Vəfa Quluzadə: “İran ya dünyaya açılmalıdır, ya da inqilabi yolla dəyişikliyə hazır olmalıdır”

SON XƏBƏRLƏR

Vəfa Quluzadə: “İran ya dünyaya açılmalıdır, ya da inqilabi yolla dəyişikliyə hazır olmalıdır”

2021.10.20, 07:36

Gunaz.tv

GünAz TV: Politoloq Vəfa Quluzadə vurğuladı ki, Qərbin İrana qarşı tətbiq etdiyi sanksiyalar (təhrimlər) nəticəsini verməkdədir.

İran neft nazirinin müavini Möhsün Xocəstemehr bildirib ki, yaxın beş il ərzində ölkənin enerji sektoruna (bəxşinə) 150 mlrd. dollar sərmayə qoyulmasa, İranda neft hasilatı sutkada (22 saatda) 1 mln. barel (boşka) azala bilər. IRNA-nın xəbərinə görə, İran Milli Neft Şirkətinin 2015-ci ilədək olan dövrdə 5-ci inkişaf planında (tərhində) nəzərdə tutulan sözügedən kapital (sərmayə) qoyuluşu baş tutmasa, gündəlik neft hasilatı 3,7 mln. bareldən 2,7 mln. barelə düşə bilər.

V.Quluzadə İranın onu gözləyən bu fəlakətin altından çıxa bilməyəcəyini düşünür. ABŞ-ın (Amerika Birləşmiş Ştatlarının) hazırda İranı birbaşa hədəfə çevirməməsinə baxmayaraq, Tehranla bağlı siyasətin davam etdiyini deyən V.Quluzadə vurğuladı ki, Qərbin İrana qarşı tətbiq etdiyi sanksiyalar (təhrimlər) nəticəsini verməkdədir. İranın yaranmış situasiyada (vəziyyətdə) çıxış yolunun dünyaya açılmaq olduğunu söyləyən V.Quluzadə qeyd etdi ki, əks yol da İranı dəyişməyə doğru aparır, amma inqilabın vasitəsilə: “İranda hazırda baş verənlər hamının gözü önündədir. Xamneyi ilə dövlət başçısı arasında ziddiyyət hələ də davam etməkdədir. İran parlamentində isə prezidentlə bağlı narazılıq ifadə olunub. İranda inqilabi vəziyyət yetişməkdədir. O da nəzərə alınmalıdır ki, İranın güclü müxalifəti və ona rəhbərlik edən şəxslər var”. İranın neft sektoruna qoymalı olduğu 150 milyardlıq sərmayəyə gəlincə, V.Quluzadə vurğuladı ki, İranın buna maddi imkanı çatmasa da, bu məbləğ tapılmazsa, İranın itkiləri daha böyük olacaq. Bu isə hazırkı rejimin vəziyyətini bir qədər də qəlizləşdirəcək.

V.Quluzadənin İranın Ermənistanla ticarəti 40 faiz artırmasına da münasibətini öyrəndik. Belə ki, yayılan son məlumatlara görə, İran Ermənistanla iqtisadi əlaqələrini dərinləşdirməklə yanaşı iki ölkə arasında dəyəri 2,5 mlrd. dollar olan dəmir yolu xəttinin çəkilməsini də reallaşdırmaq niyyətindədir. Bundan başqa, İran və Ermənistan enerji, ticarət, sənaye və digər sahələrdə əməkdaşlığa dair saziş imzalayıblar.

V.Quluzadə İranla Ermənistanın əlaqələrinin sırf iqtisadi olduğunu vurğuladı: “İran hazırda sanksiyalarla üz-üzədir. Ona görə də iqtisadi əlaqələrini genişləndirmək üçün ölkələr axtarır. Ermənistanın da İrana ehtiyacı var. Bu addımın Qərbin Ermənistana münasibətinə necə təsir edəcəyinə gəlincə isə, Qərb Yerevanın müstəqil olmasını istəyir. Ona görə də Sərkisyan rejiminin çökdürülməsi istiqamətində addımlar atılır”. Azadlıq qəzeti

GUNAZ.TV

SON XƏBƏRLƏR