Rusiyanın Yekaterinburq şəhərində Rusiya xüsusi təyinatlı qüvvələrinə aid dəstələr tərəfindən azərbaycanlı ailələrə qarşı törədilən cinayətlə bağlı Güney Azərbaycan Milli Dövlətçilik Şurasının BƏYANATI

SON XƏBƏRLƏR

Rusiyanın Yekaterinburq şəhərində Rusiya xüsusi təyinatlı qüvvələrinə aid dəstələr tərəfindən azərbaycanlı ailələrə qarşı törədilən cinayətlə bağlı Güney Azərbaycan Milli Dövlətçilik Şurasının BƏYANATI

2025.06.30, 09:13

Rusiyanın Yekaterinburq şəhərində Rusiya xüsusi təyinatlı qüvvələrinə aid dəstələr tərəfindən azərbaycanlı ailələrə qarşı törədilən cinayətlə bağlı Güney Azərbaycan Milli Dövlətçilik Şurasının BƏYANATI

Gunaz.tv

26 dekabr 2024-cü il tarixində Azərbaycan Respublikasına məxsus sərnişin təyyarəsinin Rusiyanın hava müdafiə sistemləri tərəfindən vurulması nəticəsində 38 günahsız insanın həlak olması bütün azərbaycanlıların yaddaşında silinməz bir faciə kimi qalmışdır. Bu hadisədən sonra son aylar ərzində Rusiyada yaşayan azərbaycanlı soydaşlarımıza qarşı sistemli və ardıcıl təzyiqlər müşahidə olunmaqdadır.
Bu təzyiqlər 27 iyun 2025-ci il tarixində Rusiyanın Yekaterinburq şəhərində xüsusi təyinatlı qüvvələrin heç bir hüquqi əsas olmadan azərbaycanlı ailələrin evlərinə amansız hücumları ilə yeni bir mərhələyə keçmişdir. Həmin hücumlar zamanı soydaşlarımız ağır fiziki və mənəvi işgəncələrə məruz qalmış, həlak olan və əsassız yerə həbs edilənlər olmuşdur.
Aydın şəkildə bəllidir ki, Rusiyanın dövlət səviyyəsində həyata keçirdiyi bu hüquq tanımaz, insanlıq əleyhinə olan cinayətlərinin əsas səbəbi Azərbaycan Respublikasının beynəlxalq arenada apardığı müstəqil siyasət kursunun Kremlin maraqlarına ağır gəlməsi və Rusiyanın yeni imperialist planları ilə birbaşa əlaqəlidir.
Biz inanırıq ki, dünya ictimaiyyəti bu cinayətlərə qarşı səssiz qaldıqca, Rusiyanın hakim dairələri bu cəzasızlıq mühitindən istifadə edərək cinayətlərini yalnız Ukraynalılar və azərbaycanlılarla məhdudlaşdırmayacaq, daha geniş miqyasda davam etdirəcəkdir.
Güney Azərbaycan Milli Dövlətçilik Şurası olaraq:
•   Rusiyanın dövlət strukturlarının Azərbaycana və azərbaycanlılara qarşı həyata keçirdiyi sistematik təzyiq və cinayət siyasətini qətiyyətlə pisləyirik.
•   Dünya ictimaiyyətini, insan haqları təşkilatlarını, beynəlxalq institut və qurumları, habelə bütün dünya dövlətlərini Rusiyanın bu anti-bəşəri cinayətlərinə qarşı səsini yüksəltməyə çağırırıq.
•   Rusiyada əsassız yerə həbs edilən soydaşlarımızın azad edilməsi üçün bütün imkanların səfərbər olunmasını tələb edirik.
•   Cinayətkarların Rusiyanın mövcud qanunvericiliyi və beynəlxalq hüquq çərçivəsində cəzalandırılması üçün ciddi tədbirlər görülməsinə çağırırıq.
•   Bütün vicdanlı insanları bu ədalətsizliklərə qarşı mübarizəyə qoşulmağa səsləyirik.
Azərbaycan xalqının müstəqil iradəsini boğmaq cəhdləri uğursuzluğa məhkumdur. Biz bu mübarizədə, bütün dünya azərbaycanlıları ilə birlikdə, qəti və sarsılmaz mövqedə dayanmağa davam edəcəyik.
Güney Azərbaycan Milli Dövlətçiliyi Şurası adından
Mərkəzi Şura başqanı Çingiz Göytürk
30 İyun 2025-ci il