GünazTV xəbər verir ki, bu sözləri Azərbaycan Respublikası Prezidenti İlham Əliyev ADA Universitetində keçirilən "Yeni dünya nizamına doğru" mövzusunda beynəlxalq forumda çıxışı zamanı deyib. Tədbirdə iştirak edən Böyük Britaniya nümayəndəsinin İran-Azərbaycan münasibətilə bağlı ünvanladığı suala cavab olaraq Prezident İlham Əliyev bildirib ki, Azərbaycan çoxtərəfli əməkdaşlığa üstünlük verir. Lakin regionda faciəvi hadisələr iki ölkə arasındakı münasibətlərə kölgə salır. 

“Bildiyiniz kimi İrandakı səfirliyimizə qarşı terror hücumu həyata keçirilmişdir. Biz bu faciəni unuda bilmərik. Ancaq bu terror hadisəsi Prezident Pezeşkiandan öncə baş vermişdir. Biz Azərbaycana qarşı həyata keçirilmiş terror aktının mütəşəkkil şəkildə hazırlandığına əminik. İddia olunurdu ki, bu hadisə hansısa məişət zəminində, şəxsi zəmində baş verib. Bu mənasız iddialardır. Həmin terrorçu 40 dəqiqə ərzində səfirliyimizə daxil olmağa çalışırdı. Ona müqavimət göstərən yeganə şəxs bizim səfirliyimizin təhlükəsizlik zabitimiz oldu. Həmin zabitimiz silahsız idi. Terrorçu 1 nəfəri qətlə yetirə bildi."

Prezident İlham Əliyev hücumu həyata keçirən terrorçunun kalaşnikov avtomatı, çəkic və molotov kokteyli ilə təchiz edildiyini bildirib:

"Bütün bunlar bizim səfirliyimizin çöl və daxili kameraları vasitəsilə təsbit edilib. Səfirliyimizin təhlükəsizliyinin təmin etməli olan polislər yerindən qaçmışdılar. Ola bilər ki, onlar qorxularından qaçıblar amma yaxınlıqdakı polis bölmələrinə niyə məlumat vermədilər? Bu sualı iranlı qonaqlarımıza verdim. Özünüzü mənim yerimə qoyun, belə olan halda siz nə düşünərsiniz?"

Dövlət başçısı bildirdi ki, İranın mərhum xarici işlər nazir terrorçunun qanun qarşısında cavab verəcəyini və ən yüksək cəzaya layiq görüləcəyini vəd etmişdir. Lakin bu hadisənin üzərində 2 il keçməsinə baxmayaraq vəd yerinə yetirilməyib: 

"İndiyə qədər, 2 il keçməsinə baxmayaraq, vəd yerinə yetirilmir. Terror hadisəsi baş verdikdən sonra terrorçu mediaya müsahibə verdi. Təsəvvür edin ki, başqa ölkənin səfirliyində kimisə qətlə yetirən bir şəxs dövlət mediasına müsahibə verir. Həmin gün terrorçunu ruhi xəstə elan edirlər. Bir şəxsi ruhi xəstə adlandırmaq üçün tibbi ekspertiza lazımdır. Bu da uzun müddət tələb edir. Bu şəxs isə dərhal ruhi xəstə elan edildi. Artıq 2 ildir ki, məhkəmə qərarı elan edilməyib. Bizə məlumdur ki, İranda daha yüngül cinayətlərə görə cəmi bir neçə gün ərzində edam cəzası icra edilir. Biz bu hadisəni unuda bilərikmi? Əlbəttə yox. Bu bizim münasibətlərə kölgə salır. Mən ümid edirəm ki, yeni hakimiyyət əvvəlki hakimiyyətin vədlərinə əməl edəcəklər. Təkcə bu hadisəni törədən cinayətkar yox, onu səfirliyimizə göndərənlər və arxasında dayananlar cəzalandırılacaqdır."

Ş.E