Mirzoyan: Türkiyə bizimlə danışıqlarda Azərbaycan faktorunu nəzərə alır

SON XƏBƏRLƏR

Mirzoyan: Türkiyə bizimlə danışıqlarda Azərbaycan faktorunu nəzərə alır

2025.04.14, 14:21

Ermənistanın xarici işlər naziri Ararat Mirzoyan aprelin 12-də türkiyəli həmkarı Hakan Fidanla Antalyada keçirdiyi görüşün bəzi təfərrüatlarını açıqlayıb.

Gunaz.tv

GünazTV Teleqraf-a istinadla xəbər verir ki, Mirzoyan Ermənistan-Türkiyə münasibətlərinin normallaşması ilə bağlı artıq bir sıra yerinə yetirilən anlaşmaların olduğunu, bəzilərinin isə hələ də yerinə yetirilmədiyini bildirib.

“Məsələn, hava məkanından istifadə məsələsini mahiyyətcə həllini tapmış hesab edirik. Birlikdə Marqara-Əlican sərhəd infrastrukturunun vəziyyətini nəzərdən keçirdik. Erməni tərəfi sərhəddə infrastrukturun modernləşdirilməsi istiqamətində iş aparıb”, - nazir deyib.

Onun sözlərinə görə, Gümrü-Qars dəmir yolu və digər infrastruktur obyektlərinin vəziyyəti ilə bağlı birgə araşdırmalar fəal şəkildə aparılır. Bu günlərdə sərhəddəki Ani körpüsündə aparılan bərpa işləri çərçivəsində müxtəlif qurumların mütəxəssisləri bir araya gəlib.

Ermənistan XİN rəhbəri reallaşdırılmamış razılaşmalara, xüsusən də üçüncü ölkə vətəndaşları və diplomatik pasportlara malik Ermənistan və Türkiyə vətəndaşları üçün sərhədlərin açılması məsələsinə toxunub:

“Bu bir prosesdir, bəzi şeylər sürətlə gedir, bəziləri ləng. Amma ümumi anlaşma var, dialoq münasibətlərin tam normallaşması, diplomatik əlaqələrin qurulması və sərhədlərin açılması ilə bağlıdır”.

Mirzoyan bildirib ki, hər iki tərəfin təkcə minimal münasibətlərin qurulması üçün yox, həm də ticarət əməkdaşlığı, tranzit imkanlarının həyata keçirilməsi və birgə enerji layihələri üçün potensial görməsi xüsusilə vacibdir:

“Beynəlxalq siyasətin bəzi məsələlərində mövqelərimiz göründüyü qədər də uzaq deyil. Əksinə, bəzən kifayət qədər yaxın olur”.

Erməni nazir bu kontekstdə Yaxın Şərq gündəminin bəzi aspektlərini misal çəkib.

Ermənistan-Azərbaycan münasibətlərinin Türkiyə ilə danışıqlara təsiri ilə bağlı sualı cavablandıran Mirzoyan etiraf edib ki, Ermənistan və Azərbaycan arasında normallaşma prosesi Türkiyə ilə təmasların tərkib hissəsidir:

“Deyə bilərəm ki, Ermənistan-Türkiyə dialoqu kontekstində Türkiyə tərəfi Ermənistan-Azərbaycan münasibətlərinə görə razılaşmaların icra sürətinə müəyyən məhdudiyyətlər qoyur”.

Bəzi fərqliliklərə baxmayaraq, Mirzoyan Türkiyənin regionda normallaşma prosesinə faydalı, əlverişli təsir göstərməyə hazır olduğunu vurğulayıb.

Ş.E

GUNAZ.TV

SON XƏBƏRLƏR