GünAzTv: İranda həbsdə olmuş azərbaycanlı alim Rəşid Əliyev bu ölkənin “Sazan Elektronics İndustry” şirkətindən məhkəməyə şikayət edəcək. Bunu İranda həbsdə olmuş azərbaycanlı alim Rəşid Əliyev dünən “Trend”də keçirdiyi mətbuat konfransında deyib.

Tədbiri giriş sözü ilə açan Rəşid Əliyevin Hüquqlarının Müdafiəsi Komitəsinin sədri, “Lazer” Elmi Texniki Mərkəzin direktoru Soltanhəmid Məlikov bu günə qədər alimin müdafiəsi ilə bağlı görülən işlər barədə məlumat verib. Çıxışçı R.Əliyevin İrana getməsinə toxunaraq bildirib ki, buna səbəb onun ağır maddi durumu olub: “Alimin iqtisadi vəziyyəti ağır olduğundan iki yolu vardı. Ya burda qalıb dükan açmalı, ya da getməli idi”.

S.Məlikov həmçinin bu günə qədər R.Əliyevin müdafiəsi üçün 70 məktub göndərildiyini, yerli və xarici mətbu orqanlarda 100-ə qədər məqalə dərc olunduğunu, habelə İranın Azərbaycandakı səfirliyi önündə piketlər keçirildiyini xatırladıb. R.Əliyev isə həbsinin ilk 50 günündə 2 kvadratmetrlik qaranlıq qəbir kimi otaqda saxlandığını dedi. Maddi durumunun ağırlığına görə İrandan gələn iş təklifini qəbul etdiyini deyən alim orada bir çox işlərə sıfırdan başladığını dedi. “19 gündür həbsdən evə buraxılmışam, səhhətimlə bağlı ciddi problem var. Özümə gələn kimi ”Sazan Elektronics İndustry" şirkətini məhkəməyə verməyi düşünürəm" deyə R.Əliyev bildirib. Alim İran şirkəti ilə gizli layihələr həyata keçirmək haqqında müqavilə imzalamadığını da deyib: “Biz ilk öncə, mülki lazer texnologiyası istehsal edirdik. İstehsal etdiyimiz lazer texnologiyaları uğurlu satılırdı”. R.Əliyev İranda laboratoriya yaratdığını da bildirib. Onun sözlərinə görə, İranda işləməyə təklif almamışdan qabaq ora Rusiya, Gürcüstan və Ermənistandan mütəxəssislər dəvət olunubmuş: “Laboratoriyada mülki lazer texnologiyasının yaradılması ilə məşğul idim. Bu texnologiyalar kosmik sənayedə də istifadə olunur. Sonradan hərbçilərlə işləmək təklif olundu. İmtina elədim. Çünki xarici dövlətin vətəndaşı idim. Bu mənim üçün problem ola bilərdi. Həm də hərbçilərlə işləmək xeyr gətirmirdi. Çünki onlar 1 manat verib, 100 manat ziyana sala bilərdilər. Mən tutulandan sonra laboratoriyanın işi dayandı. Şirkət çox istədi ki, girov qoyub, məni azad eləsin”. O əlavə edib ki, həbsdə olduğu müddətdə 4-5 dəfə həbsxananı dəyişiblər. “Çünki hansı həbsxanaya aparırdılar, azərbaycanlı qüvvələr ətrafıma toplanırdı, mənə hörmət edir, ölkədə baş verən xəbərləri çatdırırdılar. Onlar bundan qorxub, mənim yerimi tez-tez dəyişirdilər” deyə, alim qeyd edib. Alim həbsdə olduğu vaxt müstəntiqin ona vəkil tutmağa icazə vermədiyini də söyləyib: “Özüm özümü müdafiə edirdim. Lakin Azərbaycanda hüquqlarımı müdafiə edən komitə yaradılmışdı. Zindanda olduğum vaxt qorxmurdum. Çünki mənim zindan təcrübəm var idi. Məni orada Azərbaycana elmi sirləri aparmaqda ittiham edirdilər. Orada siyasi dustaqlar mənə edam olunacağımı deyirdilər. Tez-tez yerimi dəyişirdilər. Çünki hara gedirdimsə, azərbaycançı qüvvələr ətrafıma toplaşırdı”. İranda elm və sənayenin aşağı səviyyədə olduğuna diqqət çəkən R.Əliyevin sözlərinə görə, 34 il öncə dünya elminə bəlli olan hadisələr İranda fövqəladə bir hadisə, casusluq kimi qəbul olunurdu: “Orda kimsə BBC-yə müsahibə verəndə onu casus kimi tuturlar. Mən onlara deyirdim ki, siz məni Ştirlis eləmisiniz". R.Əliyev həmçinin İrandan baxanda Azərbaycanın cənnət kimi göründüyünü də deyib.R.Əliyev bildirib ki, həbsdə olduğu vaxt Azərbaycanın İrandakı keçmiş səfirinə öz iradlarını da çatdırıb. Çıxışçı səfirə dövlətlərarası əlaqələrin zəif olduğunu deyərək, bu sayaq situasiyada dövlətin mexanizminin işə düşməməsini qabardıb. Tədbirdə çıxış edən deputat Sabir Rüstəmxanlı isə bildirib ki, bu olay İranın iç üzünü açıb. Onun sözlərinə görə, 35 milyon soydaşımız illərdir ki, orda həbsdədir.S.Məlikov isə sonda bildirdi ki, alimin hüquqlarını müdafiə məqsədilə yaradılmış komitə indi öz fəaliyyətini Milli Barışıq və Təşəbbüs İctimai Birliyi kimi davam etdirəcək. Onun sözlərinə görə, komitənin fəaliyyəti alimlərin ölkənin həyatında rolunun artırılmasına yönələcək. Xatırladaq ki, R.Əliyev İran məhkəməsinin hökmü ilə saxta ittihamlarla, özünün iştirakı olmadan 3 il müddətinə azadlıqdan məhrum edilib. 1 il 10 ay həbsdən sonra avqustun 11-də azadlığa buraxılıb.