AKP HÖKUMƏTİ ERMƏNİSTANLA DANIŞIQLARI AZƏRBAYCANDAN GİZLİ APARMAĞA BAŞLAYIB Rəsmi Bakı Ankaradan konkret cavab ala bilmir Rəsmi Bakı Türkiyə hökumətinin Ermənistanla aparılan danışıqlar zamanı hansı mövqedən çıxış etdiyini bilmir. Xəbər verildiyi kimi, ilk dəfə Azərbaycandan rəsmi şəxs Türkiyənin yanaşmasından narahatlıq ifadə edib. Prezidentin İcra Aparatının şöbə müdiri Əli Həsənov deyib ki, Ankaranın İrəvanla münasibətlər qurmaq üçün Qarabağ münaqişəsinin həllini artıq şərt kimi irəli sürmədiyi haqda onlar da mətbuatdan məlumatlıdır. Eyni zamanda Türkiyənin bu məsələyə indiyədək aydınlıq gətirməməsi də diqqətlə izlənilir. Ə.Həsənov hökumətdə xarici siyasətlə məşğul olmasa da, bu açıqlama hər halda təsdiq edir ki, Azərbaycan hakimiyyətində Türkiyənin mövqeyindən narahatlıq var. Çünki baş nazir Rəcəb Tayyib Ərdoğan ölkəsinin Qarabağ münaqişəsinə dair rəsmi mövqeyində dəyişiklik olmadığını deyib, ancaq münaqişə həll edilmədən İrəvanla münasibətlərin qurulub-qurulmayacağına aydınlıq gətirməyib. Daha sonra Türkiyənin Bakıdakı səfirliyi açıqlama yayaraq Ermənistanla Azərbaycan və Ermənistanla Türkiyə arasında danışıqlar prosesinin davam etdiyi bir vaxtda bu kimi xəbərlərə şərh verməyin düzgün olmadığını ifadə edib. Dünən məsələyə münasibət bildirən Xarici İşlər Nazirliyinin nümayəndəsi Xəzər İbrahim isə Ərdoğanın bəyanatına istinad edərək Türkiyənin mövqeyində hansısa dəyişikliyin baş verdiyinin müşahidə edilmədiyini deyib. Lakin bu açıqlamadan da görünür ki, rəsmi Bakı Türkiyənin Ermənistanla danışıqlarda hansı xətt seçdiyi haqda ancaq müşahidə əsasında danışır. Yəni Azərbaycan tərəfi Türkiyənin Ermənistanla apardığı danışıqların detalları haqda ən azı xəbərsizdir. Belə məlumatsızlığın fonunda Ankaranın Qarabağ şərtindən geri çəkildiyi, ancaq “soyqırım” məsələsinin araşdırılması üçün tarixçilər səviyyəsində birgə komissiyanın qurulmasına razılıq veriləcəyi halda İrəvanla münasibətlər qurmağa hazır olduğu haqda xəbərlər yayılır. Türkiyənin Ermənistanla apardığı müzakirələrin detallarının hamısı rəsmi Bakıya çatdırılmasa da hər dəfə Ankara belə təmaslardan sonra Azərbaycan tərəfi ilə əlaqə saxlayır. Görünür, rəsmi Bakı inandırmağa çalışır ki, Qarabağ münaqişəsi həll edilmədən İrəvanla münasibətlər qurulsa bunun münaqişənin həllinə daha çox köməyi dəyə bilər. Nəzəri baxımdan bəlkə də belədir, ancaq praktiki və strateji baxımdan Türkiyənin bu yanaşması Azərbaycan üçün kifayət qədər təhlükəlidir. Çünki Ermənistan Türkiyə ilə sərhədlərini açaraq öz iqtisadiyyatını inkişaf etdirmək imkanı qazanacaq, deməli, mövqelərini daha da möhkəmləndirəcək. Lakin Türkiyədəki AKP iqtidarını indi Azərbaycanın maraqlarından çox Avropa Birliyi ilə münasibətlər və Cənubi Qafqazda Rusiya ilə ortaq şəkildə siyasi mövqelərini möhkəmləndirmə məsələsi maraqlandırır. Artıq Avropa Birliyi Türkiyənin Ermənistana güzəştinin əvəzi hesab edilə biləcək addım atıb. Brüsseldə qərara alıblar ki, Türkiyə vətəndaşlarına AB ölkələrinə vizasız daxil olmaq imkanı verilsin. Bu, Türkiyə üçün mühüm qərardır. AB neçə vaxtdır Türkiyənin qarşısında Ermənistanla münasibətlər qurmaq və sərhədləri açmaq məsələsini qoyurdu. AKP iqtidarı Avropadan və Qərbdən verilən dəstək sayəsində hakimiyyətə gəldiyinə və möhkəmləndiyinə görə Brüsselin erməni məsələsi ilə bağlı şərtlərini də həvəslə yerinə yetirir. Təsadüfi deyil ki, əvvəllər Türkiyəni insan haqlarının və demokratik normaların pozulmasına görə tez-tez tənqid edən Avropa indi AKP iqtidarı tərəfindən müxalif düşərgədə olanların açıq-aşkar sıxışdırılması, söz azadlığına qarşı təzyiqlərə, fərqli mövqedə olanların ciddi dəlil olmadan aylarla həbsdə saxlanılmasına göz yumur. Bu baxımdan AKP iqtidarı üçün Azərbaycanın maraqlarının Ermənistanla münasibətlərə qurban verilməsi təhlükəsi yeni yaranmayıb. Əgər Türkiyə narahatlıq doğuran həmin addımı atsa və Qarabağ məsələsində güzəştə getsə o zaman Azərbaycanın da öz siyasətinə yenidən baxmaq zərurəti yaranacaq. Bura Türkiyə ilə münasibətlərdə korrektələrin edilməsi ilə yanaşı Qarabağın hərbi yolla azad edilməsi variantı da daxil ola bilər. Azərbaycan rəhbərliyi bu variantın masa üzərində olduğunu hərə dəfə bəyan edir. musavat