GünAz TV: “Yaxınlarda Ermənistanda və diasporda tanınmış saytlardan biri Dovil bəyanatına münasibətdə Ermənistan Xarici İşlər Nazirliyinin “ev hazırlığı”nı həyata keçirdi. Rusiyalı ekspertlər (karşünaslar) Dovil bəyanatına guya indiki tənzimləmə modelinin regiona (bölgəyə) sülhməramlılar gətirdiyinə görə neqativ (mənfi) münasibət bildirdilər”.

Bu fikirlər Siyasi İnnovasiyalar (yeniliklər) və Texnologiyalar Mərkəzinin rəhbəri Mübariz Əhmədoğluna məxsusdur. Politoloq (siyasi şərhçi) bildirir ki, İran buna imkan verməyəcək: “İndiki tənzimləmə modeli Yenilənmiş Madrid Prinsiplərinə  (YMP) söykənir. YMP Helsinki yekun (nəhayi) aktının üç prinsipi (ilkəsi) və əlavə altı maddədən ibarətdir. Ermənistan dəfələrlə bəyan edib ki, YMP-ni danışıqlar aparmaq üçün əsas kimi qəbul edib. Üç prinsipli, altı maddəli tənzimləmə sənədinin altıncı maddəsi münaqişə regionuna sülhməramlıların yerləşdirilməsi ilə bağlıdır. Deməli, Ermənistanın qəbul etməyə hazırlaşdığı və dəfələrlə müsbət münasibət bildirdiyi sənəddə münaqişə regionuna sülhməramlıların gəlməsinə razılıq verilib, amma indi çalışır ki, sülhməramlılara razılıq verməsinin səbəbkarı kimi Azərbaycanı təqdim etsin. Sülhməramlılar məsələsindən istifadə edərək İranı Azərbaycanın üstünə qızışdırsın”.

 Mübariz Əhmədoğlunun fikrincə, İranda bir qrup rəsminin Ermənistana möhkəm dəstək vermələrinin məqsədləri Ermənistanı Azərbaycana qarşı alət kimi istifadə etməkdir: “İndi tərsi alınır: ermənilər İrandan alət kimi istifadə edərək onu Azərbaycana qarşı qızışdırmaq istəyirlər. Sülhməramlılar məsələsi isə hələ ki, “çiy” məsələdir. Avropa dövlətləri öz ölkələrindən kənara hərbi qüvvə göndərməkdən qorxurlar - NATO-nun İraq və Əfqanıstan kampaniyaları onları qorxutmuşdur. Ən yaxşı halda Dağlıq Qarabağ münaqişəsi regionuna 1000 nəfər özünümüdafiə üçün yüngül silahlanmış hərbi müşahidəçilər göndərilə bilər. Bu, Ermənistanın ciddi ekspertlərinə bəlli olduğu halda Ermənistanın Azərbaycana qarşı “qorxuducu” kimi İrandan istifadə etməsi İranın böyük dövlətçiliyinə baş ucalığı gətirmir. Əlbəttə, Ermənistanın belə davranışı əsassız deyil. İran-Ermənistan danışıqlarında erməni siyasətçilərinin İran rəsmilərinin dilindən eşitdikləri, İranın Azərbaycan və Türkiyə ilə bağlı dedikləri erməni siyasətçilərində iranlı siyasilərin cılız obrazını (simasını, vəchəsini) yaradıb. Eləcə də şəhid Mübariz İbrahimovun meyitinin İran tərəfindən istənilməməsi də Ermənistanda İranın dini və mental (ruhi-psixoloji) davranışındakı cılızlıq şübhəsinin yaranmasına ciddi əsas yaratdı. İş o yerə çatdı ki, İranın Ermənistana yük daşıyan maşınlarından hansısa birinin üzərində olan Azərbaycan bayrağının şəkilinə görə Ermənistanın tanınmış ekspert və siyasətçilərinin də olduğu dəstə İran maşın karvanını dayandırdılar, iranlı sürücüləri həmin bayraqların şəklini pozmağa təhqirli şəkildə məcbur etdilər. İran bu günədək bu hadisəyə münasibət bildirməyib. Rəsmilər də olmasa, hər-halda mətbuatda gedən yazı və ya ekspert sözü ilə bu məsələyə münasibət bildirmək olardı. Görünür, İranın Ermənistandakı səfirliyi belə məlumatları İranın Xarici İşlər Nazirliyinə göndərmir. İranın Ermənistandakı səfirliyinin əməkdaşlarının da dini baxımdan İranın Azərbaycandakı mollabaşısı - Ocaq Nejada tabe olmasını da bir daha yada salmağı faydalı hesab edirik. Ermənistan rəsmilərinin Şuşanın işğalında göstərdiyi köməyə görə İrana minnətdarlığını və İran diplomatlarının bu minnətdarlığı qəbul etməsinin izahı da Ermənistanın İrandan istifadə etməsi kontekstindən (zəminindən, təməlindən) tapila bilər. Ermənistanın İrandan istifadə etməsinə dair faktlar külli miqdardadır, hətta bəzən milli, dini heysiyyətinə toxunan səviyyədədir”.

 Politoloq bildirib ki, erməni siyasətçiləri İran-Azərbaycan münasibətləri və bu münasibətlərdən Ermənistanın xeyrinə olmasından geninə-boluna istifadəsi barəsində Qərb dünyasında kifayət qədər inamlı məlumatlar yayıblar: “Görünür, Ermənistana mənsub İran rəsmiləri bunu da öz ölkələrinə yazıb göndərmirlər. İranın belə hadisələrə reaksiya (əksüləməl) verməməsi 3 milyonluq, eləcə də İrandan asılı olan Ermənistanı 70 milyonluq, eləcə də böyük tarixə malik İran üzərində dominanta (ğalib, müsəllət) çevirib. Hər-halda gələcəkdə İranın son 20 illik siyasətinə qiymət verilərkən bu amil də İran İslam Respublikasının yeni rəhbərləri tərəfindən nəzərə alınacaqdır”. Apa