İranın Hörmüz şərtləri razılaşma ümidlərini azaldıb

SON XƏBƏRLƏR

İranın Hörmüz şərtləri razılaşma ümidlərini azaldıb

2026.08.09, 12:25

Gunaz.tv

“The New York Times” qəzeti İran Milli Təhlükəsizlik Ali Şurasının katibi Məhəmməd Baqer Zülqədərin Hörmüz boğazının açılması ilə bağlı şərtlərinə toxunaraq yazıb ki, onun irəli sürdüyü tələblər Omanla razılaşma əldə olunması ilə bağlı ümidləri azaldıb. Belə bir razılaşma Hörmüz boğazı vasitəsilə ticarətin bərpasına və qlobal enerji qiymətlərinin aşağı düşməsinə imkan yarada bilərdi.

Qəzetin yazdığına görə, bu tələblər noyabr ayında keçiriləcək aralıq seçkilərdən əvvəl ABŞ-da istehlak qiymətlərinin aşağı salınmasını istəyəcəyi təqdirdə, Donald Tramp üzərində təzyiqi artıra bilər. Bu vəziyyət Respublikaçılar Partiyası üçün risk yarada bilər.

“The New York Times” həmçinin yazıb: “Tramp administrasiyasının bu tələblərlə razılaşması ehtimalı azdır. İyun ayında İran və ABŞ arasında əldə olunan əvvəlki atəşkəs razılaşmasında bildirilirdi ki, sanksiyalar yalnız İranın nüvə proqramı ilə bağlı yekun razılaşma əldə edildikdən sonra tamamilə ləğv ediləcək.”

“Los Angeles Times” da İranın Hörmüz boğazının açılması üçün irəli sürdüyü yeni şərtlərin bu su yolunun idarə olunması və gəmilərin hərəkəti ilə bağlı danışıqları daha da çətinləşdirə biləcəyini yazıb.

Qəzetin məlumatına görə, ABŞ dəniz mühasirəsinin başa çatmasından əvvəl Hörmüz boğazı ilə bağlı razılaşma əldə olunmasını istəyir. Tehran isə bu marşrutun açılmasını bir sıra siyasi, hərbi və iqtisadi tələblərin yerinə yetirilməsi ilə şərtləndirir.

“Los Angeles Times” həmçinin bildirib ki, yekun razılaşmanın əldə olunması üçün nəzərdə tutulan 60 günlük danışıqlar müddətinin başa çatmasına bir həftədən bir qədər çox vaxt qalıb. Bununla belə, qəzetin yazdığına görə, bu müddət uzadıla bilər və danışıqlar hələ də davam edir.

GunAz TV
R.G

GUNAZ.TV

SON XƏBƏRLƏR