Ukrayanlılara qarşı xüsusi ilə qəddar olmaq tapşırılıb

SON XƏBƏRLƏR

Ukrayanlılara qarşı xüsusi ilə qəddar olmaq tapşırılıb

2025.02.10, 15:39

Rusiya Ukraynanı işğal etdikdən sonra Federal Penitensiar Xidmətinin zabitlərinə ukraynalı məhbuslara qarşı qəddar və zorakılıq nümayiş etdirməyi tapşırıblar.

Gunaz.tv

GünazTV “AzPolitika”-ya istinadən xəbər verir ki, bu barədə “The Wall Street Journal”-da (WSJ) dərc olunan araşdırmada bildirilir. Qeyd olunur ki, Ukrayna hərbçilərinə qarşı işgəncələrin tətbiqi BMT tərəfindən təsdiqlənib.

WSJ-nin məlumatına görə, Rusiyanın Sankt-Peterburq və Leninqrad vilayəti üzrə Federal Penitensiar Xidmətinin rəhbəri İqor Potapenko idarənin elit bölmələrinin əməkdaşlarına (ehtimal ki, Federal Penitensiar Xidmətin xüsusi təyinatlılarını nəzərdə tutur) gələn məhbuslara qarşı amansız davranmağı əmr edib. O qeyd edib ki, zorakılıq məhdudlaşdırılmayacaq, işgəncələri qeydə ala bilən kameralar yığışdırılacaq.

Daha sonra oxşar göstərişlər Pskov, Moskva və Buryatiya da daxil olmaqla, digər regionlardakı penitensiar xidmətin əməkdaşlarına da verilib. Məhkumlara nəzarət edən əməkdaşlar daha sonra rotasiya olunublar - onlar bir aydan artıq bir koloniyada olmayıblar.

WSJ-nin araşdırmasında xüsusi təyinatlıların və tibb işçisi olan üç keçmiş FSIN əməkdaşına istinad edilir.

İqor Potapenko Ukrayna əsilli, Sumı vilayətində anadan olub, 53 yaşı var. Hərbi təhsili SSRİ DTK-nın Oryol Ali Hərbi Komandanlıq Rabitə Məktəbində alıb.

1992-ci ildə Potapenko penitensiar sistemə işə gəlib, Voronej vilayətinin Federal Penitensiar Xidmətində işləyib, 2010-cu ildə isə Sankt-Peterburqa köçürülüb və orada 14 il xidmət göstərib.

Media və hüquq müdafiəçiləri Potapenkonun Sankt-Peterburq və Leninqrad vilayəti üzrə Federal Penitensiar Xidmətə rəhbərlik etdiyi dövrdə regiondakı təcridxanalarda və koloniyalarda bir neçə işgəncə faktı barədə məlumat veriblər. Potapenkonun adı xüsusilə, biznesmen Valeri Pşeniçnının ölümü və “Krestı-2” təcridxanasında “mətbuat daxmalarının” yaradılması ilə bağlı çəkilirdi.

2024-cü ildə İqor Potapenko dövlət qulluqçusu olub. O, Sankt-Peterburqun təhlükəsizlik və miqrasiya siyasəti üzrə vitse-qubernatoru təyin edilib.

2024-cü ilin noyabrında Ukrayna üzrə Müstəqil Beynəlxalq Təhqiqat Komissiyası Rusiya hakimiyyəti və hərbi qulluqçularının Ukraynanın Rusiyanın nəzarətində olan bütün ərazilərində hərbçilərə və mülki şəxslərə qarşı dəfələrlə işgəncədən istifadə etdiyi barədə hesabat dərc edib.

Cenevrə Konvensiyaları müharibə edən tərəfləri məhbuslarla normal rəftarını təmin etməyə, qəddar rəftarı qadağan etməyə, qohumları və beynəlxalq humanitar təşkilatlarla əlaqə saxlamağa məcbur edir.

Ş.E

GUNAZ.TV

SON XƏBƏRLƏR