GünAzTv: Moskvada NATO-nun Polşa və Baltiya ölkələrinin Rusiyadan müdafiəsi üzrə mümkün planlara malik olması haqda məlumatlar ciddi suallar doğurur.

Bunu Rusiyanın xarici işlər naziri Sergey Lavrov Wikileaks saytının yaydığı məlumatlara reaksiyasında bildirib.

Sergey Lavrov NATO-nun nə zaman səmimi olmasını ayırd etmək istəyir.

O bildirib ki, ən azı sual yaranır - NATO Moskvayla tərəfkeşliyin inkişaf etdirilməsi haqda razılığa gələndə səmimi idi, yoxsa qapalı rejimdə bir qədər başqa məsələləri həll edəndə. Nazir deyib ki, Rusiya bu sulları artıq verib və onlara cavab gözləyir.

GünAzTv mətbuat mərkəzinin BBC-yə istinadən yaydığı məlumata görə, Belə reaksiyaya səbəb Wikileaks saytında yer almış ABŞ-ın (Amerika Birləşmiş Ştatları) məxvi diplomatik yazışması olub. Burada göstərilir ki, bu il NATO 3 Baltiya ölkəsi və Poşanın Rusiyanın mümkün təcavüzündən müdafiə edilməsi üzrə plan hazırlayıb. Qeyd olunur ki, Eagle Guardian, yəni Qoruyucu qartal adı almış xüsusi plana əsasən, Rusiyanın Estoniya, Latviya və Litvaya təcavüzü təqdirdə bu ölkələrin müdafiəsinə NATO 9 diviziya göndərəcək. Diviziyalar arasında ABŞ, Almaniya, Britaniya və Polşa birləşmələri olmalıdır.

Bu arada NATO-da bildirilir ki, alyans Moskvanı düşmən saymır və o alyans üçün təhlükə deyil. Habelə NATO-da Polşa və Baltiya ölkələrinin Rusiyadan müdafiə olunması üzrə mümkün planın olması məsələsini şərh etməkdən imtina edirlər. Təşkilatın baş katibi Anders Foq Rasmussen bildirib ki, NATO-nun siyasətinə əsasən məxvi məlumatların sızılması şərh olunmur.

Litvanın keçmiş prezidenti, hazırda Avropa parlamentinin deputatı Vitautas Landsberqis öz növbəsində bildirir ki, Baltiya ölkələrinin Rusiyadan müdafiə olunması üzrə planlar doğrudan da mövcuddur:

"NATO-nun Baltiya ölkələrinin müdafiə edilməsi öhdəliyini götürməsi və bunun üçün planlar hazırlaması məlumdur, bu təzə bir şey deyil. Bu Baltiya ölkələrinin özlərini daima müdafiəsiz hiss etməməsi üçün edilir. Rusiya özünün kiçik qonşularıyla heç də etimad yaradan siyasət aparmır", deyir cənab Landsberqis.

Rusiyalı şərhçi Vladimir Yevseyevə görə isə, Moskva Baltiya ölkələrinə heç bir təhlükə yaratmır:

"Baltiya ölkələrinə heç bir real təhlükə yoxdur. Tamamilə aydındır ki, Rusiyanın şimal-qərbdə yerləşən hərbi hissələri qətiyyən fəal hücum əməliyyatları üçün nəzərdə tutulmayıb. Ona görə də Rusiyanın Baltiya ölkələrinə hücuma hazırlaşmasını söyləmək tamamilə əsassızdır. Eyni zamanda onu da nəzərə almaq lazımdır ki, NATO-da hər hansı bir hərbi münaqişə baş verməsi təqdirdə necə hərəkət edilməsi haqda planlara malik ola bilərlər", deyir cənab Yevseyev.

Mətbuata görə, Moskvanı qıcıqlandıran habelə son məlumatların sızdırılması vaxtıdır. Gürcüstanla müharibədən sonra NATO ilə münasibətləri xeyli gərginləşən Moskvanın hazırda alyansla münasibətləri nisbətən istiləşməkdədir. NATO-nun son Lissabon sammitində alyansla Moskvanın birgə müdafiə layihələri üzərində işləyəcəyi bəyan edilmişdi. Wikileaks-dəki məlumatlar məhs bu fonda üzə çıxıb.