GünAz TV: ABŞ (Amerika Birləşmiş Ştatları) dövlət katibi Hillari Klinton Afrika ölkələrini Liviya (Libi) lideri Müəmmar Qəzzafi ilə əlaqələrə son qoyub, müxalifətlə iş birliyinə çağırıb.

Addis Əbəbədə (Adis ababada) Afrika Birliyinin baş qərargahında danışan dövlət katibi Afrika liderlərini Qəzzafidən atəşkəsi qəbul edib, hakimiyyəti tərk etməsini tələb etmələrini istəyib. Xanım Klinton deyib ki, Qəzzafinin diplomatları Afrika ölkələrindən çıxarılmalıdır. ABŞ dövlət katibi Liviyanın müxalif Müvəqqəti Keçid Şurasının dəstəklənməsinin vacibliyini qeyd edib.

   Efiopiya (Etyopi) Hillari Klintonun 4 ölkəni əhatə edən səfərinin son dayanacağıdır. Liviya lideri Müəmmar Qəzzafiyə sadiq qüvvələr qiyamçıların nəzarətində olan Zintan şəhərinə aviazərbələr (hava zərbələri) endirib. "Reuters" xəbər verir ki, nəticədə ən azı 9 nəfər həlak olub. 40-dan artıq müxalifət tərəfdarının yaralı olduğu bildirilir. Şahidlər bunun son həftələrin ən genişmiqyaslı bombardmanı olduğunu bildirir.

   Almaniyanın xarici işlər naziri Qido Vestervelle ölkəsinin rəsmən Liviya müxalifətini bu ölkənin əhalisinin və xalqının iradəsini əks etdirən legitim (qanuni) hakimiyyət kimi tanıdığını açıqlayıb. "Bizim Benqaziyə səfərimiz göstərdi ki, Almaniya ölkədə demokratik qüvvələrin dostu və tərəfdaşıdır" - deyə o müxalifət liderləri ilə görüşündə vurğulayıb. Onun sözlərinə görə, Almaniya Liviyada demokratik dövlət quruculuğunu bundan sonra da tam dəstəkləyəcək. Liviya ilə Almaniya arasında iqtisadi əlaqələri genişləndirmək məqsədilə Vesterveli bu səfərdə ölkəsinin iqtisadiyyat naziri Dirk nibel də müşayiət edib. Onlar Benqazidə Almaniya Xarici İşlər Nazirliyinin nümayəndəliyini də açıblar. Məqsəd isə Liviya xalqına humanitar (insani)  yardımların daha da artırılmasıdır. Qeyd edək ki, buna qədər Liviya müxalifətini legitim hakimiyyət kimi Avropa dövlətlərindən Fransa və İtaliya da tanıyıb. Onların hər ikisi Qəzzafiyə qarşı hərbi əməliyyatlarda iştirak edir. Almaniya isə bu əməliyyatlara qoşulmur.

   Son məlumatlara görə, Adcabiya, Maar-əl Berqa şəhərləri uğrunda gedən döyüşlərdə müxalifət qüvvələri 25 əsgərini itirib. Qətər telekanallarının məlumatına görə, onlarla yaralı müxalifətçi şəhər hospitalına gətirilib. Qəzzafi əleyhdarlarının təmsilçilərindən biri bildirib ki, döyüşlərdən birində hakimiyyət qüvvələri onlara ağ bayraqla yaxınlaşıblar. Daha sonra isə qəfil atəş açmağa başlayıblar. Ərəb telekanalları xəbər verir ki, müxalifət qüvvələrinin Mars-Əl-Breqa limanındakı neft daşıma məntəqələrini ələ keçirtmək cəhdlərinin hamısının qarşısı hakimiyyət qüvvələri tərəfindən alınıb. Qərb cəbhəsində isə nizami ordu birləşmələri müxalifətçilərin Tripolinin (Trablosun) 50 kilometrliyində yerləşən Əz-Zəvai şəhəri istiqamətində müxalifətçilərin hücumlarının qarşısını ala biliblər. Bununla belə, Misurata limanı yaxınlığında altı raket partlayıb. Bu neftlə zəngin əyalətə müxalifət qüvvələri nəzarət edir. Bu raketlərin haradan buraxıldığı isə hələ də dəqiq bilinmir. NATO qüvvələri də Tripoli və cənubda Qəzzafiyə məxsus hərbi obyektlərin (hərbi məntəqələrin, təsisatların) bombardmanlarını davam etdirib. Həftə içi