BMT ekspertləri: "İranın məcburi hicab qanun layihəsi cinsi aparteiddir"

SON XƏBƏRLƏR

BMT ekspertləri: "İranın məcburi hicab qanun layihəsi cinsi aparteiddir"

2023.09.02, 13:13

BMT-nin bir sıra insan haqları ekspertləri, o cümlədən bu təşkilatın İranda insan haqları üzrə xüsusi məruzəçisi Cavid Rəhman Tehran hökumətinin məcburi hicab qanun layihəsini tənqid ediblər.

Gunaz.tv

Onlar İranda məcburi hicab qaydalarını pozan vətəndaşlara tətbiq etdiyi cəzalardan narahatlıqlarını ifadə edərək, bunu qadın və qızlara qarşı cinsi aparteid adlandırıb, sistemli ayrı-seçkiliyin bariz nümunəsi hesab ediblər.

Birləşmiş Millətlər Təşkilatının İnsan Haqları üzrə Ali Komissarlığının internet saytında dərc olunan məlumatda bildirilib ki, İran hakimiyyət orqanları sistemli ayrı-seçkilik tətbiq etməklə qadın və qızları sıxışdırmaq, onların hökumətə qarşı müqavimətini qırmaq məqsədini güdürlər.

Ekspertlərin fikrincə, “İffət və Hicab” kimi tanınan qanun layihəsinin təsdiqlənməsi mahiyyət etibarı ilə ayrı-seçkilik xarakteri daşıyır, qadın və qızlara qarşı seksual qısnama üçün əsas yaradır.

Bəyanatın başqa bir hissəsində “İffət və Hicab” qanun layihəsinin İran Konstitusiyasına belə, uyğun olmadığı qeyd olunub.

Bəyanatın sonunda İranın hakimiyyət orqanlarından məcburi hicab qanunlarından imtina etmək, qadınların beynəlxalq hüquq çərçivəsində tanınan hüquq və azadlıqlardan istifadə etmələrinə şərait yaratmaq istənilib.

Timur

GUNAZ.TV

SON XƏBƏRLƏR