Tramp Hörmüz boğazı ilə bağlı ABŞ siyasətinin dəyişdiyini açıqladı

SON XƏBƏRLƏR

Tramp Hörmüz boğazı ilə bağlı ABŞ siyasətinin dəyişdiyini açıqladı

2026.07.14, 19:34

Tramp: Hörmüz boğazında 20 faizlik rüsumu ticarət və investisiya razılaşmaları ilə əvəz edəcəyəm.

Gunaz.tv

Gunaz TV-nin məlumatına görə, ABŞ Prezidenti Donald Tramp Hörmüz boğazından keçən gəmilər üçün nəzərdə tutulan 20 faizlik rüsumun ləğv ediləcəyini və bunun əvəzinə Fars körfəzi ölkələrinin ABŞ-da həyata keçirəcəyi ticarət və investisiya razılaşmalarının tətbiq olunacağını açıqlayıb.

Tramp çərşənbə axşamı “Truth Social” sosial şəbəkəsində paylaşdığı mesajda müdafiə naziri Pit Heqsetə, Birləşmiş Qərargah Rəisləri Komitəsinin sədri Den Keynə və CENTCOM komandanı Bred Kuperə təşəkkür edərək yazıb: “Onların və dünyanın ən güclü ordusunun bütün üzvlərinin səyləri sayəsində Hörmüz boğazı, İran istisna olmaqla, bütün gəmilər üçün tam açıqdır.”

O əlavə edib: “Boğazın İran üçün bağlanmasının səbəbi ölkəni tam məhvə aparan yalançı, qəddar və bədniyyətli rəhbərlikdir.”

ABŞ Prezidenti İrana qarşı dəniz blokadasının yenidən tətbiqinə toxunaraq bildirib: “Biz tam blokada tətbiq edəcəyik, lakin bu yalnız İran limanlarına gedib-gələn və ya İranla əlaqəli hər hansı yük daşıyan gəmilərə şamil olunacaq.”

Tramp Hörmüz boğazından keçid üçün nəzərdə tutulan 20 faizlik rüsum qərarını dəyişdiyini də açıqlayaraq yazıb: “Yaxın Şərq liderləri ilə çox məhsuldar danışıqlardan sonra qərara gəldim ki, ABŞ-a ödənilməsi nəzərdə tutulan 20 faizlik rüsumu Fars körfəzi ölkələrinin ABŞ-da həyata keçirəcəyi ticarət və investisiya razılaşmaları ilə əvəz edim.”

O vurğulayıb: “Bu investisiyalar çox böyük olacaq və eyni zamanda onların özləri və gələcəkləri üçün də son dərəcə faydalı olacaq.”

Tramp həmçinin yazıb: “Amerika yenidən qalib gəlir – özü də görünməmiş bir qələbə qazanır. İranın yüz minlərlə insanı, o cümlədən 52 min etirazçını öldürdüyü günlər artıq geridə qalıb və ən əsası, İran heç vaxt nüvə silahına sahib olmayacaq!”

Gunaz TV
R.G

GUNAZ.TV

SON XƏBƏRLƏR