GünAz TV: Suriyanın neft nazirinin müavini müxalifətin tərəfinə keçdi, müxalifətçilərə silah yardımları artır, Amerika hərbi ssenarini müzakirə edir.

Suriyanın neft və mineral (mə`dəni) ehtiyatlar nazirinin müavini Abdo Husameldin bəyan edib ki, o, Bəşər Əsəd hökumətini tərk edərək müxalifətə qoşulur. Nazir müavininin videomüraciəti onun Facebook səhifəsindən yayılıb. “Mən Suriyanın neft və mineral ehtiyatlar nazirinin müavini Abdu Husameldin öz vəzifəmdən, BƏƏS Partiyasından və rejimdən ayrıldığımı bəyan edirəm. Mən öz böyük xalqımın başlatdığı inqilaba qoşuluram” deyə, müraciətdə bildirilir.

Husameldin Suriya rejimindən ayrılaraq müxalifətin tərəfinə keçən ilk yüksək vəzifəli məmurdur. Suriyada Əsəd rejiminin öz xalqını qırmaqda olduğu bir vaxtda o da məlum olub ki, diktatorun anası oğlunun taleyinin Qəzzafi kimi olacağından narahatdır. Bu barədə Amerikanın özəl kəşfiyyat araşdırmaları mərkəzi “Stratfor”un əməkdaşlarının WikiLeaks saytı tərəfindən yayılmaqda olan yazışmalarında deyilir.

Bu yazışmalara görə, “Röyter” agentliyinin Suriyada işləmiş əməkdaşı Bəşər Əsədin anası Anissə Maklufla söhbətləşib. Makluf jurnalistə deyib ki, Suriyada baş verənlər onu çox narahat edir və o, oğulları Bəşərlə üsyançıları qıran ordu birləşməsinin komandanı (fərmandehi) Mahirin əməllərindən məyusdur. Qadın bildirib ki, oğullarının hərəkətləri ölkəni anarxiyaya (hərc-mərc) gətirib. “Mən çox qorxuram ki, onların da taleyi Qəzzafi kimi olacaq” deyə, Makluf bildirib. O deyib ki, əgər əri Hafiz Əsəd sağ olsaydı Suriyada stabillik pozulmazdı.

Xarici KİV-lərdə (kütləvi informasiya vasitələri) yayılan xəbərlərə görə, suriyalı müxaliflərə silah yardımları artır. Əsəd qüvvələrinin üsyanın mərkəzlərindən olan Homsa nəzarəti ələ keçirməsindən sonra Səudiyyə Ərəbistanı, Türkiyə, İordaniya və bəzi digər ərəb ölkələrindən müxaliflərə silah yardımı edildiyi barədə məlumatlar var. Ərəb KİV-lərində yer alan xəbərlərə görə, NATO ölkələri də Suriyaya öz xüsusi təyinatlılarını göndərib. Onlar müxalifətçilərə hərbi təlim keçir. Rusiyanın BMT-dəki (Birləşmiş Millətlər Təşkilatı) səfiri Vitali Çurkin isə deyib ki, onların əlində olan dəlillərə görə, Liviyada (Libi) Qəzzafini devirən yaraqlılar Suriyaya göndərilir. Çurkinin sözlərinə görə, liviyalı yaraqlılar Suriyada müxalifətin tərəfində döyüşürlər.

ABŞ (Amerika Birləşmiş Ştatları) isə əvvəlki kimi Suriyaya hərbi müdaxiləyə və müxalifətçilərə silah verilməsinə tərəfdar deyil. Prezident Barak Obama savaş barabanları çalmaq üçün tez olduğunu, başqa imkanlardan istifadə etməyə tərəfdar olduqlarını deyib. Amerikanın Mərkəz Komandanlığının rəhbəri general Ceyms Mattis isə Senatın müdafiə komitəsində keçirilən dinləmələrdə deyib ki, Rusiya Suriyanı “dişinə qədər” silahlandırıb. Generalın sözlərinə görə, əgər Qərb ölkələri Suriyanın hava məkanını bağlamaq istəsə, rusların satdığı hava hücumundan müdafiə sistemləri onlara ciddi problem yaradacaq. C.Mattis yaxın vaxtlarda Əsədin hakimiyyətdən əl çəkməyəcəyini, Suriyada vəziyyətin daha da pisləşəcəyini deyib. General Suriya müxalifətinin dəstəklənməsinə dair hərbi planların detallarını açıqlamaqdan imtina edib. Yeni müsavat

N.S