GünAz TV: Bakı şəhərindəki “Gülüstan” Sarayında Dünya Azərbaycanlı Gənclər Birliyinin təsis qurultayı başlayıb.

Qurultay iştirakçıları əvvəlc Fəxri Xiyabanda Heydər Əliyevin abidə kompleksini və Şəhidlər Xiyabanını ziyarət ediblər. Qurultayın rəsmi açılış mərasimi Azərbaycanın Dövlət Himninin səsləndirilməsi ilə başlayıb. Tədbirdə xaricdə yaşayan azərbaycanlı gənclər tərəfindən təsis edilmiş təşkilatların nümayəndələrindən, respublikada (cümhuriyyət) fəaliyyət göstərən gənclər təşkilatlarının təmsilçilərindən, dünyanın nüfuzlu ali təhsil müəssisələrində təhsil alan fəal azərbaycanlı gənclərdən, həmçinin Azərbaycan diaspor təşkilatlarının rəhbərlərindən ibarət 500-dək nümayəndə və qonaq iştirak edir. Qurultay çərçivəsində 3 panel üzrə müzakirələr keçiriləcək. Birinci paneldə “Xaricdə yaşayan azərbaycanlı gənclərin təşkilatlanması və cəmiyyətə inteqrasiyası (idğam) mədəniyyətlərarası dialoqun vacib elementlərindən (ünsürlərindən) biri kimi” mövzusu ətrafında məruzələr ediləcək və müzakirələr aparılacaq. İkinci panelin mövzusu “Azərbaycan lobbi quruculuğu: müasir dünyanın reallıqları və tarixi təcrübə gənclərin baxış bucağında”, üçüncü panelin mövzusu isə “Azərbaycan həqiqətlərinin dünya ictimaiyyətinə çatdırılmasında yeni təbliğat üsullarından istifadə və müasir informasiya texnologiyalarının tətbiqi” olacaq.

Panellər üzrə müzakirələr tamamlandıqdan sonra qurultay sənədlərinin müzakirəsinə başlanacaq. Dünya Azərbaycanlı Gənclər Birliyinin təsis qurultayında Prezident Administrasiyasının (PA) İctimai-siyasi məsələlər şöbəsinin müdiri Əli Həsənov, PA-nın digər şöbə müdiri Elnur Aslanov, gənclər və idman naziri Azad Rəhimov, Diasporla İş üzrə Dövlət Komitəsinin sədri Nazim İbrahimovdan ibarət Rəyasət Heyəti formalaşıb. Prezident Administrasiyası İctimai-siyasi məsələlər şöbəsinin müdiri Əli Həsənov Azərbaycan Prezidenti İlham Əliyevin təsis qurultayına ünvanladığı təbrik məktubunu oxuyub. Məktubda deyilir ki, Azərbaycanın gələcəyi gənclərin təhsilindən, yeniliyi tətbiq etmək bacarığından, vətənpərvərliyi və milli-mənəvi dəyərlərə sədaqətindən asılıdır: “Odur ki, gənclərin hərtərəfli inkişafı, sosial problemlərinin həlli və cəmiyyətdə layiqli yer tutması üçün əlverişli şəraitin yaradılması dövlət siyasətinin başlıca istiqamətlərindəndir. İnanıram ki, bu mötəbər tədbirin keçirildiyi gün Azərbaycan gənclər hərəkatının tarixinə əlamətdar hadisə kimi daxil olacaq”.

“Bu gün təsis qurultayı keçirilən Dünya Azərbaycanlı Gənclər Birliyi çərçivəsində müxtəlif təşəbbüslərin həyata keçirilməsi, gələcəkdə müxtəlif layihələrə imza atılması Azərbaycan diasporunun güclənməsinə xidmət edəcək. Nəticədə Azərbaycan həqiqətlərinin, ələlxüsus da Dağlıq Qarabağ münaqişəsi barədə düzgün məlumatları müxtəlif dairələrə, müxtəlif ölkələrə, dünya birliyinə çatdırmağa imkan verəcək”. Bunu isə Prezident Administrasiyası (PA) siyasi təhlil və informasiya təminatı şöbəsinin müdiri Elnur Aslanov jurnalistlərə açıqlamasında deyib. E. Aslanov Azərbaycan diasporunun fəaliyyətinin daim gücləndiyini vurğulayıb: “Azərbaycan dövləti gücləndikcə dünyanın müxtəlif ölkələrində fəaliyyət göstərən diaspor təşkilatları daha sərbəst, daha intensiv fəaliyyət göstərə bilir”.

Sonra tədbirdə Gənclər Təşkilatları Milli Şurasının sədri Fuad Muradov çıxış edib.

Xatırladaq ki, “Azərbaycan Gəncliyi Dövlət Proqramı”na uyğun olaraq 2010-cu ilin noyabr (November) ayında Almaniyanın Frankfurt şəhərində keçirilmiş Dünya Azərbaycanlı Gənclərinin I Konqresinin qətnaməsinə əsasən Dünya Azərbaycanlı Gəncləri Birliyinin təsis edilməsi ilə əlaqədar təşəbbüs qrupu yaradılıb. 5 iyul (July) 2011-ci il tarixində Bakı şəhərində keçirilmiş Dünya Azərbaycanlılarının III Qurultayının qətnaməsində Dünya Azərbaycanlı Gənclər Birliyinin təsis edilməsi təşəbbüsü təqdir edilib və bu prosesin (sürəc) sürətləndirilməsi üçün müvafiq tədbirlərin görülməsinin zəruriliyi vurğulanıb. N.S