Ə. Babacan: «1915-ci ildən bu tərəfə ermənilərlə münasibətlərimiz ən yaxşı səviyyədədir» Ermənistan mətbuatının yazdığına görə, Ankara-Yerevan münasibətləri artıq dönüş nöqtəsindədir. Xarici işlər naziri Əli Babacanın Qaradəniz İqtisadi Əməkdaşlıq Təşkilatının xarici işlər nazirlərinin aprelin 16-da Yerevanda baş tutacaq iclasında iştirak etməyə razılıq verməsi də isti münasibətlərin yaranmasının göstəricisidir. Türkiyə ilə Ermənistan arasında əlaqələrin qurulmasında tarixi fürsət yarandığına dair ABŞ rəsmlərinin verdiyi açıqlamalar özünü doğrultmağa başlayıb. Artıq hər iki ölkə rəsmilərinin dialoq formatı genişlənir ki, bu da diplomatik münasibətlərin yeni, daha aktiv fazaya qədəm qoymasından xəbər verir. Yayılan məlumatlara əsasən son vaxtlar Ermənistan ilə Türkiyə arasında ticarət dövriyyəsi də xeyli artaraq 185 milyon dollara çatıb. Türkiyənin 11 mindən çox yük maşını Gürcüstandan Ermənistana keçib. Qlobal maliyyə böhranının hökm sürdüyü və müxtəlif ölkələrdə işsizliyin artdığı bir zamanda isə erməni-türk biznesi inkişafı şurasının vasitəçiliyi ilə 70 minədək erməni Türkiyədə işləyir. Yəni faktiki olaraq qeyri-rəsmi iqtisadi-ticarət əlaqələri mövcuddur. Amma bu, iqtisadi böhranla üz-üzə qalan, banklarda valyutaları belə tükənən Ermənistan üçün kifayət etmir. Yerevan üçün hələlik vəziyyətdən yeganə çıxış yolu Türkiyəylə sərhədlərin açılması, türk iş adamlarının sərmayələrinin ölkəyə cəlb olunmasıdır. Bu isə, diplomatik əlaqələr bərpa olunmadan mümkün deyil. Son proseslər isə göstərir ki, Ermənistan rəsmilərinin istəkləri artıq reallaşmaq üzrədir. Ehtimal ki, Türkiyənin xarici işlər naziri Əli Babacanın apreldə baş tutacaq Ermənistan səfərində də iki ölkə arasında diplomatik münasibətlərin qurulması və sərhədlərin açılması məsələsi müzakirə olunacaq. Türkiyə hökumətinin Ermənistanla münasibətlərədə Qarabağ şərtindən imtina etməsi barədə məlumatların ardınca sərhədlərin açılması xəbərinin yayılması proseslərin heç də yaxşı məcrada inkşaf etmədiyini göstərir. Babacanın da məhz aprel ayında Ermənistana səfərə getməsi isə təsadüfi sayıla bilməz. Görünür Türkiyə bununla aprelin 24-də ABŞ-da qondarma «erməni soyqırımı»-nın tanınmasının qarşısını almağa çalışır. Xarici işlər nazirinin Türkiyənin «Axşam» qəzetinə açıqlması da bunu təsdiq edir. O bildirib ki, əgər «soyqırım» tanınarsa, bu, ABŞ ilə Türkiyə arasındakı strateji münasibətlərə ciddi zərbə vuracaq. Hadisələrin bu cür inkişafının Ankara, Yerevan və Bakı arasında aparılan danışıqlara da zərbə vuracağını bildirən Əli Babacan deyib: «1915-ci ildən bu tərəfə ermənilərlə münasibətlərimiz ən yaxşı səviyyədədir. Problemlərin həllinə çox yaxınıq. Belə bir fürsət bir daha ələ düşməz». Babacanın dediyi kimi, belə bir fürsət bir daha ələ düşməz. Təbii ki, Türkiyədən daha çox ermənistan üçün…