Contact Us

SON XƏBƏRLƏR

Əhməd əl-Şaraa İlham Əliyevə məktub ünvanladı

2025.04.02, 11:35
Əhməd əl-Şaraa İlham Əliyevə məktub ünvanladı

Suriyanın keçid dövrü Prezidenti Əhməd əl-Şaraa Prezident İlham Əliyevə təbrik məktubu ünvanlayıb.

Gunaz.tv

GünazTV xəbər verir ki, təbrik məktubunda deyilir:

“Cənab Prezident, Əziz Qardaş.

Mübarək Ramazan bayramı münasibətilə Sizə ən səmimi təbriklərimi çatdırmaqdan məmnunluq duyuram.

Bu xoş fürsətdən istifadə edərək Zati-alinizə möhkəm cansağlığı, uzun ömür, Azərbaycan Respublikasına daha da çox tərəqqi, rifah və əmin-amanlıq arzu edirəm. Birgə səylərimizlə ölkələrimizin və xalqlarımızın, həmçinin İslam ümmətimizin xoşbəxtliyi naminə Uca Allaha dua edirəm. Bayramınız mübarək!”

 

Qeyd edək ki, Suriyadakı yeni hakimiyyət ilə Azərbaycan Respublikası arasında təmaslar artıq başlayıb. 14 fevral tarixində Azərbaycan Respublikasının Prezidenti İlham Əliyev Suriya Ərəb Respublikasının keçid dövrü Prezidentinin vəzifəsinin icrasına başlaması münasibətilə Əhməd əl-Şaraanı təbrik edib. Dövlət başçısı Əhməd əl-Şaraaya ünvanladığı məktubda Azərbaycan ilə Suriya arasında dostluq və əməkdaşlıq əlaqələrinin inkişaf etdirilməsinə böyük önəm verdiyini vurğulayıb. İlham Əliyev Əhməd əl-Şaraanı Azərbaycana rəsmi səfərə dəvət edib.

Eyni zamanda Azərbaycan Suriyada humanitar yardımın paylanması aksiyalarında mütəmadi olaraq iştirak edir. Belə ki, Azərbaycan Prezidentinin müvafiq tapşırığına əsasən, humanitar problemlərin aradan qaldırılmasına dəstək məqsədilə ötən il dekabrın 30-da ölkəmiz tərəfindən çəkisi 200 tona yaxın müxtəlif qida və ərzaq məhsullarından ibarət humanitar yardım karvanı 10 ədəd yük avtomobili vasitəsilə Suriyaya göndərilib. 

Azərbaycan-Suriya diplomatik təmasların yenidən qurulması istiqamətində atılan növbəti addım Azərbaycan Respublikasının Suriyanın paytaxtı Dəməşqdəki səfirliyinin fəaliyyətini bərpa edilməsi olub. "Azərbaycan və Suriya arasında dostluq və əməkdaşlıq əlaqələrinin keyfiyyətcə yeni mərhələyə qədəm qoyması, siyasi, iqtisadi, mədəni və digər sahələrdə tərəfdaşlığın inkişaf etdirilməsi üçün yeni imkanların yarandığı bu vacib dövrdə səfirliyimiz Suriyanın keçid dövrü hökuməti ilə yaxından əməkdaşlıq edərək, ikitərəfli əlaqələrimizin inkişafına dəstək verəcək," - Xarici İşlər Nazirliyinin Mətbuat xidməti idarəsindən məlumat verilib.

Azərbaycan müqəddəs Ramazan ayında Suriyadakı kimsəsiz uşaqları unutmadı. Azərbaycanın Suriya Ərəb Respublikasındakı səfirliyinin təşəbbüsü, Azərbaycanın Beynəlxalq İnkişafa Yardım Agentliyinin (AIDA) dəstəyi və Suriyanın “Qadın Xeyriyyə Cəmiyyəti”nin təşkilatçılığı ilə martın 25-dən 27-dək Dəməşq şəhərində (2 dəfə) və Dəməşqin böyük dağıntılara məruz qalmış Spena qəsəbəsində 1000 kimsəsiz uşaq üçün iftar süfrələri təşkil edilib.

 

 

 

 

Ş.E

 

Açar Sözlər :

SEÇİLMİŞ XƏBƏRLƏR

Çox oxunanlar