GünAzTv: NATO təlimlərindən dolayı Ermənistanla-Türkiyə arasında sərhədlərin müvəqqəti olaraq açılması məsələsi gündəmi yenidən qarışdırıb.

Xatırladaq ki, Türkiyə rəsmiləri indiyədək bəyan ediblər ki, Ermənistanın işğal etdiyi torpaqlardan çəkilməyincə, sərhədlər açılmayacaq. Bu mesajlar Azərbaycan tərəfi nisbətən sakitləşdirmişdi. Lakin məsələ yenidən gündəmə gəldiyindən, narahatlıqlar da təzədən artıb.

“Bir müddət öncə, Ermənistanla Türkiyə arasında sərhədlərin açılması gündəmə gəldi, bu məsələyə dair İsveçrədə protokol da imzalandı. Amma Türkiyə və Azərbaycan ictimaiyyətinin, qeyri-hökumət təşkilatlarının, eləcə də siyasi partiyaların məsələ ilə bağlı ortaya qoyduqları sərt təpki nəticəsində AKP geri addım atmaq məcburiyyətində qaldı”.Bu fikirləri “Yeni Müsavat”a açıqlamasında MHP-li millət vəkili Atilla Kaya söylədi. A.Kaya bildirdi ki, protokolların imzalanması AKP iqtidarının iç niyyətini ortaya qoydu: “Sərt təpkilər olmasydı, Ərdoğan hökuməti sərhədləri açacaqdı. Əlbəttə ki, bu məsələ yenidən gündəmə gəldi. Sərhədlərin açılması üçün işlər görülməyə başlandı. NATO təlimlərindən dolayı sərhədlərin açılacağı dilə gətirildi. Bildiyimiz kimi, təlimlərin həyata keçiriləcəyi yerlə bu qapılar bir-birindən xeyli uzaqdı. Deyirlər ki, sərhədlər Vandakı Axtamar erməni kilsəsində həyata keçiriləcək ayindən əvvəl açıla bilər. NATO təlimlərindən dolayı sərhədlərin açılması adı ilə həm Türkiyə, həm də Azərbaycan ictimaiyyətini bu məsələyə alışdırmaq istəyirlər. AKP iqtidarından hər şey gözləmək olar. Onlar hər şey edə bilərlər”.A.Kayanın sözlərinə görə, türk millətinin kiminlə problemi varsa, AKP iqtidarı onların tərəfindədir: “MHP olaraq bunu qəbul etmək mümkün deyil. Sərhədlərin açılması məsələsi gündəmə gəlsə, hər cür təpkimizi ortaya qoyacağıq”.CHP-li millət vəkili Canan Arıtman isə bunları söylədi: “CHP hər zaman eyni fikri söyləyir. Bizim liderimiz Atatürk deyib ki, Azərbaycanın sevinci sevincimiz, kədəri kədərimizdir. Bu heç zaman dəyişməyəcək. Biz bir millət iki dövlətik. Azərbaycana hər zaman dəstək verdik. Bundan sonra da lazım olan dəstəyi verəcəyik. Türkiyə ilə Ermənistan arasında sərhədin bağlanması səbəbi aradan qaldırılmadığı müddətdə sərhədlər açıla bilməz. O sərhədlər Ermənistan Azərbaycan torpaqlarının 20 faizini işğal etdiyinə görə bağlanıb. Bir milyona yaxın məcburi köçkün qayıdıb torpaqlarına yerləşmədiyi müddətdə sərhədlərin açılmasına CHP olaraq icazə vermərik. Türk milləti də bu fikirdədir. Səbəblər ortadan qalxmayana qədər kimsə sərhədləri açmağa cəsarət edə bilməz. Bunu edəni türk milləti cəzalandırar”.C.Arıtman bildridi ki, AKP Türkiyə ilə Ermənistan arasında sərhədlərin açılmasına dair bağlanan müqaviləni Türkiyə Böyük Millət Məclisinə çıxara bilməyəcək: “Buna ürək eləməzlər. Kimsə türk millətini aldatmağa belə cəhd edə bilməz. Sərhədlər heç bir saatlığına belə açıla bilməz. Erməni tərəfi Dağlıq Qarabağda və ətraf rayonlarda işğala son qoyacaqlarına dair bir söz deməyib. AKP iqtidarı yalnız 70 milyonluq türkü əzib keçəndən sonra sərhədləri aça bilər”. musavat