Suriyada qanlı gecə: İranın əli var!

SON XƏBƏRLƏR

Suriyada qanlı gecə: İranın əli var!

2025.03.08, 12:14

Ötən gecə Suriyada keçmiş rejimə yaxın silahlıların Latakiyada təhlükəsizlik qüvvələrini hədəf almasından sonra bölgədə başladılan genişmiqyaslı əməliyyat davam edir. Ən azı 71 nəfərin həyatını itirdiyi hadisələrin arxasında İrana yaxınlığı ilə tanınan keçmiş rejim ordusunun şəxsi heyətinin olduğu düşünülür.

Gunaz.tv

GünazTV "Hürriyet" qəzetinə istinadən xəbər verir ki, Suriyada Əsəd rejiminin devrilməsinin ardından Heyət Təhrir əş-Şamın (HTŞ) başçılıq etdiyi müxalifət paytaxt Dəməşqdə dövləti yenidən formalaşdırmaq üçün səylərini davam etdirir. Ötən gün keçmiş rejimə bağlı milislərin hücumlarından sonra ölkədə vətəndaş müharibəsinin yenidən alovlanması ilə bağlı narahatlıqlar var.

Devrilmiş lider Bəşər Əsədlə qardaşı Mahir Əsədin Latakiya hücumu ilə əlaqəsi ilə bağlı yeni məlumatlar ortaya çıxıb. Əl-Cəzirə telekanalı bildirib ki, Bəşər Əsəd xarici ölkənin dəstəyi və nəzarəti ilə bütün silahlı qruplar arasında davam edən koordinasiyadan xəbərdardır.

Digər tərəfdən, Suriya xalqı arasında məzhəb gərginliyini artırmaq və yeni qurulan Suriya hökumətini zəiflətmək məqsədi daşıyan yeni hərbi şura yaradılıb. Keçmiş briqada generalı Qiyas Süleyman Dalla tərəfindən qurulan şuranın Livandakı Hizbullah və İraq silahlı birləşmələrindən maliyyə, PKK-nın Suriya qolu PYD/YPG-dən isə maddi-texniki dəstək aldığı iddia edilib.

Hücumların arxasında olduğu iddia edilən Süleyman Dalla bəyanat yayaraq, Dəməşqə bağlı HTŞ qüvvələrinin Tartus və Latakiyadan geri çəkilməsini tələb edib, əks halda girov götürdükləri Suriya təhlükəsizlik qüvvələrini öldürməklə hədələyib. İrana yaxınlığı ilə tanınan Süleyman Dalla daha sonra danışıqlara açıq olduğunu açıqlayıb. Digər tərəfdən, keçmiş Hərbi Hava Qüvvələri Kəşfiyyat Direktoru İbrahim Huveyjanın da sözügedən qruplarla koordinasiyalı hərəkət etdiyi, lakin dünən Latakiyada keçirilən əməliyyatda ələ keçirildiyi bildirilib.

Xatırladaq ki, İranın dini lideri Əli Xamneyinin müşaviri Əli Əkbər Vilayəti çərşənbə günü İran mediasına verdiyi açıqlamalarda Suriyada hər an vətəndaş müharibəsinin başlaya biləcəyini və hazırda Suriyanın gələcəyini proqnozlaşdırmaq mümkün olmadığını deyib.

Suriya Müdafiə Nazirliyi əsgərləri dünən səhər saatlarında Tartus və Latakiya bölgələrində geniş miqyaslı əməliyyata başlayıb, Suriya Daxili İşlər Nazirliyinin rəsmisi isə Latakiyadakı Dəniz Akademiyasını nəzarətə götürdüklərini və bölgəyə yaxınlaşmağa çalışan qrupları dəf etdiklərini bildirib. Qarşıdurmalar davam edir.

Şahin Elxanoğlu