Yuri Qusev: Ukrayna Yekaterinburqda azərbaycanlılara qarşı repressiv hərəkətləri qətiyyətlə pisləyir

SON XƏBƏRLƏR

Yuri Qusev: Ukrayna Yekaterinburqda azərbaycanlılara qarşı repressiv hərəkətləri qətiyyətlə pisləyir

2025.06.30, 10:18

Ukrayna Rusiyanın Yekaterinburq şəhərində azərbaycanlılara qarşı repressiv hərəkətləri qətiyyətlə pisləyir.

Gunaz.tv

Günaz TV Report-a istinadən xəbər verir ki, bunu Ukraynanın Azərbaycandakı səfiri Yuri Qusev bildirib.

"Rusiya hakimiyyətinin Yekaterinburqda azərbaycanlılara hücumu sadəcə bir insident deyil, cəzasızlıq və insan həyatına nifrətlə qidalanan sistemli zorakılığın təzahürüdür. İllərdir beynəlxalq hüququ pozan, Ukraynaya qarşı işğalçı müharibə başladan, öz vətəndaşlarını siyasi əqidələrinə görə təqib edən Rusiya repressiv aparatını digər dövlətlərin vətəndaşlarına da qarşı yönəldir", - səfir qeyd edib.

O, həmçinin vurğulayıb ki, Rusiya güc strukturları tərəfindən törədilmiş bu qanunsuz zorakılıq aktı Azərbaycan Xarici İşlər Nazirliyinin (XİN) və ictimaiyyətinin haqlı reaksiyasına səbəb olub.

"Belə bir reaksiya təkcə məntiqi deyil, həm də müasir Rusiyada milli azlıqların hüquqlarının sistematik şəkildə pozulduğu, güc strukturlarının özbaşınalığının isə normaya çevrildiyi bir şəraitdə zəruridir", - o bildirib.

Ukraynanın artıq uzun illərdir müxtəlif xarakterli cinayət əməllərində özünü göstərən Rusiya təcavüzü ilə üzləşdiyini xatırladan Y.Qusev Ukrayna və Azərbaycan xalqlarını qarşılıqlı dəstək göstərməyə çağırıb. O, həmçinin beynəlxalq ictimaiyyəti zərər çəkmiş azərbaycanlılara qarşı baş vermiş zorakılıq aktına reaksiya verməyə çağırıb.

"Dünya bu cinayətə reaksiya verməlidir. Susqunluq yalnız cəzasızlığa şərait yaradır. Nə Yekaterinburqda, nə Kiyevdə, nə də başqa bir yerdə belə faciələrin təkrarlanmaması üçün Moskvaya siyasi, diplomatik və sanksiya təzyiqi gücləndirilməlidir", - o əlavə edib.

Xatırladaq ki, iyunun 27-si səhər Rusiya Federal Təhlükəsizlik Xidmətinin əməkdaşları Yekaterinburq şəhərində azərbaycanlıların yaşadığı evlərə basqın edib. Reyd zamanı iki nəfər öldürülüb, bir neçə nəfər xəsarət alıb. Öldürülən azərbaycanlılar tanınmış jurnalist Seyfəddin Hüseynlinin qardaşlarıdır.

İyunun 28-də Azərbaycan Xarici İşlər Nazirliyi Yekaterinburq şəhərində azərbaycanlılara qarşı hücumlarla bağlı bəyanat yayıb. "Rusiyanın məsələ ilə bağlı təxirəsalınmaz araşdırılma aparmasını və bu qəbuledilməz zorakılığı törədənlərin qısa müddət ərzində məsuliyyətə cəlb edilməsini gözləyirik", - bəyanatda vurğulanıb.

Daha sonra Rusiyanın müvəqqəti işlər vəkili XİN-ə çağırılıb, baş verənlərlə bağlı ona kəskin etiraz bildirilib.

Dünən Yekaterinburqda saxlanılan 6 şəxslə bağlı məhkəmə keçirilib, onlardan üçü barəsində 22 gün, üçü barəsində isə üç gün müddətinə həbs qətimkan tədbiri seçilib. Saxlanılan şəxslər özlərini təqsirli bilməyiblər.