Türkiyə rəsmisi: "Zəngəzur dəhlizinin açılmasına böyük önəm veririk"

SON XƏBƏRLƏR

Türkiyə rəsmisi: "Zəngəzur dəhlizinin açılmasına böyük önəm veririk"

2025.07.02, 12:55

Türkiyə Zəngəzur dəhlizinin açılmasına böyük önəm verir.

Gunaz.tv

Günaz TV Report-a istinadən xəbər verir ki, bunu Türkiyə Ticarət Palataları və Əmtəə Birjaları Birliyinin I vitse-prezidenti Ali Kopuz 6-cı İqtisadi Əməkdaşlıq Təşkilatı (ECO) biznes forumunda bildirib.

Onun sözlərinə görə, iqtisadiyyatı sürətlə inkişaf edən Azərbaycan cəlbedici iş və investisiya imkanları təqdim edir: "Azərbaycanın bu irəliləyişindən qürur duyuruq. Bu bölgədə ticarətin inkişafına böyük töhfələr verəcək, Naxçıvanla Bakını bir-birinə bağlayacaq Zəngəzur dəhlizinin açılmasına çox önəm veririk. Bu layihənin həyata keçirilməsi ilə Şərqdən Qərbə hər kəsin istifadə edə biləcəyi yeni bir dəhliz yaranmış olacaq".

Qonaq qeyd edib ki, ECO-nun böyük potensialı var: "Ancaq bundan istifadə edə bilmirik.Təəssüf ki, ECO Ticarət Palatası olaraq uzun müddətdir ki, bir araya gələ bilmirdik. Pandemiyadan sonra, Daşkənddə həyata keçirdiyimiz toplantıdan sonra bu, 2-ci tədbirimizdir. Uzun illərdir ki, ECO Palatasının daimi katibliyə çevrilməsinin lazım olduğunu müdafiə edirəm. Birlik olaraq bu vəzifəni üzərimizə götürməyə hazırıq".

Onun sözlərinə görə, regionda yük və sərnişin daşımaları sahəsi ilə bağlı problemlər var: "Bu problemləri aradan qaldıraraq mal və insan hərəkəti ilə bağlı maneələri aşa bilərik. Gündəlik prosedurlar təəssüf ki, ticarət əlaqələrinin inkişafına töhfə vermir. Viza ilə bağlı problemlər hələ də qalır. Ticarətin və investisiyalarnın yolunu açmalıyıq".

A.Kopuz vurğulayıb ki, investorları ölkələrə cəlb etmək üçün beynəlxalq standartlara uyğun arbitraj imkanı təmin olunmalıdır: "Biz Türkiyə olaraq arbitraj sistemini təmin etdikdən sonra investisiyalarda nəzərəçarpan artım olmağa başlayıb. Əvvəllər xarici kapital girişi illik bir milyard dollardan çox deyildi. Amma hazırda bu rəqəm 10 milyard dollardan çoxdur".

GUNAZ.TV

SON XƏBƏRLƏR