TÜRKİYƏ-ERMƏNİSTAN MÜNASİBƏTLƏRİNƏ DAİR ŞOK MƏLUMATLAR Rəcəb Tayyib Ərdoğan: “Danışıqlar davam edir, Azərbaycanın maraqlarına zidd addım atmayacağıq” MHP-li millət vəkili isə AKP-nin ünvanına sərt ittihamlar səsləndirdi Türkiyə hökumətinin Ermənistana yönəlik sərt siyasətdən imtina etməsi və ortada xain bir projenin olması barədə AKP-nin ünvanına daha bir kəskin ittiham səslənib. Milliyyətçi Hərəkat Partiyasının (MHP) genəl başqanı Dövlət Baxçalının müavini, millət vəkili, keçmiş nazir Oqtay Vural ANS-ə açıqlamasında Türkiyə iqtidarının İrəvanla təmasları intensivləşdirməsi və Azərbaycanın maraqlarını nəzərə almadan Ermənistanla diplomatik əlaqələr qurması, sərhədləri açması cəhdlərini kəskin şəkildə pisləyib. O. Vural MHP genəl başqanı, Türkiyə baş nazirinin keçmiş birinci müavini Dövlət Baxçalının bir müddət əvvəl “Yeni Müsavat”a müsahibəsində supergüclərin də iştirakı ilə ortada xain bir projenin olduğu barədə dediklərini təsdiqləyib. Millət vəkili belə bir projenin mövcudluğundan danışıb və onun həyata keçirilməsi istiqamətində cəhdlər olduğunu deyib. O.Vural həmçinin bildirib ki, bütün bunlar Azərbaycanın maraqlarına ziddir və Türkiyənin yox, AKP iqtidarının mövqeyidir. Qeyd edək ki, bir müddət əvvəl “Yeni Müsavat”ın əməkdaşları Türkiyədə olublar və bu ölkədə fəaliyyət göstərən əksər siyasi qüvvələrin təmsilçiləri, iş adamları, jurnalistlər, qəzetçilər birliyinin başqanı və digər şəxslərlə görüşlər keçiriblər, müsahibələr götürüblər. AKP iqtidarının Azərbaycanın maraqlarını nəzərə almadan Ermənistanla əlaqələr qurmaq istəməsinə sərt etirazlar da məhz “Yeni Müsavat”ın Türkiyədən hazırladığı reportajlardan sonra gündəmə gəlib. Hansı ki, həmin reportajlarda Dövlət Baxçalıdan tutmuş CHP lideri Dəniz Baykalın müavinlərinə, Bülənt Ecevitin partiyasının yetkililərinədək, hər kəs AKP-nin bu siyasətini sərt tənqid etmişdi. Hətta CHP-dən olan millət vəkili Canan Arıtman Türkiyənin xarici işlər naziri Əli Babacanın bu məsələ ilə bağlı parlamentdə hesabat verməsini tələb etmişdi. Onun qaldırdığı bu məsələ digər müxalifət partiyaları tərəfindən də dəstəklənib. C.Arıtman əməkdaşımızla dünənki söhbətində hazırda bu məsələ ilə bağlı prosesin getdiyini və Əli Babacanın parlamentə hesabat verməsinə nail olmaq üçün bütün vasitələrdən istifadə edəcəklərini deyib. CHP-dən olan millət vəkili bu məsələ ilə bağlı baş verəcək yeniliklərə dair qəzetimizi məlumatlandıracağını bildirib. Qeyd edək ki, nəhayət, dünən Türkiyə rəsmilərinin bu məsələ ilə bağlı susqunluğu aradan qalxıb. Baş nazir Rəcəb Tayyib Ərdoğan “24" adlı telekanala müsahibə verərkən ona Türkiyə-Ermənistan danışıqları ilə bağlı da sual ünvanlanıb. Ərdoğanın cavabı belə olub: ”Biz Ermənistanla münasibətlərdə Azərbaycanla paralel siyasət yeridəcəyik". O, Azərbaycanın maraqlarına zidd hərəkət etməyəcəklərini bildirib: “Bu günə qədər belə olub, bundan sonra da belə olacaq. Bu kursdan hər hansı sapma ola bilməz”. Ərdoğanın dediklərinə baxmayaraq, Türkiyə-Ermənistan münasibətlərində daha da yaxınlaşma hiss olunur və indiki halda bu əlaqələr Azərbaycanın maraqlarına zərbədən başqa bir şey deyil. ANS-in dünən axşam verdiyi məlumata görə, Türkiyənin “AtlasJet” aviaşirkəti İstanbul-İrəvan təyyarə reyslərinin sayını artıq həftədə 3 dəfəyə çatdırıb. Hər həftənin 2-ci, 4-cü və 5-ci günləri İstanbul-İrəvan-İstanbul təyyarə reysi həyata keçirilir. “AtlasJet”in nümayəndəsi Əminə Öztürk telekanala bildirib ki, Türkiyənin Xarici İşlər Nazirliyi rəsmi Ankaranın siyasi və iqtisadi münasibətlər qurmadığı Ermənistana uçuşların həyata keçirilməsinə icazə verib. Telekanal onu da öyrənib ki, İstanbul-İrəvan-İstanbul reysi ilə biletlərin qiyməti 500 dollardır. Birtərəfli gediş bileti isə 300 dollara başa gəlir. ANS həmçinin “AtlasJet”ə məxsus təyyarənin İrəvanın Zvartnos hava limanındakı görüntülərini də yayımlayıb. İlk baxışdan “həvəskar” çəkilişinə oxşayan bu görüntülərin xüsusi xidmət orqanları tərəfindən lentə alındığı istisna deyil. “AtlasJet”in nümayəndəsi həmçinin bildirib ki, onların təyyarələri “Tauer” turizm şirkəti tərəfindən kirayələnib. Adıçəkilən şirkətin təmsilçisi Hüsnü Alioğlu isə bu fəaliyyətin Türkiyə dövlətinin icazəsi ilə həyata keçirildiyini və siyasi proseslərə qarışmadıqlarını bildirib: “Biz təyyarəçiyik. Beynəlxalq qaydalara uyğun çalışırıq və ölkələrarası işləyirik. Dövlətlərarası problemlər bizi heç vaxt maraqlandırmır, həm də iqtisadi iş görürük. Türkiyə hökumətinin icazə verdiyi qədər bu uçuşları həyata keçirəcəyik. Xeyli müştərimiz var. Yazda Antalyaya reys açacağıq. İrəvandan ora çoxlu turist gəlir”. Onu da qeyd edək ki, Ankara ilə İrəvan arasında münasibətlər yalnız siyasi danışıqlar və təyyarə reyslərinin həyata keçirilməsi ilə yekunlaşmır. Ermənistanın baş naziri bu yaxınlarda bildirmişdi ki, 2008-ci ildə Türkiyə ilə Ermənistan arasındakı ticarət dövriyyəsinin həcmi 185 milyon dollardan çox olub. “Bakı-Xəbər” qəzeti isə bu yaxınlarda yazmışdı ki, 2008-ci ildə Türkiyədən Gürcüstan ərazisi ilə Ermənistana 11 min iri yük maşını keçib. Bütün bunlar göstərir ki, Ankara ilə İrəvan arasında əlaqələr getdikcə dərinləşir və Türkiyə rəsmlərinin dediyi tək, bu əlaqələr zamanı Azərbaycanın maraqları söylənildiyi kimi, ön şərt kimi nəzərdə tutulmur. Mövzuya qayıdacağıq. Z.MÜQABİLOĞLU musavat