Tehranla Ankara arasında qaz mübahisəsi dərinləşir

SON XƏBƏRLƏR

Tehranla Ankara arasında qaz mübahisəsi dərinləşir

2021.10.20, 07:36

Gunaz.tv

GünAz TV: İranla Türkiyə arasındakı qaz mübahisəsi dərinləşir. Rəsmi Ankara yenidən beynəlxalq arbitraj məhkəməsinə şikayət etmək niyyətindədir.

İran, Türkiyəyə satdığı mavi yanacağın qiymətini artırmaqla yanaşı, həcmi azaldıb. Enerji və təbii sərvətlər naziri Taner Yıldız bildirib ki, bununla Tehran, iki ölkə arasındakı 1996-cı il müqaviləsinin şərtləri pozub. İran 2011-ci ildə gündəlik təchizatı 6 milyon kub-metr (metr-i mükəəb) azaldaraq, qiymətləri 12 faiz artırıb. Rəsmi Tehran hələlik Türkiyənin tələbinə məhəl qoymur. «Göstəriş olmasa, qazın qiymətini aşağı sala bilmərik» İranın neft naziri Rüstəm Qasımi belə deyib. Türkiyə yenidən Beynəlxalq Arbitraj (qəzavət) Məhkəməsinə müraciət etmək niyyətindədir. Yaranmış qaz mübahisəsi yaxın günlərdə yenidən müzakirə olunacaq. Razılıq əldə olunmasa, Türkiyənin alternativ variantı (seçənək) var - bu, Azərbaycan qazıdır.

Hazırda Azərbaycan qazının kifəyət qədər alıcısı var. Digər tərəfdən qaz müqaviləsinin reallaşması üçün azı 5 ilə ehtiyac olduğunu nəzərə alsaq, rəsmi Ankara Tehranın diktə etdiyi qiyməti ödəməli olacaq. Əks halda daxili qaz bazarında xaos (hərc-mərc) yarana bilər.

Xatırladaq ki, Türkiyənin mavi yanacağa olan illik tələbatı 40 milyard kub-metrə yaxındır. Ölkə, ehtiyacının 60 faizini Rusiya hesabına ödəyir. Türkiyə hər il bu ölkədən 20 milyard kub-metr mavi yanacaq alır. İran isə Türkiyəyə 10 milyard kub-metr qaz satır. Tələbatın 6 milyard kub-metrini isə Azərbaycan ödəyir. Qalan həcm isə maye halında Afrika ölkələrindən idxal edilir.

GUNAZ.TV

SON XƏBƏRLƏR