"İranda 38 milyon azərbaycanlı yaşayır" Abbasəli Həsənov: "İran rəsmiləri ölkə əhalisinin 52 faizinin azərbaycanlı olduğunu bəyan edirlər" Azərbaycan Respublikasının prezidenti İlham Əliyevin martın 10-da Tehranda keçiriləcək İqtisadi Əməkdaşlıq Təşkilatının zirvə toplantısında iştirakı gözlənilir. Bu barədə mətbuata açıqlamasında Azərbaycanın İrandakı səfiri Abbasəli Həsənov məlumat verib. Onun sözlərinə görə, zirvə toplantısında müzakirə olunacaq əsas məsələlər qlobal maliyyə böhranı fonunda iqtisadi əməkdaşlıqla bağlı olacaq: "Eyni zamanda beynəlxalq tədbirlər dövlət başçıları arasında ikitərəfli görüşlərin keçirilməsi üçün də münbit şərait yaradır və hər bir prezident bu imkandan istifadə etməyə çalışır. Zirvə görüşü çərçivəsində Azərbaycan və İran prezidentləri arasında görüşün keçiriləcəyi də gözlənilir. Bu görüşdə müzakirə oluna biləcək məsələlərlə bağlı hazırlıq işləri görülür. Biz mütəmadi iclaslar keçiririk. Həmçinin Tehran bəyannaməsinin və digər sənədlərin hazırlanması üzərində də iş aparılır". Murad Yenigün Səfir Abbasəli Həsənov Azərbaycanın xarici iqşlər naziri Elmar Məmmədyarovun ölkəmizin İranı neft və qaz sahəsində əməkdaşlığa çağırması barədə açıqlamasına rəsmi Tehranın müsbət yanaqşdığını qeyd edib: "İran bu sahədə Azərbaycanla əməkdaşlığı genişləndirməkdə maraqlıdır. Sadəcə, hər iki tərəfdən səslənən bəyanatları düzgün dəyərləndirmək və əməkdaşlıq niyyətlərini gerçəkləşdirmək lazımdır". İran rəsmilərinin "Nabucco" layihəsilə bağlı açıqlamalarını dəyərləndirən Abbasəli Novruzov bu barədə məlumatlı olduğunu dilə gətirib: "İran "Nabucco" layihəsinə qoşulmaqda maraqlı görünür. Bu barədə bəyanatlarla mətbuatda tanış olmuşam. Bilirsiniz ki, Azərbaycan bu layihənin həyata keçirilməsində ən çox maraqlı olan ölkələrdəndir. Əgər digər maraqlı tərəflər İranın "Nabucco" layihəyəsinə qoşulmasına etiraz etməsələr, Azərbaycan bu təşəbbüsləri dəyərləndirə bilər". Səfir İran azərbaycanlılarının (Güney Azərbaycan türkləri - red.) təqib olunması barədə mətbuat orqanlarında yayımlanan məlumatlara münasibətini də açıqlayıb: "Dəqiq olmayan məlumatlara qarşı çıxış edəndə məni az qala xəyanətdə ittiham edirlər. Mən həmişə deyirəm, Abbasəli Həsənov mətbuat üçün sensasiyalı bəyanatlarla çıxış edə bilməz. O, rəsmi şəxsdir - səfirdir. Mənim üçün harada yaşamasından asılı olmayaraq, hər bir azərbaycanlı əzizdir. Ancaq mən İranda Azərbaycan Respublikasını təmsil edirəm. Əgər Azərbaycanda kimsə "Cənubi Azərbaycan" yazırsa, o zaman burada da "Şimali Azərbaycan" termini işlədilir. İranda "Şimali Azərbaycan" adlı jurnal nəşr olunur. Buna rəsmi etirazımı bildirəndə mənə "Cənubi Azərbaycan" haqqında dərc olunan məqalələri göstərdilər. Biz 21-ci əsrdə yaşayırıq. Bu yüzildə dövlətlərarası münasibətlərlə bağlı müxtəlif çərçivələr var. Heç kimin başqa bir ölkənin daxili işlərinə müdaxilə etmək hüququ yoxdur. İranın 75 milyon əhalisi var. İran rəsmiləri ölkə əhalisinin 52 faizinin azərbaycanlı olduğunu bəyan edirlər. Bu isə o deməkdir ki, burada 38 milyon azərbaycanlı yaşayır. Belə anlaşılır ki, bu insanlar necə yaşamaq istədiklərini özləri bilmirlər? Bəziləri