GünAzTv Amerika dövlət katibinin köməkçisi Filip Qordon Vaşinqtonun Moskvanın səylərini dəstəklədiyini bildirir; “WikiLeaks”ın yaydığı sənəddən isə məlum olur ki, Fransa erməni lobbisindən çəkinir.

ABŞ (Amerika Birləşmiş Ştatları) dövlət katibinin Avropa və Avrasiya məsələləri üzrə müavini Filip Qordon ötən həftə Astanada baş tutan ATƏT-in zirvə toplantısının nəticələrini Vaşinqtondakı brifinqdə jurnalistlərə şərh edib. Diplomat münaqişə tərəfləri və ATƏT-in Minsk Qrupu həmsədrlərinin birgə bəyanatını müsbət addım kimi qiymətləndirib.

Diplomat bildirib ki, Birləşmiş Ştatlar sülh danışıqlarının gedişinin sürətindən, prosesdəki mövcud boşluqlardan və son zamanlar atəşkəs xəttində baş verən pozuntulardan narahatdır: “Bu, təhlükəli vəziyyətdir. Məhz bu səbəbdən biz bütün ATƏT-in üzv dövlətləri tərəfindən vurğulanan Helsinki prinsipləri əsasında irəliləyişin əldə edilməsi üzərində intensiv iş aparırıq”.Dövlət katibinin müavini son zamanlar Rusiyanın vasitəçi kimi artan rolu, Birləşmiş Ştatların isə bu mənada passivliyi fikirləri ilə razılaşmayaraq deyib ki, Rusiya münaqişədə rolunu fəallaşdırsa da ABŞ, Rusiya kimi, münaqişənin Minsk Qrupu tərəfindən razılaşdırılan Əsas Prinsiplər üzərində həll olunmasını görmək istəyir. O əlavə edib ki, özü və həmkarları münaqişə tərəfləri ilə yaxın təmasdadır: “Bu ilin iyulunda Azərbaycana və Ermənistana səfər edən dövlət katibi Hillari Klinton da məsələ ilə bağlı mütəmadi məlumatlar alır, vəziyyəti yaxından izləyir, prezidentlərlə  daim əlaqədədir. ABŞ münaqişənin həllinə verdiyi əhəmiyyətə görə prosesdə yaxından iştirak edəcəkdir”.Qarabağ münaqişəsinin nizamlanması prosesi Brüsseldə Avropa İttifaqının (Aİ) “Şərq tərəfdaşlığı” təşəbbüsü çərçivəsində Azərbaycan və Ermənistan rəsmiləri ilə aparılan danışıqlarda da müzakirə olunub. Bu müzakirələrdə Azərbaycanı xarici işlər nazirinin müavini Mahmud Məmmədquliyev, Ermənistanı isə xarici işlər naziri Edvard Nalbəndyan təmsil edib. Aİ isə müzakirələrə 2011-ci ilin birinci yarısında rotasiya ilə əlaqədar bu quruma sədrliyi həyata keçirəcək Macarıstanın xarici işlər üzrə dövlət naziri Zsolt Nemets və  qonşuluq siyasəti üzrə Avropa komissarı Ştefan Füle qatılıblar. İclasdan öncə Macarıstanın xarici işlər nazirinin müavini Zsolt Nemets, genişlənmə və qonşuluq siyasəti üzrə Avropa komissarı Ştefan Füle və üç Cənubi Qafqaz ölkəsinin nümayəndə heyətləri başçılarının birgə işçi nahar yeməyi təşkil edilib. Nahar yeməyi zamanı Aİ ilə Cənubi Qafqaz ölkələri arasında münasibətlərin indiki vəziyyəti və inkişaf perspektivləri, Şərq Tərəfdaşlığı Təşəbbüsü çərçivəsində əməkdaşlıq, xüsusilə də Aİ ilə assosiasiya sazişləri üzrə danışıqlar prosesi, habelə Cənubi Qafqaz regionunda mövcud münaqişələrin