Güney Azərbaycanda fermerlərin zəhmətinin qazancını vasitəçilər götürür

SON XƏBƏRLƏR

Güney Azərbaycanda fermerlərin zəhmətinin qazancını vasitəçilər götürür

2026.09.26, 18:34

Gunaz.tv

Ürmiyədə bağlardan fermerlərdən təxminən 40-50 min tümənə alınan üzüm Tehranın bazarlarında 150-200 min tümənə, Ürmiyənin bəzi bahalı məhəllələrində isə 120 min tümənə qədər satılır.

Bu qiymət fərqi fermerlərin məhsulun real dəyərindən əldə etdiyi pay və satış zəncirində vasitəçilərin qazancı ilə bağlı ciddi suallar yaradır.

Ürmiyəli fermerlər üzüm bağlarının becərilməsi, bir neçə dəfə dərmanlanması, suvarılması və digər istehsal xərcləri üçün böyük vəsait sərf edirlər. Lakin məhsulun bağdan alış qiyməti ilə son satış qiyməti arasındakı böyük fərq fermerlərin qazancını əhəmiyyətli dərəcədə azaldır.

Qərbi Azərbaycan Güney Azərbaycanın mühüm kənd təsərrüfatı mərkəzlərindən biridir və bölgədə hər il böyük həcmdə kənd təsərrüfatı məhsulları istehsal olunur. Lakin alış və satış mexanizmi dəyişdirilmədiyi təqdirdə, məhsulun son qiymətindən ən az payı yenə fermerlərin alacağı bildirilir.

Bu problem yalnız üzümlə məhdudlaşmır. Alma yığım mövsümünün yaxınlaşması ilə bölgə fermerləri eyni qiymət fərqinin alma məhsulunda da təkrarlanacağından və vasitəçilərin qazancının artacağından narahatdırlar.

GünAz TV
R.G

GUNAZ.TV

SON XƏBƏRLƏR