Zamiq Məmmədli: “Təəssüf ki, Çexiyada Azərbaycan diaspor qurumları arasında birlik hiss olunmur”

SON XƏBƏRLƏR

Zamiq Məmmədli: “Təəssüf ki, Çexiyada Azərbaycan diaspor qurumları arasında birlik hiss olunmur”

2021.10.20, 07:36

Gunaz.tv

GünAz TV mətbuat mərkəzinin növbəti müsahibi, Çexiyada yaşayan Azərbaycanlı siyasi şərhçi Zamiq Məmmədlidir.

- Çexiyanın Cənubi Qafqaz siyasətini necə dəyərləndirirsiniz?

- Çexiyanın rəsmi Cənubi Qafqaz siyasəti üzv olduğu Avropa Birliyindən ilk baxışda o qədər də fərqlənmir. Başqa dövlətlər kimi Çexiyanın da Cənubi Qafqaza dair öz maraqları var, amma Cənubi Qafqaz ölkələri arasında Gürcüstanda Çex şirkətlərinin sərmayəsi və Çexiyanın bir ölkə kimi iqtisadi maraqları daha çoxdur.

- Çexiyada Qarabağ məsələsinə baxış hansı səviyyədədir?

- Çex Respublikası (Cümhuriyyəti) rəsmi olaraq Azərbaycanın ərazi bütövlüyünü tanıyır ancaq Qarabağda yaşayan erməni əhalisini haqqlarını müdafiə etməklə, Dağlıq Qarabağı Azərbaycan ərazisində erməni anklavı (mühasirə olunmuş) kimi qələmə verir.

- Nədən Çexiya Ermənistan dəstək verir və bu iki dövləti bir-birinə nə bağlayır?

- Bu dəstək birbaşa deyil, amma Ermənistan və Çexiya müdafiə nazirlikləri arasında bağlanmış müqaviləyə əsasən Ermənistan ordusunun zabitləri (əfsərləri) hər il Çexiyanın Vişkov şəhəri yaxınlığındakı hərbi bazada (payqahda) təlimlər keçir.

Belə bir dəstəyin olmasında dini və mədəni bağların yüksək olması da rol oynayır və bu məsələdə Azərbaycan diplomatiyasının və diasporunun da nöqsanları var.

- Çexiyada Azərbaycan diasporunun fəaliyyəti qənaətbəxş hesab etmək olarmı və soydaşlarımızın təşkilatanması necə gedir?

- Çexiyadakı azərbaycanlılar təəssüf ki, kiçik qruplar halında iki müxtəlif diaspora təşklilatına bölünüblər və aralarında müəyyən ziddiyyətlər mövcuddur. Təşkilatlanma yüksək səviyyədə deyil, ildə 2 dəfə Azərbaycanın Praqadakı səfirliyinin müəyyən dəstəyi ilə 5-10 nəfərlik kiçik aksiya (göstəri) və ya ziyafət təşkil etmək hələ təşkilatlanmaq demək deyil. Çexiyada yaşayan bir çox azərbaycanlılar birmənalı qəbul olunmayan bu diaspora qruplarının heç birisi ilə əlaqə və münasibət qurmaq istəmirlər.

Təəssüf ki, bu məsələdə rəqib saydığımız erməni diasporundan çox şey öyrənməliyik, ən azından birlik, bərabərlik və həmrəylik məsələsində...

Söhbətləşdi: Elnur Eltürk

GUNAZ.TV

SON XƏBƏRLƏR