıq, qiymətləndirilmə dövrü, qiymətləndirilmənin nəticəsinə əsasən görüləcək tədbirlər barədə məlumat verib.

Məruzəçi həmçinin ölkədə dövlət aparatının səmərəli fəaliyyət göstərməsi üçün intellektual səviyyəsi və idarəetmə bacarıqları yüksək olan perspektivli rəhbərlərin müəyyən edilməsi məqsədilə keçirilən “Yüksəliş” müsabiqəsi haqqında məlumat verdi, müsabiqədə istifadə edilən çoxpilləli kompleks qiymətləndirilmə nəticəsində savadlı və istedadlı kadrları müəyyən edilərək ölkədə idarəçi kadr ehtiyatı bankının yaradılmasını vurğulayıb.

Dos. Rəcəb Rəhimli dünyada tətbiq edilən yeni trend - dövlət qulluğunda istedadların idarə edilməsi (Talent Management) modeli haqqında dinləyicilərə məlumat verdi, bu modelin tətbiqi üçün dövlət qulluqçuları sırasında əhəmiyyətli potensialın aşkar edilərək inkişaf etdirilməsi, müvafiq mövqelərə yerləşdirilməsindən danışıb.

Bundan başqa təlim zamanı Azərbaycan Respublikasında dövlət qulluğunun inkişafına dair 2019-2025-ci illər üçün Strategiya haqqında məlumat verildi, Strategiyada dövlət qulluğu sisteminin inkişafı məqsədilə institusional quruculuq, kadr siyasəti, dövlət qulluqçularının rotasiyası, dövlət qulluğunda səriştə və mütərəqqi motivasiya modellərinin tətbiqi barədə söhbət açılıb.

Təlimin sonunda dosent Rəcəb Rəhimli Azərbaycan Respublikasının Prezidenti cənab İlham Əliyevin 2021-ci il 2 fevral tarixində imzaladığı “Azərbaycan 2030: sosial-iqtisadi inkişafa dair Milli Prioritetlər”in təsdiq edilməsi haqqında Sərəncamdan danışdı və növbəti onillikdə ölkəmizin qarşısında duran vəzifələrdən: rəqabətli insan kapitalı, müasir innovasiyalar məkanının yaradılması, işğaldan azad olunmuş ərazilərə böyük qayıdışın təşkil edilməsi, təmiz ətraf mühit kimi hədəflərin reallaşdırılmasında dövlət qulluqçuları qarşısında duran mühüm vəzifələri vurğulayıb.

Təlimin yekununda iştirakçıların sualları əhatəli şəkildə cavablandırılıb.

Ayxan