GünAzTv mətbuat mərkəzinin növbəti müsahibi Azərbaycan-Belçika Dostluq Cəmiyyətinin sədri, tanınmış diasporçu Ayhan Dəmirçidir.

Türkiyənin Belçikadakı sabiq səfiri Tamer İskıt “taraf” qəzetinə açıqlamasında bildirib ki, Azərbaycan dünyada ən yüksək səviyyədə türklərə etibar etmədiyini açıqlayan yeganə dövlətdir. Fikirlərini davam etdirən sabiq diplomat Türkiyə Ermənistanla əlaqələrin normallaşması prosesini Azərbaycana görə dayandırsa da, əslində "Wikileaks"in yaydığı sənədlərdən belə aydın olub ki, azərbaycanlılar Türkiyəyə qarşı heç də dost münasibət bəsləməyiblər: "Həm hökumət, həm də Türkiyə XİN-i bu məsələdə kursu yaxşı bilir. Mən 2-3 il BTC məsələsi ilə bağlı danışıqlar prosesində iştirak etmişəm. Deməliyəm ki, Azərbaycan ölkə olaraq hər zaman bizə etimadsız yanaşıb, daha az dostluq münasibəti bəsləyib, həmişə də bizə qarşı ikiüzlü siyasət yürüdüb - üzümüzə gülüb, amma gözümüzün içinə baxa-baxa vəd etdiyi dəstəyi göstərməyib". Sabiq səfirin fikirləri ilə bağlı məlumat almaq üçün Azərbaycan-Belçika Dostluq Cəmiyyətinin sədri, tanınmış diasporçu Ayhan Dəmirçi ilə söhbətləşdik.

-Ayhan bəy, sabiq diplomatın belə bir açıqlama verməsi arxasında hansı amillər dayanır?

-Mən şəxsən Tamer İskıtın fikirlərinə qatılmıram və belə açıqlamalar güclənməkdə olan Türkiyə-Azərbaycan münasibətlərinin korlanmasına xidmət edir. Hazırda Azərbaycan və Türkiyəni çoğrafi əlaqələrlə yanaşı, mənəvi-iqtisadi və siyasi amillər bağlayır və əlaqələr elə formada inkişaf edir ki, bunun qarşısını almaq mümkün deyil. Bu gün xaricdə Azərbaycan-türk diaspor qurumlarının birgə inteqrasiyasına prosesi gedir. İndi də belə məsuliyyətsiz fikirlərin ortaya atılması birlik yolunda atılan addımlara zərər verə bilər. “Wikileaks” saytından nəsə yazılıbsa onu əlində bayraq edib, Azərbaycanın üzərinə gəlmək düzgün deyil. Ortada bir reallıq var ki, bu gün müəyyən güclər türk birliyinin yaranmasından qorxurlar. Müxtəlif yollarla birliyin qarşısını almaq istəyirlər. Hansısa bir məsələ ortaya çıxan kimi, Azərbaycan-Türkiyə münasibətlərini baltalamağa çalışırlar. Biz bunlara qarşı olmalıyıq.

Bölgədə ciddi oyunlar gedir və Ermənistan-Azərbaycan Qarabağ münaqişəsi öz həllini tapmır və Azərbaycanı müəyyən şərtlər daxilində sülhə imza atdırmağa çalışırlar. Azərbaycanın öz mövqeyində israrla dayanması, bu da Ermənistanın arxasında duran bəzi qüvvələri narahat etməyə bilməz. Bu qüvvələrin əsas siyasəti, məqsədi Türkiyəni Azərbaycandan uzaq tutmağa çalışırlar. Eyni zamanda, Azərbaycanı bölgədə təkləmək siyasəti aparılır. Fikir verirsinizsə, Azərbaycan-Türkiyə münasibətləri yüksələn xətlə inkişaf etdikcə, hansısa qüvvələr qara planlarını işə salırlar. Təəssüf ki, həmin qüvvələrə hər iki ölkədən də dəstək verənlər tapılır. Bu məsələlərdə çox ayıq olmaq lazımdır və birgə addım atmalıyıq. Yoxsa, yenə də ciddi və təhlükəli proseslərin içinə düşə bilərik.

-Azərbaycan-Türkiyə münasibətləri tarixində ilk dəfə olaraq hər iki ölkə arasında əlaqələr strateji əməkdaşlıq şurası çərçivəsində qurulmağa başlanılıb. Sizə elə gəlmir ki, belə açıqlamaların arxasında bu amil durur?

-Sizin fikirlərinizlə tamamilə razıyam. Yuxarıda bildirdiyim fikirlərin bir daha üstünə gələrək qeyd etmək istərdim ki, Türkiyə-Azərbaycan münasibətlərinin strateji çərçivəyə keçməsi belə qüvvələri rahat edir. Onlar da öz əllərində olan imkanlarla iki qardaş ölkə arasında münasibətləri korlamağa çalışırlar.

-Belə situasiyalarda hansı addımları atmalıyıq ki, bir müddət bundan öncə iki qardaş ölkə arasında yaşanan durum bir daha təkrarlanmasın?

-İnanıram ki, bir də belə vəziyyət yaşanmayacaq. Bu çirkin oyunlar ciddi planlar əsasında hazırlanır və ustalıqla da həyata keçirilir. Hər iki ölkənin siyasətçilərindən çox şey aslıdır. Onların açıqlamaları cəmiyyətə təsir edir və ictimai düşüncənin formalaşmasında mühüm rol oynayır. Media belə məsələlərdə həssas olmalıdır. Birliyi pozacaq fikirlərə yer verməməlidir. Planla və sistemli hərəkətlə yola davam etmək lazımdır.

Söhbətləşdi: Elnur Eltürk