"Vəli Küçüklə qohumluğumuz yoxdur" Elçibəyin qardaşı Almurad Əliyev: Bəy kiminsə köməyi ilə hakimiyyətə gəlmək istəsəydi, heç hakimiyyətdən getməzdi Türkiyənin bəzi xəbər agentliklərinin məlumatına görə, "Ergenekon məsələsi" çərçivəsində keçirilən əməliyyat zamanı bir gecəqonduda həbs olunan İsaq adlı şəxs 20 il əvvəl Azərbaycanın eks-prezidenti, mərhum Əbülfəz Elçibəyin mühafizəçisi olduğunu bildirib. aktifhaber.com saytının xəbərində qeyd olunur ki, "Ergenekon" 1995-ci ildə Azərbaycanda çevriliş həyata keçirmək istəyib. "Həmin çevrilişlə general Vəli Kiçik qohumu olan Elçibəyi yenidən hakimiyyətə gətirməyi planlaşdırıb". Elçibəyin İsaq adlı mühafizəçisi olubmu? Eks-prezidentin 1995-ci ildə çevriliş sayəsində hakimiyyətə gətirilməsi xəbəri nə dərəcədə realdır? Bu və başqa suallarla Ə.Elçibəyin qardaşı Almurad Əliyevə müraicət etdik. - Siz hansısa dönəmdə Əbülfəz Elçibəyin İsaq adlı mühafizəçisini tanımısınzmı? - Azərbaycanda milli azadlıq hərəkatı başlayan dövrdən Bəy dünyasını dəyişənədək onun mühafizəsində durublar. Amma şəxsən mən o adda mühafizəçi tanımamışam. Prezidentliyə qədər və Kələkiyə gedəndən sonra Bəyi cəbhəçilər və yaxın qohum-əqrəbadakı uşaqlar qoruyurdu. Prezident olarkən onu Azərbaycanın Baş Dövlət Xüsusi Mühafizə İdarəsi qoruyub. Türkiyə mətbuatında səsləndirilən ad isə mənə tanış deyil. - Türkiyədən gələnlər Kələkidə nə qədər qaldılar? - Bəy 4 il 4 ay Kələkidə qaldı, onlar da bu müddətdə Bəyi mühafizə etdilər. Təbii ki, bir-birlərini əvəz edirdilər. 1997-ci ilin oktyabrında Bəy Bakıya qayıtmazdan bir neçə gün qabaq onları yola saldı, texnikalarını, ratsiyalarını da götürüb getdilər. Bilirsiniz, indi Türkiyədə kimlərsə məqsədyönlü şəkildə ağıllarına gələni yazırlar, bizim qəzetlər də ölçüb-biçmədən onların yazdıqlarını götürüb, "kopyalayırlar". O mühafizəçilər, elə-belə, öz istəkləri ilə Kələkiyə gəlməmişdilər, dövlət statusunda idilər. - Türkiyədə bir sıra media dairələri "Ergenekon" işi ilə bağlı həbsdə olan general Vəli Küçük Paşanın Elçibəylə, yəni sizinlə qohum olduğunu yazırlar. Onunla hansısa qohumluq əlaqəniz varmı? - Birincisi, yüz faiz əminliklə deyirəm ki, Vəli Küçük Paşa çox təmiz, millətini sevən və milləti üçün ölmüə hazır olan bir generaldır. Bir şey yadımdadır, Qarabağ müharibəsinin qızğın vaxtında o gəlib ermənilərə qarşı vuruşmaq istəyirdi. Amma Bəy razı olmurdu ki, bu müharibəyə Türkiyəni qatmamalıyıq. Çünki o zaman bir çox xarici qüvvələr Türkiyənin bu müharibəyə girməsində maraqlı idilər. Vəli Küçük belə millətsevər adam idi. Onunla bizim qohumluğumuza gəlincə, mən durum yalandan deyim ki, bəli biz qohumuq, bu düzgün iş deyil axı. Sabah bunu yoxlayarlar. Bir də ki, Vəli Küçük Paşa kimi bir kişi ilə qohum olmaq eyibdirmi? Amma onun bizimlə heç bir qohumluğu olmayıb. Düzdür, mən onu tanıyıram. Bəy rəhmətə gedəndən sonra ona verilməli olan bir mükafatı mən getdim Türkiyəyə qəbul etdim. Orada hamısı ilə görüşdüm. Bir deyildi, iki deyildi... Məni 25 gün də qonaq saxladılar. Vəli bəy çox gözəl insandır. İndi bu adamı elə təqdim edirlər ki, deyirsən dünyada ən təhlükəli adamdır. Mən Türkiyədə çox adam tanıyıram. İndi sabah onlardan birinin başına iş gələndə mənimlə