nizamlanması ətrafında fikir mübadiləsi aparılıb.Sonra Aİ-Azərbaycan Əməkdaşlıq Şurasının 11-ci iclası başlayıb. İclasın gündəliyində əsasən Aİ-Azərbaycan Fəaliyyət Planının həyata keçirilməsi, Şərq Tərəfdaşlığı təşəbbüsü, Ermənistan-Azərbaycan münaqişəsinin nizamlanması prosesi, Aİ ilə Azərbaycan arasında enerji və nəqliyyat sahələri üzrə əməkdaşlıq məsələləri öz əksini tapıb. İclasda Aİ-Azərbaycan münasibətlərinin, Fəaliyyət Planında göstərildiyi kimi, ölkələrin ərazi bütövlüyü və dövlət suverenliyinə hörmət əsasında aparılmasının vacibliyi xüsusən vurğulanıb. Ermənistan-Azərbaycan münaqişəsinin nizamlanmasına dair danışıqların son durumu müzakirə olunub (ANS).M.Məmmədquliyev müzakirələr barədə açıqlama verərkən deyib ki, rəsmi Bakı Dağlıq Qarabağ münaqişəsinin həllində Avropa İttifaqının da yardımına ümid edir. “Biz hesab edirik ki, Avropa İttifaqının dünyada ən böyük güc mərkəzi kimi bu problemin həll olunmasına yardım etmək imkanı var. Biz inanırıq ki, Avropa İttifaqının, beynəlxalq ictimaiyyətin dəstəyi ilə Dağlıq Qarabağ münaqişəsi beynəlxalq hüquq prinsiplərinə uyğun şəkildə həll olunacaq” - deyə M. Məmmədquliyev vurğulayıb.Bu arada "WikiLeaks" saytı tərəfindən yayılan ABŞ məxfi sənədlərindən də Qarabağ danışıqlarının dalana dirəndiyi təsdiqlənir. ABŞ-ın Parisdəki səfirliyinin siyasi məsələlər üzrə müşaviri Endryu R.Yanqın 2010-cu il 22 fevral tarixli teleqramına əsasən, Fransa hesab edir ki, Ermənistan-Azərbaycan, Dağlıq Qarabağ münaqişəsi üzrə danışıqlar dalana dirənib. Sənəddə Fransa Xarici İşlər Nazirliyinin Şərqi Avropa şöbəsinin rəhbəri Rolan Qalaraqanın ABŞ-ın müdafiə nazirinin beynəlxalq təhlükəsizlik üzrə müavini Aleksandr Verşbou və ABŞ dövlət katibinin Avrasiya regionu üzrə köməkçisi Spenser Boyerlə şəxsi görüşünün təfərrüatlarından sitat gətirilir. Söhbət zamanı R.Qalaraqa ehtimal edir ki, Dağlıq Qarabağ üzrə danışıqlar dalana dirənib və “ATƏT-in Minsk Qrupu hərəkət etmir”.O bildirib ki, “hazırda Fransa hakimiyyətinin ermənilərə təzyiq göstərmək imkanları yoxdur, çünki erməni mənşəli fransızlar təqribən 500 min səsə sahibdirlər, Fransada isə regional seçkilər martda baş tutmalıdır”.R.Qalaraqanın fikrincə, Qafqaz regionuna tezliklə təsir göstərə biləcək digər amillər isə İrandakı qeyri-sabitlikdir. “Azərbaycan, Ermənistan və Türkmənistan İranla ticarət və enerji əlaqələri məsələlərində mühüm rol oynayır və onlar İrana qarşı hazırda ABŞ Konqresində nəzərdən keçirilən qadağalardan bilavasitə əziyyət çəkə bilərlər. Eyni zamanda BMT-də daha sərt qadağaların qoyulmasına göstərilən səylər bu üç ölkə ilə onların İrana yanaşması ilə bağlı gələcək qarşılıqlı fəaliyyət üçün imkan yarada bilər” - deyə R.Qalaraqaya istinadən bildirilir. Yeni musavat