Rusiya sülhdən yayınsa, sarsıdıcı sanksiyalar tətbiq ediləcək

SON XƏBƏRLƏR

Rusiya sülhdən yayınsa, sarsıdıcı sanksiyalar tətbiq ediləcək

2025.04.02, 12:16

ABŞ Senatında tarixi razılaşma formalaşıb – 25 demokrat və 25 respublikaçı senator, əgər Rusiya Ukrayna ilə sülh danışıqlarına səmimi yanaşmazsa, Moskvaya qarşı yeni və daha sərt sanksiyaların tətbiqini tələb edən qanun layihəsini irəli sürüb.

Gunaz.tv

GünazTV Musavat.com-a istinadən xəbər verir ki, bu təşəbbüsün önündə senator Lindsi Qrem (respublikaçı) və Riçard Blumental (demokrat) dayanır.

Senatorların bəyanatına görə, qanun layihəsi yalnız Moskvanın deyil, eyni zamanda Rusiyanın aqressiyasını dəstəkləyən digər dövlət və subyektlərin də iqtisadi cəhətdən ciddi zərbə almasını nəzərdə tutur. Buraya ilkin və ikinci dərəcəli sanksiyalar daxildir.

“Əgər Moskva sülh danışıqlarından yayınarsa və ya gələcəkdə yenidən Ukraynanın suverenliyinə qəsd etməyə cəhd göstərərsə, bu sanksiyalar dərhal qüvvəyə minəcək,” – deyə senatorlar sərt xəbərdarlıq ediblər.

Layihəyə əsasən, Rusiya məhsullarını – xüsusilə enerji resurslarını idxal edən ölkələrə qarşı da əlavə tariflər tətbiq olunacaq. ABŞ Senatında hakim olan mövqe aydındır: “Rusiya aqressordur və Putin rejiminin bu müharibəsi dayandırılmalı, gələcəkdə isə qabaqlayıcı tədbirlərlə qarşısı alınmalıdır.”

Maraqlıdır ki, bu qanun layihəsi, ABŞ Prezidenti Donald Trampın sülh sazişi ilə bağlı Moskva ilə danışıqların uzanmasına dözümsüzlük nümayiş etdirdiyi bir vaxtda ortaya çıxıb. Trampın diplomatik səbirinin tükənməsi, Senatın isə sərt xətt nümayiş etdirməsi ABŞ-ın Rusiyaya qarşı birgə və ardıcıl təzyiq strategiyasına keçid etdiyini göstərir.

Qanun layihəsinin yaxın zamanda hər iki palatada böyük səs çoxluğu ilə qəbul olunacağı gözlənilir. Lakin bunun üçün Konqresdəki respublikaçı liderlərin səsverməyə yaşıl işıq yandırması vacibdir. Tarix hələ dəqiqləşməyib.

Ş.E

GUNAZ.TV

SON XƏBƏRLƏR