Hörmüz bağlandı, Səudiyyə gizli planını işə saldı

SON XƏBƏRLƏR

Hörmüz bağlandı, Səudiyyə gizli planını işə saldı

2026.03.31, 20:01

Səudiyyə alternativ marşruta keçdi.

Gunaz.tv

Gunaz TV-nin məlumatına görə, neft tankerlərinin hədəfə alınması və İran tərəfindən Hörmüz boğazının faktiki bağlanması fonunda Səudiyyə Ərəbistanı alternativ marşrutu aktivləşdirərək neft ixracını maksimum səviyyəyə çatdırıb.

Beynəlxalq mənbələrin, o cümlədən «Bloomberg»-ın məlumatına əsasən, Səudiyyə Ərəbistanı son 24–48 saat ərzində Şərq-Qərb boru xəttindən – «Petroline»dan tam istifadə edərək neft ixracının əsas hissəsini Qırmızı dəniz marşrutu ilə qoruyub saxlayıb.

Məlumatlara görə, təxminən 1200 kilometr uzunluğunda olan bu boru xətti xam nefti Ərəb körfəzinə yaxın şərq yataqlarından birbaşa Qırmızı dəniz sahilində yerləşən Yənbu limanına çatdırır və hazırda onun ötürmə qabiliyyəti gündəlik təxminən 7 milyon barelə çatıb. Məlumatlı mənbələr bildirir ki, son günlər bu xətt maksimum güclə işləyir.

Hesabatlara əsasən, Yənbu limanından xam neft ixracı gündəlik təxminən 4,6–5 milyon barelə çatıb. Bundan əlavə, bu marşrut vasitəsilə gündəlik 700–900 min barel neft məhsulları da ixrac olunur. Bu ixracın 80 faizindən çoxu Asiya bazarlarına yönəlib.

Bu addım İranın son günlərdə gərginliyi artıraraq ticarət tankerlərini hədəfə alması və Hörmüz boğazında hərəkəti faktiki olaraq pozmasından sonra atılıb. Məlumatlarda 30–31 mart tarixlərində BƏƏ yaxınlığında Küveytə məxsus tankerə hücum edildiyi də qeyd olunur.

Eyni mənbələrə görə, Səudiyyə Ərəbistanı fevralın sonlarından etibarən münaqişənin başlaması ilə dərhal fövqəladə planını işə salıb və hazırda ixracın böyük hissəsini alternativ marşrut üzərindən həyata keçirir. Bu boru xətti də onilliklər əvvəl İran-İraq müharibəsi dövründə məhz belə ssenarilər üçün inşa edilib.

Hörmüz boğazında ciddi pozuntuların davam etdiyi və tanker hərəkətinin kəskin azaldığı bir şəraitdə Səudiyyə Ərəbistanı Qırmızı dəniz üzərindən ixracı artıraraq qlobal enerji bazarında əsas təchizatçı rolunu qorumağa çalışır. Bununla belə, bu həcm hələ də Ərəb körfəzi üzərindən əvvəlki ixrac səviyyəsindən aşağı qiymətləndirilir.

Gunaz TV
R.G

GUNAZ.TV

SON XƏBƏRLƏR