İranın cənubunda silahlı toqquşmalar iki gündür davam edir

SON XƏBƏRLƏR

İranın cənubunda silahlı toqquşmalar iki gündür davam edir

2026.09.24, 18:35

Gunaz.tv

Bəluc mənbələrinin yaydığı məlumatlara görə, cümə axşamı, sentyabrın 24-ü səhər saatlarında Səravan şəhərinin Cəhadabad, yerli olaraq “Dəb” adlandırılan ərazisində silahlı toqquşmalar və intensiv atışma davam edib.

Məlumatlara görə, toqquşmalarda RPG də daxil olmaqla ağır silahlardan istifadə olunub və ərazidə hərbi və təhlükəsizlik qüvvələri yerləşdirilib. Eyni zamanda, Səravan şəhəri və ətrafında pilotsuz uçuş aparatlarının uçduğu və internetə çıxışda ciddi problemlərin yarandığı bildirilib.

Bəluc mənbələri Səravanın Razi xəstəxanasının mühasirəyə alındığını və çox sayda yaralı hərbi və təhlükəsizlik qüvvəsi əməkdaşının xəstəxanaya yerləşdirildiyini bildiriblər. Bu məlumatlar hələlik rəsmi şəkildə təsdiqlənməyib.

Bu toqquşma bir gün əvvəl həmin ərazidə hərbi və təhlükəsizlik qüvvələri ilə silahlı bəluc qrupları arasında baş vermiş bir neçə saatlıq qarşıdurmadan sonra baş verib.

Dünənki toqquşmada “Səravan Səccad” əməliyyat bazasının komandiri Hüseyn Zərifi öldürülüb.

Bəluc mənbələri həmçinin bazanın kəşfiyyat üzrə məsul şəxsi Əhməd Hərati Zərətiyin öldürüldüyünü bildiriblər. Lakin bu məlumat hələlik rəsmi mənbələr tərəfindən təsdiqlənməyib.

“Xalq Mübarizləri Cəbhəsi” adlanan qrup dünənki toqquşmaya görə məsuliyyəti öz üzərinə götürüb və dörd üzvünün öldürüldüyünü açıqlayıb.

GünAz TV
R.G

2026.09.24, 10:00

GUNAZ.TV

SON XƏBƏRLƏR