GünAz TV: Qurultayın sonunda Birliyin Mərkəzi Şurası formalaşdırılıb, sədri seçilib.

Dünən Bakıda Dünya Azərbaycanlı Gənclər Birliyinin təsis qurultayı keçirilib. Xaricdə yaşayan azərbaycanlı gənclər tərəfindən təsis edilən və respublikada (cümhuriyyət) fəaliyyət göstərən gənclər təşkilatlarının təmsilçilərindən, həmçinin Azərbaycan diaspor təşkilatlarının rəhbərlərindən ibarət 500-dək nümayəndənin iştirak etdiyi qurultayda qətnamə qəbul edilib, eləcə də beynəlxalq təşkilatlara müraciət olunub.

Qurultay Dünya Azərbaycanlı Gənclər Birliyinin fəaliyyətinə dair filmin nümayişi ilə başlayıb. Azərbaycan Gənclər Təşkilatları Milli Şurasının sədri Fuad Muradov qurultayın əhəmiyyəti barədə məlumat verərək bildirib ki, gənclərin vahid qurum halında fəaliyyəti ölkənin ümumilli məsələləri, o cümlədən, Dağlıq Qarabağ münaqişəsi barədə həqiqətlərin dünyaya çatdırılmasında mühüm rol oynayacaq: "Azərbaycan gəncliyi müasir informasiya kommunikasiyalarından (irtibatat) geniş istifadə edərək Dağlıq Qarabağ haqqında həqiqətləri dünya ictimaiyyətinə çatdırmağa çalışır, hansı ölkədə yaşamasından asılı olmayaraq öz ölkəsinin tarixi, mədəniyyəti haqqında kifayət qədər məlumatlıdırlar."

Prezidenti Administrasiyası (nəhade riyasəte cümhuri) ictimai-siyasi məsələlər şöbəsinin müdiri Əli Həsənov dövlət başçısı İlham Əliyevin qurultay iştirakçılarına təbrik məktubunu oxuyub. Məktubda bildirilir ki, Azərbaycanın gələcəyi gənclərin təhsilindən, yeniliyi tətbiq etmək bacarığından, vətənpərvərliyi və milli-mənəvi dəyərlərə sədaqətindən asılıdır.

Rusiya Dövlət Dumasının sədri Sergey Narışkinin qurultay iştirakçılarına məktubunu isə Dumanın əməkdaşı Ramin Qasımov təqdim edib.

Tədbirdə məruzə ilə çıxış edən Prezidenti Administrasiyası İctimai-siyasi məsələlər şöbəsinin müdiri Əli Həsənov bildirib ki, Azərbaycandakı gənclərlə xarici ölkələrdəki azərbaycanlı gənclər bir-biri ilə əlaqəli şəkildə işləməlidir. O həmçinin, Azərbaycan gənclərini yaşadıqları, təhsil aldıqları ölkələrdə fəal olmağa çağırıb.

"Prezident İlham Əliyev və onun bütün komandası (timi) gənclərə güvənir və onların perspektivlərilə (çeşməndaz) bağlı əlindən gələni etməyə hazırdır "-deyən Əli Həsənov hesab edir ki, bu gün nəinki Azərbaycanda, hətta dünyada dövlətçiliyimizin maraqları uğrunda aparılan işlərin ağırlığına öz çiyinlərini verən gənclik formalaşıb. Eyni zamanda dünya ölkələrində dövlətimizi intellekti, bacarıqları ilə layiqincə təmsil etmək bacarığında olan gənclər ordusu yaranıb. Qeyd olunub ki, Dialoq və Əməkdaşlıq uğrunda İslam Konfransı Gənclər Forumunun mədəniyyətlərarası dialoq üzrə baş əlaqələndiricisi Leyla Əliyevanın təşəbbüsü ilə başlanmış “Xocalıya ədalət” kampaniyası çərçivəsində görülən işlər digər gənclərə də nümunə olmalıdır. Forumunun baş katibi Elşad İsgəndərov bildirib ki, qurultay azərbaycanlı gənclərin diaspor fəaliyyətinə cəlb olunması baxımından mühüm hadisədir.

Qurultayda çıxış edən digər gənclər təşkilatları rəhbərlərinin fikrincə, əsas məqsəd Azərbaycanı beynəlxalq arenada (ərsə, səhnə) tanıtmaq, dünya ictimaiyyətinin diqqətini ölkəmizin ərazilərinin işğalı faktına (gərçək) yönəltməkdir. Qurultayda qəbul edilən qətnamədə bildirilir ki, iştirakçılar gənclərə dövlət qayğısının artırılması, gənc nəslin vətənpərvərlik ruhunda tərbiyə və intellektual potensialının inkişafı istiqamətində həyata keçirilən tədbirləri təqdir edir, dünya birliyini Dağlıq Qarabağ münaqişəsinin ədalətli həlli üçün öz səylərini səfərbər etməyə çağırır. Dünya Azərbaycanlı Gənclər Birliyinin Dağlıq Qarabağ münaqişəsilə bağlı beynəlxalq gənclər təşkilatlarına müraciətində isə qeyd olunur ki, yalnız dünya birliyinin ədalətli və prinsipial (əsli)  mövqeyi Cənubi Qafqazın təhlükəsiz gələcəyinin açarıdır.

Qurultayın sonunda Birliyin 39 nəfərlik Mərkəzi Şurası formalaşdırılıb, Ramil Məmmədov qurumun sədri seçilib. N.S