Qətərli vasitəçilər Tehrana gediblər

SON XƏBƏRLƏR

Qətərli vasitəçilər Tehrana gediblər

2026.07.10, 19:03

Reuters xəbər verir ki, Qətərin vasitəçi heyəti gərginliyin azaldılması məqsədilə ABŞ ilə koordinasiyalı şəkildə Tehranda danışıqlar aparır.

Gunaz.tv

Gunaz TV-nin məlumatına görə, Reuters cümə günü məlumatlı mənbəyə istinadən yazıb ki, Qətərli danışıqlarçılar İran rəsmiləri ilə görüşmək, gərginliyi azaltmaq və danışıqların davamı üçün şərait yaratmaq məqsədilə İrandadırlar.

Məlumata görə, Doha ilə Tehran arasında aparılan danışıqlar “ABŞ ilə koordinasiyalı şəkildə” həyata keçirilir.

Mənbənin bildirdiyinə görə, danışıqların məqsədi ABŞ ilə İran arasında əldə olunmuş anlaşmanın icrasını müzakirə etmək, eləcə də Vaşinqton və Tehran arasında son gərginliyin artmasına səbəb olan məsələləri, o cümlədən Hörmüz boğazında gəmiçiliyə dair fikir ayrılıqlarını nəzərdən keçirməkdir.

Bundan bir neçə saat əvvəl Axios saytı da xəbər vermişdi ki, Qətər, Pakistan və Türkiyə, Misir, Səudiyyə Ərəbistanı da daxil olmaqla bir sıra regional vasitəçilər ABŞ ilə İran arasında gərginliyin daha da artmasının qarşısını almağa və nüvə danışıqlarını qorumağa çalışırlar.

“The New York Times” qəzeti də iki məlumatlı rəsmiyə istinadən yazıb ki, Qətər gərginliyin azaldılması məqsədilə eyni vaxtda həm ABŞ, həm də İranla danışıqlar aparır.

Bu diplomatik təşəbbüslər ABŞ Prezidenti Donald Trampın çərşənbə günü İranın Hörmüz boğazında bir neçə gəmiyə hücumundan sonra ABŞ ilə İran arasında əldə olunmuş anlaşma və atəşkəsin “başa çatdığını” bəyan etməsi və daha geniş hava zərbələri endirilməsi barədə göstəriş verməsindən sonra daha da intensivləşib.

Məlumatlara görə, çərşənbə axşamı və çərşənbə günü axşam saatlarında həyata keçirilən hava hücumları İranın cənub və şimalındakı infrastruktur obyektlərini hədəfə alıb və nəticədə bir neçə nəfər həlak olub.

Buna cavab olaraq İran da Küveyt, Bəhreyn və İordaniyadakı ABŞ bazalarına hücumlar həyata keçirib.

Gunaz TV
R.G

GUNAZ.TV

SON XƏBƏRLƏR