ARAŞ İRAN BAYRAĞINI QALDIRACAQ? Diaspor üzvləri "kosmopolit yaxud rusofil mühitdə yetişənlər"in bu kimi məsələləri anlamadıqlarını təbii sayırlar Artıq məlumat verildiyi kimi, bu ilin mayında "Eurovision-2009" mahnı yarışması keçiriləcək. Həmin müsabiqədə ölkəmizi təmsil edəcək mahnının müəllifi Araş Labbafla bağlı müzakirələr davam etməkdədir. Təbii ki, Azərbaycanı sevən bütün insanlar - buranı özü üçün vətən bilən və çeşidli səviyyələrdə onun təəssübünü çəkənlər ölkəmizin uğur qazanmasını istəyir, bu yolda fəaliyyət göstərirlər. Onlara uğurlar arzulayırıq. Amma şəffaflıq olmayan məsələlərdə həmişə bir "amma" olur. Görünür, mahnının seçimi ilə bağlı məsələ də müəyyən "amma"lar yaradıb... Yarışın qaydalarına əsasən, ölkəmizin vətəndaşları öz təmsilçimizə səs verə bilmədiyindən bu işin müəyyən bir hissəsi diaspor təşkilatlarının, eləcə də mühacirətdəki güneyli-quzeyli azərbaycanlıların üzərinə düşür. Heç kimə o da sirr deyil ki, say etibarilə güneyli mühacirlər üstünlük təşkil edirlər. Milli-mədəni məsələlərdə onlar daha fəal olduqlarından bu yarışmada Araş Labbafın mahnısının oxunması güneyli soydaşlarımızın haqlı narahatlığına səbəb olub. Çünki həmin insanlar fars şovinizminin mahiyyətini, habelə mədəniyyət məsələlərindən belə qüvvələrin necə yararlandıqlarını daha yaxşı anlayır. Axı 35 milyonluq Güney Azərbaycan türkünə məhz bu sahədə daha çox basqı edilir. Araş barəsində isə az qala hər gün yeni məlumatlar, rəylər yayılır. Kanadanın Vankuver şəhərində yaşayan Hilal adlı soydaşımızın yazısı da bu barədədir. Hilal yazır: "Adam burnunu hər yerə soxmaq istəmir. Bilməyən deyə bilər ki, bunların işi-gücü yoxdur, oturub vaxtlarını öldürmək üçün onu-bunu qurdalayırlar. Belələrinə demək istəyirik ki, işlər yolunda olsaydı, bizlər də bütün işlərimizdən əl çəkib bizə dəxli olmayan işlərlə məşğul olmazdıq. Azərbaycanın "Eurovision" mahnı yarışmasına qatılması Vətənimizin tanıdılması baxımından hamımızı, özəlliklə biz güneyliləri çox sevindirmişdi. Doğrusu, yarışmanın getdikcə siyasi cəhətdən yüklənməsi müstəmləkədən qurtulmuş ölkələrə özlərini tanıtdırmaqda bir güvənc yeridir. Quzey Azərbaycanda məsul vəzifə tutan kosmopolit yaxud rusofil mühitdə yetişənlər bu kimi məsələlərin dərinliyini anlamaya bilər. Amma işğalçılığa, assimilyasiyaya, müstəmləkəyə qarşı müqavimət göstərən, "fars", "iranlı" adı altında əzilən biz güneylilər belə mövzulara daha həssasıq. Bu gün fars şovinizmi Azərbaycan türkü kimi bizim milli varlığımızı danır, bütün vasitələrdən yararlanaraq bizə qarşı savaşır, bizləri yox etməyə çalışır. Biz isə buna qarşı dayanır, panfarsizmin filmlərini, qəzetini, kitabını, sözünü, ad-sanını, dilini, bir sözlə, hər şeyini bu şovinizmin silahı qismində görürük. Vətənimiz Azərbaycan beynəlxalq səviyyəli istənilən tədbirə qatılanda bundan təsirlənən Güney Azərbaycan türkü əzilmiş, tapdanmış psixologiyası ilə belə məsələləri dəyərləndirir, uşaq kimi sevinir, uğursuzluğa üzülür. Builki "Eurovision"da vətənimiz adından bir fars çıxış edəcək. Biz fransız, alman, italyan və s. olsaydıq, ölkəmizin adından yadelli birisi çıxış edərkən buna qarşı çıxmazdıq. Ancaq biz Azərbaycan türküyük, panfarsistlər isə millətimizin düşmənidir... Araşın adını indiyə qədər eşitməmişdim. Ancaq sonra öyrəndim ki, rusdilli çevrələrdə özünə ad-san qazanıb. Bu səbəbdən də deyirlər ki, o, uğur qazanacaq. Bu bir alverçi düşüncəsidir. Farsların parlayan ulduzuna göz tikmək bizlərə yaraşmaz. Qoyun getsin farslara, ya da çörəyini yeyib pasportunu daşıdığı isveçlilərə uğur qazandırsın. Onun özünə "fars, fars" deməsini