özlərini həddən artıq ağıllı hesab edir və başqaları üçün resept verirlər. Azərbaycan ərazilərinin 20 faizi işğal altındadır. Bizim onsuz da problemlərimiz yetərincədir. Bizə yeni problemlər lazımdırmı? Bəziləri ucuz təbliğatla özlərinə dividend qazanmağa çalışırlar. Bizim üçün bir düşmən də yetərlidir. Nə üçün özümüzə yeni düşmənlər yaratmağa çalışmalıyıq". Söz ardı Azərbaycanın İran İslam Respublikasındakı səfiri Abbasəli Həsənovun "Day.Az"a müsahibəsini nöqtəsinə-vergülünə toxunmadan dərc edirik. Səfirin rəsmi şəxs olduğunu və bu səbəbdən də müvafiq diplomatik normalara uyğun hərəkət etmək və danışmaq məcburiyyətində olduğunu da başa düşürük. Zənnimizcə, Azərbaycanda Abbasəli Həsənovdan sensasion bəyanatlar gözləyən yoxdur... Ancaq hörmətli səfirin Güney Azərbaycanda, öz tarixi vətənlərində yaşayan soydaşlarımızın problemləri haqqında yazan mətbuat orqanlarına qarşı lazım gəldiyindən daha sərt ittihamlar səsləndirməsilə heç bir halda barışa bilmərik. Abbasəli Həsənov bildirir ki, heç bir kəsin digər ölkənin daxili işlərinə müdaxilə etmək hüququ yoxdur və eyni zamanda 21-ci əsirdə yaşadığımızı da xatırladır. Təbii ki, feodal dövründə deyil, 21-ci əsrdə yaşayırıq və müasir dünyada insan hüquq və azadlıqları heç bir dövlətin daxili işi sayılmır. Bunu başa düşmək üçün "İnsan hüquqlarının qorunması və əsas azadlıqlar" haqqında 1950-ci ildə qəbul edilmiş Roma Konvensiyasını və digər müvafiq beynəlxalq hüquq aktlarını, sadəcə diqqətlə oxumaq yetərlidir. Digər tərəfdən, əgər İran İslam Respublikası Fələstində, İraqda və digər ərazilərdə insan hüquq və azadlıqlarının pozulmasıyla bağlı bəyanatlar verirsə, o zaman Azərbaycan mediasının öz soydaşlarının hüquqlarının məhdudlaşdırılmasıla bağlı bu və ya digər məlumatı yayımlaması nə üçün "dividend qazanmaq" kimi yozulmalıdır. Səfirin diqqətinə çatdıraq ki, indi Azərbaycanda məhz bu qəbildən olan məsələlərə görə dividend qazanmaq mümkün deyil. Dividend qazanmağın yolunu isə, bizim qənaətimizə görə, hörmətli səfirimiz yaxşı bilir... O ki, qaldı "düşmən axtarışı" məsələsinə, bu da yetərincə nisbi bir anlayışdır. "Xalq Cəbhəsi" qəzeti və Güney Azərbaycanda baş verən proseslər haqqında ciddi məlumatlar yayımlayan media qurumlarının heç biri düşmən axtarışında deyillər. Əgər bu və ya digər ölkə, yaxud şəxs konkret hərəkətlərlə öz düşmənçiliyini büruzə vermirsə... Bəlkə İran-Ermənistan əməkdaşlığının bütün detallarını yada salaq? Bəlkə Azərbaycan ərazilərinin işğalı zamanı İran tərəfindən Ermənistana edilən yardımlardan danışaq? Bəlkə onu da xatırladaq ki, prezident seçkilərində rəqib olan Levon Ter-Petrosyan və Serj Sərkisyan Azərbaycan ərazilərinin işğalı zamanı Meğri keçid məntəqəsinin Ermənistan üçün "həyat yol"u olduğunu bəyan edirdilər... Biz "dövlətlərarası münasibətlərin diqtə etdiyi şərtləri və buna uyğun atılan addımları yaxşı anlayırıq. Qətiyyən xəyanətkar axtarışında deyilik, ancaq bir çox hallarda bəzilərinin "Roma papasından daha çox katolik olmaq" üçün sərgilədikləri mövqenin səbəbini izah edə bilmirik. Çünki bir çox hallarda susmaq daha gözəldir. Xüsusilə də diplomatlar üçün...