İranın nüvə proqramına qarşı qətnamə təsdiqləndi

SON XƏBƏRLƏR

İranın nüvə proqramına qarşı qətnamə təsdiqləndi

2024.11.22, 09:50

Beynəlxalq Atom Enerjisi Agentliyinin Qəyyumlar Şurası Almaniya, Böyük Britaniya və Fransanın İranın nüvə proqramına qarşı təklif etdiyi gözlənilən qətnamə qəbul edib.

Gunaz.tv

Qətnamə 19 lehinə, 12 bitərəf və 3 əleyhinə səslə təsdiq edilib.

Rusiya, Çin və Burkina Faso üç Avropa ölkəsinin təklif etdiyi qətnamənin əleyhinə səs verib.

Bu, Qəyyumlar Şurasının son iki ildə İran əleyhinə qəbul etdiyi ikinci qətnamədir.

Qəyyumlar Şurasının qətnaməsinin təsdiqindən bir neçə saat əvvəl bu üç Avropa ölkəsi birgə bəyanatda İranın zənginləşdirilmiş uran ehtiyatlarının dərhal 60% səviyyəsinə endirilməsini tələb ediblər.

Beynəlxalq Atom Enerjisi Agentliyinin Qəyyumlar Şurasının yeni qətnaməsində İrandan növbəti dəfə elan olunmamış yerlərdə uran izlərinin aşkarlanması ilə bağlı BAEA-nin uzun müddətdir davam edən suallarına dərhal etibarlı izahat verməsi tələb olunub.

Həmçinin qətnamədə agentliyin baş direktoru Rafael Qrossiyə İranın nüvə fəaliyyətinin vəziyyəti ilə bağlı ətraflı hesabat hazırlamaq və onu İdarə Heyətinin növbətinin 2025-ci ilin martındakı iclasına baxılmaq üçün təqdim etmək istənilib.

Agentliyin Qəyyumlar Şurasının qətnaməsinə ilk reaksiyasında İran daha qabaqcıl sentrifuqları işə salacağını açıqlayıb.

BAEA-nin Qəyyumlar Şurasının qərarının xəbərinin dərcindən dərhal sonra İran mediası "Xarici İşlər Nazirliyi və İranın Atom Enerjisi Təşkilatının birgə bəyanatı”nı dərc edib.

Birgə bəyanata əsasən, İranın Enerji Təşkilatının rəhbəri "müxtəlif tipli çoxlu sayda yeni və qabaqcıl sentrifuqların işə salınması da daxil olmaqla, təsirli tədbirlərin görülməsinə göstəriş verib".

Qeyd edək ki, Tehranın Beynəlxalq Atom Enerjisi Agentliyinin müfəttişlərinin İrana səfərinin qarşısını alması və İranın elan olunmamış ərazilərində aşkar edilmiş uran izləri ilə bağlı dəqiq izahat verməməsi agentliklə Tehran arasıda mübahisəli məsələlərdən birinə çevrilmişdi.

GünazTV

GUNAZ.TV

SON XƏBƏRLƏR