HESABAT: Türkiyə silahları Amerika bazarını ələ keçirdi

SON XƏBƏRLƏR

HESABAT: Türkiyə silahları Amerika bazarını ələ keçirdi

2025.05.26, 15:31

Türkiyənin müdafiə sənayesi qlobal uğurlarına bir yenisini daha əlavə edib.

Gunaz.tv

GünazTV “AzPolitika”-ya istinadla xəbər verir ki, Amerika mərkəzli nüfuzlu “Foreign Policy” jurnalı Türkiyədə istehsal olunan silahların Amerika bazarında rekord satış göstəricilərinə çatdığını açıqlayıb.

Qeyd olunur ki, 2021-ci ildən bəri Türkiyə Amerikanın ən böyük silah ixracatçılarından biri halına gəlib. Hesabata görə, Samsun Yurt Savunma (SYS) şirkətinə məxsus “Canik” markalı tapançalar xüsusilə Amerika bazarında münasib qiyməti, istifadəyə uyğun dizaynı və yüksək mühəndislik keyfiyyəti ilə geniş populyarlıq qazanıb.

Məqalədə “Canik” 400 dolların altında qiymətlərlə Amerika bazarında böyük maraq görür” ifadəsi yer alıb.

“Canik” markasının istehsal etdiyi yüngül, istifadəsi asan və kiçik əllərə uyğun 9 mm-lik modellər qadınlar, gənclər və afroamerikalı alıcılar da daxil olmaqla müxtəlif istifadəçi qrupları arasında xüsusilə üstünlük təşkil edir.

Məqalədə qeyd olunur ki, Amerika Prezidenti Donald Trampın tətbiq etdiyi gömrük rüsumları əcnəbi silah istehsalçılarını sıxışdırmağı hədəfləsə də, bu tədbirlər Türk istehsalçılarını daha da üstün mövqeyə çıxarıb. Artan maliyyətlər və təchizat problemlərindən daha az təsirlənən Türkiyə şirkətləri yalnız bu mərhələni aşmaqla kifayətlənməyib, həm də qlobal bazarda daha güclü liderə çevriliblər.

“SYS” şirkətinin ildə 460000 ədəd 9 mm-lik tapança istehsal etdiyi və bu göstərici ilə Almaniyanın məşhur “Sig Sauer” firmasından sonra ikinci sırada qərarlaşdığı bildirilir. Analizdə Türkiyənin yüksək keyfiyyət və münasib qiymət balansı ilə həm fərdi istifadəçilər, həm də təhlükəsizlik qurumları üçün cazibədar tədarükçü olduğu vurğulanır.

Orta Şərqdə yüngül silah bazarını tədqiq edən müdafiə məsləhətçisi Mils Vining bildirib ki, türk ov tüfənglərinə Əfqanıstan, İraq, Myanmar və Suriya kimi bölgələrdə demək olar ki, hər yerdə rast gəlmək mümkündür.

“Foreign Policy” jurnalı Türkiyənin müdafiə sənayesində izləmiş olduğu strateji xəttə də diqqət çəkib. “Türkiyənin müdafiə sənayesini Qərb firmalarından asılılıqdan qurtarmağı hədəfləyən islahatlar 2004-cü ildə, o zamankı Baş nazir Rəcəb Tayyib Ərdoğan tərəfindən başlandı” – deyə yazılıb.

Bildirilir ki, “SYS” şirkəti Amerikada, Florida ştatında açdığı “Canik USA” zavodu vasitəsilə Amerikanın idxal məhdudiyyətlərini aşaraq, birbaşa daxili bazara istehsal etməyə başlayıb. Bu addım Türkiyənin qlobal silah sənayesindəki iddiasını gücləndirən əsas nümunə kimi təqdim edilib.

Yalnız 2023-cü ildə “SYS” şirkətinin Amerika bazarından 190 milyon dollar gəlir əldə etdiyi bildirilir. Bu məbləğ Amerikanın Türkiyəyə verdiyi ən yüksək təhlükəsizlik yardımının üç qatına bərabərdir.

“Canik” markasından əlavə “Sarsılmaz”, “MKE” və digər türk istehsalçılarının Orta Şərq, Asiya və Afrika ölkələrinin təhlükəsizlik qüvvələri tərəfindən istifadə edildiyi qeyd olunub. Eyni zamanda bu şirkətlərin beynəlxalq sərgilərdə mükafatlar qazandığı və diqqət çəkən uğurlar əldə etdiyi vurğulanıb.

Ş.E