nəzərə almayanlar Araşdan azərbaycanlı, güneyli yaratmağa çalışırlar". Müəllif yazır ki, Araş Labbaf İsfahanın Əhmədabad məhəlləsində məskunlaşmış məşhur Labbaf tayfasındandır. "Tehran rejiminə müxalif Xalq Mücahidləri Təşkilatının üzvü, şah dönəmində öldürülümüş Səməd Labbaf da bu tayfa-tirədən idi. Araş farsdır. Özü də bunu qürurla söyləyir. Onun saytında belə də yazılıb: "Araş "Eurovision-2009" yarışmasına öz damğasını bir fars olaraq vuracaq. Aysel Araşın doğma yurdu İranın qonşusu olan Azərbaycandandır". Bunları gileylə yazan kanadalı mühacir soydaşımız bildirir ki, yarışmada İran adının ağırlıq basması indidən duyulur. Diaspor təşkilatlarının ehtiyat etdiyi başqa bir hal isə yarışmada Araşın İran İslam Respublikasının bayrağını qaldıracağı ehtimalıdır. Ötən gün Dünya Azərbaycanlılarının Haqlarını Müdafiə Komitəsi, Britaniya Azərbaycanlılar Kültür Ocağı, Britaniya Güney Azərbaycanlılar Təşkilatı Azərbaycanın bu ölkədəki səfiri Fəxrəddin Qurbanova müraciət göndərib. Orada bildirilib: "2009-cu ilin mayında "Eurovision" musiqi yarışmasında Azərbaycanın iştirakı 50 milyonluq Azərbaycan, özəlliklə Güney Azərbaycan üçün birləşdirici amil kimidir. Azərbaycanın səsinin dünya səviyyəsində eşidilməsi bizi qürurlandırır. Fikrimizcə, bu təşəbbüsə toxunmaq Azərbaycanda gedən birləşdirici qüvvəyə toxunmaq deməkdir. Təəssüf ki, bu il Azərbaycanın çıxışı düşündürücü əlamətlər ortaya çıxarıb. Biz, Güneydən olan diaspor qurumları tərəfindən narahatlığımızı sizin hüzurunuza çatdırmaq istərdik... Biz Aysel xanımın təmsilçiliyi ilə bir halda qürur duyarıq ki, o da onun oxuyacağı mahnının sözlərinin Azərbaycan dilində, bəstəkarın və ansambl üzvlərinin azərbaycanlı olmasıdır. Azərbaycana zəfər qazandırmaq üçün belə çatışmazlığa göz yummağı məqsədəuyğun saymırıq". Müəlliflər müraciətdə Araş Labbafın çıxışını məqbul saymır, bunu "Azərbaycanın milli heysiyyətinə toxunmaq" kimi dəyərləndirir, bu yöndə "xətaya yol veriləcəyi"ndən ehtiyatlandıqlarını bəyan edirlər. Diaspor qurumlarının təmsilçiləri Araşın "ultrairançı, farsçı" olduğunu səfirin diqqətinə çatdıraraq vurğulayırlar: "50 milyonluq Azərbaycan türkü, Azərbaycan dövləti adından çıxış şərəfinə layiq olan iştirakçı məhz Azərbaycan bayrağına bürünməlidir. Biz əminik ki, Araş İran bayrağına bürünmüş bir fərddir. O, Güney Azərbaycana və ya Azərbaycan diasporuna bağlı deyil. Bu yarışmada Azərbaycanla bağlı sınaqdan çıxmamış fərdlərin bu şərəfə nail olmasına imkan vermək təhlükəlidir... İctimai Televiziyanın rəhbərliyi və yaradıcı heyətinin verilişlərindəki vətənsevərlik diqqətəlayiqdir. Ancaq onların İranın ultrairqçi fərdlərinin Güney Azərbaycan adından Quzeydə "saman altından su yeritmək" niyyətindən xəbərsiz olması bizi təəssüfləndirir. Ümid edirik ki, bizi düşündürən səbəbləri nəzərə alıb İctimai Televiziyadan bu məsələlərlə bağlı təminat tələb edəsiniz. Bu təminatın elan olunmasına da şərait yaratmanızı xahiş edirik. Şəhriyar demişkən, "Sonrakı əfsus bərə bitirməz". Bu ciddi təhlükənin aradan qaldırılması üçün atacağınız addımlara görə öncədən təşəkkür edirik". Qeyd edək ki, məşhur bəstəkar Eldar Mansurov sözügedən məsələ ilə bağlı "Day.az"a müsahibəsində deyib: "Mən idmanda olduğu kimi, musiqidə də "legioner"lərin xidmətindən istifadə edilməsinin qatı əleyhinəyəm. Bizim kifayət qədər yaxşı bəstəkarlarımız olduğu halda, "legioner"lərə nə ehtiyac var? Onda gəlin Aysel Teymurzadənin yerinə Britni Spirsi götürək də... Yaxud Tom Consun xidmətlərindən yararlanaq. Belə çıxır ki, biz, sadəcə, bu qızın bacarığına əmin deyilik". S.SƏDRƏDDİN