əlaqələndirməlidirlər? Bəyin yanına Türkiyədən yüzlərlə adam gəlirdi. Onların içində alimlər də, siyasətçilər də, gənclər də vardı. Bəy də onların hamısını öz millətinin övladı kimi bağrına basıb öpürdü. İndi kimisə orada tutub içəri atanda bunun Bəyə nə aidiyyatı var? 2000-ci ildə Bəy Türkiyəyə səfər edəndə indiki baş nazir Ərdoğan da onunla görüşə gəlmişdi. İndi də Türkiyədən gəlib Azərbaycanın dövlət başçısı İlham Əliyevlə görüşürlər. Sabah o adamı tutanda deyəcəklər ki, Azərbaycanın başçısı ilə görüşüb? Bunlar hamısı duzsuz, xırda, yüngül şeylərdir. Bəzən bizim adamlar da tez bu xəbərlərin təsirinə düşürlər. - "Ergenekon" məsələsində Elçibəyin adının hallandırıldığı məsələlərdən biri də budur ki, "Ergenekon" 1995-ci ildə Azərbaycanda çevriliş həyata keçirib Elçibəyi yenidən hakimiyyətə gətirmək istəyirmiş... - Bəy kiminsə köməyi ilə hakimiyyətə gəlmək istəsəydi, heç hakimiyyətdən getməzdi. O, 1992-ci ildə xalqın səsi ilə iqtidara gəldi. Sonra xarici qüvvələrin əli ilə devrildi. Xalqın dəstəyindən başqa Bəy heç bir qüvvəyə söykənərək hakimiyyətə gəlməyi düşünməyib. Əgər o, hakimiyyət hərisi olsaydı, elə 1993-cü ildə prezidentlik uğrunda qan tökərdi də. Onu dəstəkləyən hansısa qüvvə vardısa, Bəyə deyərdi ki, heç yana getmə, biz burdayıq. Ya da gəlib kömək edərdilər. Bilirsiniz, çox şeyləri yalan yazırlar. Heç Bəyin xidmətlərini demirlər. Nə qəzetlər deyir, nə camaat deyir, nə hökumət. Bəy çevrilişlə, qan-qada ilə hakimiyyətə gəlmək istəsəydi, heç getməzi də. Prezident kimi oturmuşdu yerində. O heç kimdən kömək istəmirdi. İstəsəydi, kimisə çağırardı ki, gəlin mənə kömək edin. Bunlar hamısı, boş, cəfəngiyyat şeylərdir. - "Ergenekon" məsələsini Türkiyədə bir qüvvənin digərini sıxışdırmaq cəhdi kimi qiymətləndirirlər. Sizcə, bu məsələdə Elçibəyin adının hallandırılması hansı məqsədi güdür? - Bunların beyinlərinə girir deyirlər, yazırlar. Uşaq-muşaq söhbətidir. Bəyin adını çəkməklə guya öz arqumentlərini bir qədər əsaslandırmaq istəyirlər. Bəy istəməzdi ki, Azərbaycanda bir uşağın da burnu qanasın, ölkədə skandal olsun, çevriliş olsun. - Ymumiyyətlə, bu "Ergenekon" işi ilə bağlı şəxsi qənaətiniz necədir? - Vallah, açığı deyim ki, bu "Ergenekon" sözü nədir, mən heç onun mənasını bilmirəm. Və bu məsələyə inanmıram ki, o boyda generallar xırda işlərlə məşğul olsunlar. Yayılan bu xəbərləri də gülünc hesab edirəm. Kimin kiminlə ədavəti varsa, onu "Ergenekon"la bağlayır. - Eks-prezidentlərin statusu haqda məsələnin referendumda qəbulu gözlənilir. Bu məsələ ilə yenə maraqlanırsınızmı? - Bütün bu məsələlər prezidentin səlahiyyətindədir. Özü necə məsləhət bilsə, elə də olar. Mən bir məsələni hər dəfə qaldırmaq istəmirəm. Durub hökumətlə hökumətlik etməyəcəyik ki? Haqq var, yuxarıdan Allah baxır. - Bildiyimizə görə, Elçibəyin oğlu hərbi xidmətdədir. Necə keçir xidmət? - Bəyin öz arzusu bu idi ki, oğlu alitəhsilli bir zabit olsun. Bəy rəhmətə gedəndən sonra mən qoymadım. Çünki bədəncə həm zəif idi, həm də tək olduğu üçün Türkiyəyə getməsinə razı olmadım. İnstitutu qutarıb, əsgərliyini də çəkib gələndən sonra hara istəyər gedər. Xidməti də yaxşı keçir. Axı, hərbidə qəşəng qulluq edənə kim nə deyəsidir... Aqil CAMAL turkustan